Trump jutře z Putinom porěči
Washington (dpa/SN). Prezident USA Donald Trump chce jutře z ruskim prezidentom Wladimirom Putinom rěčeć. Tole rjekny wón žurnalistam w lětadle prezidenta Air Force One. Wuhlady na „deal“ z ruskim prezidentom su dobre, Trump w tym zwisku zwurazni. Při rozmołwach drje póńdźe w prěnim rjedźe wo teritorialne prašenja, wón rjekny. Tež přichod wulkich milinarnjow chcetaj wobrěčeć, prezident USA přeradźi.
We wólbnym boju bě so Trump stajnje zaso z tym hordźił, zo ma dobre styki k Putinej a zo móhł wójnu w Ukrainje w běhu 24 hodźin skónčić. W februaru wón potom wosobinsce z Putinom telefonowaše, hakle potom z ukrainskim prezidentom Wolodymyrom Zelenskym, kotremuž běchu USA minjene tři lěta najwažniši podpěraćel.
Ukrainske knježerstwo kaž tež jeho europscy zwjazkarjo so boja, zo móhłoj Trump a Putin bjez Ukrainy měr wujednać. Žadanja Trumpa za ukrainskimi zemskimi pokładami jaka narunanje za dotalnu pomoc maja za špatny signal.
„Budźemy lutować dyrbjeć“
Předsyda CDU Friedrich Merz liči z wobćežnymi jednanjemi z SPD
Berlin (dpa/SN). Předsyda CDU Friedrich Merz wočakuje po zasadnym dojednanju na miliardy eurow wopřijacy kreditny paket nětko wobćežne koaliciske jednanja z SPD. „Budźemy wosebje wo reformach a wo móžnosćach lutowanja w zwjazkowym etaće rěčeć dyrbjeć. Móžnosće skutkowanja njejsu wjetše hač dotal“, rjekny prawdźepodobnje přichodny kancler wčera w sćelaku ARD.
Na ćišć Zelenych ma so nětko kruće zapisać, zo smědźa planowany a z kreditami financowany wurjadny fonds z wobjimom 500 miliardow eurow jenož za přidatne inwesticije wužiwać. To rěka, zo njesmě nowe knježerstwo předewzaća kaž rentu za maćerje abo zniženje dawkow w gastronomiji přez wokołopuće z dawkowych srědkow financować.
Konsens a kontrowersa
Móst lětsa dospołnje wottorhaja
To a tamne (17.03.25)
Na dwaj měsacaj dyrbi sakski kultusowy minister Conrad Clemens swoju jězbnu dowolnosć wotedać. Nimo toho dyrbi pokutu zapłaćić. Clemensa běchu lěće 2023 w Krušwicy błyskli, jako smaleše z 80 km/h po dróze, na kotrejž je jenož 30 km/h dowolenych. Clemens so hrožacej pokuće sudnisce wobaraše. Skóržbu pak potom zaso cofny a přizjewi so na seminar za pruwowanje wobchadnych kmanosćow. Podawk pochadźa z časa, jako Clemens hišće minister za kubłanje njebě.
Najebać temperatury wokoło nule je kupjel pod hołym njebjom w Karlsruhe minjeny kónc tydźenja kupansku sezonu zahajiła. Něhdźe 260 ludźi bě přišło, zo by w klasiskich kupanskich drastach abo w kostimje do basenka skočiło. Zymu mrěć pak nichtó njetrjebaše: 50 metrow dołhi płuwanski basenk je tepjeny, woda je 28 stopnjow ćopła.
Prócuja so wo dojednanje
Charlevoix (dpa/SN). Pod zaćišćom politiskeho přewróta ze stron prezidenta USA Donalda Trumpa prócuja so wonkowni ministrojo sydom wodźacych industrijowych krajow swěta G 7 na swojim wjerškowym zetkanju w Kanadźe wo jednotu. Po informacijach wobdźělnikow njeje jasne, hač so na zhromadny zakónčacy dokument dojednaja. Wosebje widźomne zbliženje mjez Trumpom a ruskim prezidentom Wladimirom Putinom wobdźělnikow znjeměrnja.
Dalše tarifowe jednanja
Berlin (dpa/SN). Po warnowanskich stawkach minjenych dnjow po wšej Němskej su tarifowe jednanja za přistajenych zjawneje słužbny dźensa rozsudnu fazu docpěli. Dźěłodawarjo a dźěłarnicy su so w Podstupimje zetkali. Za jednanja su tři dny předwidźane. Při tym dźe wo dochody 2,5 milionow přistajenych, kotřiž dźěłaja w zjawnych zarjadnistwach, pěstowarnjach abo komunalnych zawodach za wotstronjenje wotpadkow.
Wulki minus hladanskeje kasy
