Ličba dźěławych sylnje woteběra
Trump: Zelenskyj wójnu zawinował
Washington (dpa/SN). Prezident USA Donald Trump je po zetkanju swojeho wonkowneho ministra Marco Rubio ze zastupjerjemi Krjemla optimistiski. Wón je połny nadźije, zo dojednaja so přećiwnicy hižo bórze na měrowe zrěčenje nastupajo wójnu w Ukrainje. Rozmołwy z ruskimi zastupjerjemi běchu jara dobre, Trump zdźěli. „Ruska chce něšto činić“, wón doda. Zdobom wumjetuje Trump ukrainskemu prezidentej Wolodymyrej Zelenskemu winu na tym, zo je Ruska w februaru lěta 2022 Ukrainu nadpadnyła.
Zastupjerjo z USA a Ruskeje rozmołwjachu so wčera na zetkanju w saudi-arabskim Riadźe wo kóncu wójny w Ukrainje. Z Ukrainy a EU nichtó pódla njebě. Wobě stronje po zetkanju wonkowneju ministrow Marca Rubija a Sergeja Lawrowa dale zdźělištej, zo wosebite skupiny za měrowe jednanja wutworitej.
Mjeztym su so staty EU trajaceje wójny dla na nowe sankcije přećiwo Ruskeje dorozumili. Wone płaća wot přichodneje póndźele.
Kandidata njepostajili
W Choćebuzu podpěraja Zeleni Maju Wallstein (SPD)
Choćebuz (dpa/SN). Strona Zelenych w Braniborskej so při wólbach zwjazkoweho sejma přichodnu njedźelu prěni raz we wólbnym wokrjesu direktneje kandidatury wzdawa a wabi za kandidatku SPD Maju Wallstein. Přičina toho je, zo chce strona z tym demokratisku direktnu kandidatku podpěrać a jeje šansy na mandat powyšić, wuswětli braniborska šefina Zelenych Alexandra Pichl powěsćerni dpa. Wo tym rozsudźił je skónčnje Choćebuski wokrjesny zwjazk. Pichl ma postupowanje za zajimawe, předewšěm chce wona wědźeć, hač to funguje. Braniborscy Zeleni we wólbnym wokrjesu 64 (Choćebuz – Sprjewja-Nysa) tuž cyle wědomje njenastupja. Před štyrjomi lětami je Wallstein direktny mandat z 27,6 procentami prěnich hłosow před požadarjom AfD Danielom Münschke dobyła. Münschke je tehdy 25,7 procentow hłosow wolerjow dóstał. W pjeć krajach na wuchodźe Němskeje njejsu Zeleni w lěće 2021 ani jedyn direktny mandat docpěli.
Płun dosaha
To a tamne (19.02.25)
Swětoznata pomazanka je nětko bjez praweje ruki. Lětdźesatki dołho mjenowachu jeho medije „nana nutelle“, tola 14. februara wón w starobje 97 lět zemrě. Francesco Rivella bě nimo Michele Ferrero worjechowu-nugatowu pomazanku wuwił. Rivella bě zežiwidłowy chemikar. Słowo „nutella“ zestaja so z dweju słowčkow, jendźelskeho słowa „nut-“, štož rěka worjech, a „-ella“, štož je klasiska italska kóncowka.
Wótře telefonować móže fatalne sćěhi měć. Znajmjeńša je tole žona w ćahu do Rosenheima nazhoniła. Wona so při telefonaće wjeseleše, zo běše horda, zo je policiji wućeknyła. Ciwilny policist to słyšeše a zazwoni swojich kolegow. Kaž so wukopa, bě so wona wospjet agresiwnje zadźeržała, čehoždla ju hamtske sudnistwo w Mnichowje do psychiatrije přepokaza.
Dalši swobodny dźeń móžny
Berlin/Drježdźany (SN). 8. meje je so Druha swětowa wójna w Europje skónčiła. Tole chcedźa w Berlinje z jónkrótnym swobodnym dnjom wopominać. W Sakskej spyta Lěwica hižo wjacore lěta, dźeń wuswobodźenja wot fašizma jako wopomnjenski dźeń zakótwić. Koalicija CDU/SPD je za tutón namjet nětko wotewrjena. Tež Zeleni a BSW to witatej. Hišće je dosć chwile, tajki dźeń w sakskim krajnym sejmje wobzamknyć.
Znowa rozmołwy zahajili
Wien (dpa/SN). W Awstriskej stej konserwatiwna ÖVP a socialdemokratiska SPÖ znowa rozmołwy wo móžnej koaliciji zahajiłoj. Zastupjerjo stronow wo tym rěča, hač je zhromadne dźěło a knježerstwowe dojednanje móžne abo nic, ÖVP zdźěli. Tež SPÖ je wuměnu wobkrućiła. Hač budu rozmołwy wuspěšne, jasne njeje. Prěni zazběh ke koaliciji ÖVP a SPÖ bě hižo w januaru zwrěšćił. W Awstriskej nimaja tež štyri a poł měsaca po wólbach parlamenta žane nowe knježerstwo.
Hižo dźensa so zetkali
Zwjazkowy prezident Frank-Walter Steinmeier a Eva Köhler, wudowa dnja ...
Bamž wostanje w chorowni
Lěwica dobyła
Berlin (SN). Dohromady 166 443 dźěći a młodostnych je minjeny tydźeń při wólbach pod 18 lětami (U18) swój hłós za wólby noweho zwjazkoweho sejma wotedało. Wot wčerawšeho wuslědk předleži. Najsylniša strona pola wolerjow pod 18 lětami je Lěwica z 20,8 procentami hłosow. Po tym sćěhuje SPD ze 17,9 procentami. Unija je 15,7 procentow docpěła, nimale runje telko dósta AfD z 15,5 procentami hłosow. Zelenych woleše 12,5 procentow dźěći a młodostnych. Strona za škit zwěriny dósta 3,8 procentow, FDP a BSW stej z 3,4 procentami najmjenje hłosow docpěłoj.
W Sakskej, Saksko-Anhaltskej a Durinskej pak bu AfD najsylniša móc. W Sakskej hłosowaše 32 proc. dźěći a młodostnych za AfD. Při wólbach U18 so na zwučene wašnje jenož druhi hłós woteda. Wuslědki njejsu reprezentatiwne.
