Žada sej krizowy wjeršk twarstwa
Berlin (dpa/SN). Prezident zwjazka rjemjeslnikow Němskeje Jörg Dittrich žada sej hladajo na přiběracu krizu twarskeho hospodarstwa wjerškowe zetkanje. „Trjebamy tajki wjeršk“, rjekny Ditrich nowinarjam. Wón je sej wěsty, zo bliži so twarstwo hladajo na dramatisce woteběracu ličbu twarskich dowolnosćow w Němskej krizowemu dołej. „Tomu njemóžemy drje wjace zadźěwać“, je sej wón wěsty. „Ćim nuznišo je, wo naprawach rěčeć, zo njeby puć po tutym dole předołhi był. Trjebamy signal rozmacha.“
Twarske kóšty a přiběrace danje kreditow wuwiće na twarnišćach kraja hižo měsacy dołho haća. Wosebje twar bydlenjow pod tym ćerpi. Ministerka za twarstwa Klara Geywitz (SPD) je tohodla dawkowe wolóženja namjetowała. Dittrich na to pokazuje, zo sej rjemjesło hižo wot nalěća wotpowědne rozmołwy žada. „Wšitcy zamołwići dyrbja za blido. K tomu słušeja banki runje tak kaž twarske a rjemjeslniske předewzaća. „Kriza twarstwa ma dramatiske wuskutki na hospodarstwo a wšu towaršnosć.“
Kajka Europa?
Do swědomja rěčeć móžeš jenož tomu, kiž hišće swědomje ma. To drje je zasadny problem wčerawšeje namołwy bamža Franciskusa na swětowym zetkanju młodźiny w portugalskej stolicy Lissabonje na zamołwitych Europy. Bamž paruje mjez nimi „zmužity kurs měra“ a „kreatiwne puće, wójnu w Ukrainje skónčić“. Europa jako faktor mocy a stability wočiwidnje wjace njeeksistuje. Dawno smy so ponižili na swěrneho wotročka USA. Francoski prezident Emmanuel Macron je jenički, kiž sej stajnje zaso sylnišu a wosebje sebjewědomišu Europu na swětowym jewišću žada. Jemu pak so mjeztym směja kaž wbohemu błazniwcej, kiž njeje znamjenja časa hišće spóznał. Zamołwići EU njejsu sej po zdaću toho wědomi, zo ze swojej pasiwnosću a podwólnosću napřećo USA na kóncu jenož tych sylnja, kotřiž so tak a tak dawno prašeja, čemu je wony konstrukt 27 statow hišće trěbny – a kiž chcyli jón w tuchwilnej formje wotstronić.
Marko Wjeńka
To a tamne (03.08.23)
Ze 2,6 promilemi alkohola w kreji je šofer wosoboweho awta z Braniborskeje nimale 300 kilometrow k Baltiskemu morju jěł a je sej krótko do swojeho cila za wodźidłom wusnył. 38lětny z wokrjesa Dubja-Błóta bě w Rostocku kedźbnosć zbudźił, jako po seklojtej čarje jězdźeše. Jako awto na busowym zastanišću steješe a motor hišće běžeše, tukachu swědcy na strowotniske problemy šofera. Policija zwěsći alkohol a jězbnu dowolnosć muža sćaza. 38lětny bě po puću do susodneho Graal-Müritza – do dowola.
Znowa je pozdatne rubježne zwěrjo w Berlinje zasadźenje policije zawinowało. Muž bě zastojnikow informował, po tym zo bě w měšćanskim dźělu Dahlemje dźiwje zwěrjo wuhladał. Zastojnicy wuhladachu tam plyšowe zwěrjo na elektriskim kašćiku měšćanskeho zahrodnistwa. Štó je hrajku tam sadźił, njewědźa.
Trump znowa wobskorženy
Washington (dpa/SN). Bywšeho prezidenta USA Donalda Trumpa su w zwisku z pospytanym wobwliwowanjom wólbow a z nadběhom na Kapitol 6. januara 2021 wobskoržili. Tole wuchadźa z dokumenta skóržby, kotruž su minjenu nóc wozjewili. Je to mjeztym druha skóržba na zwjazkowej runinje přećiwo 77lětnemu. Trump chce při prezidentskich wólbach klětu znowa za republikanow nastupić. Wón wšitke wumjetowanja jako politisku inscenaciju wotpokazuje.
Wuchowaja wukrajnikow
Niamey (dpa/SN). Francoska a Italska stej tydźeń po wojerskim puču w zapado-afriskim Nigeru započeli, swojich kaž tež dalšich staćanow ewakuować. Po informacijach francoskeho wonkowneho ministerstwa su dotal 260 ludźi, mjez nimi dwanaće ćěšenkow, z nigerskeje stolicy Niameyja wuchowali. Němska wonkowna ministerka Annalena Baerbock (Zeleni) dźakowaše so Francoskej, zo tež němskich staćanow z Nigera sobu wozmje.
Unija žada sej krizowy wjeršk
Chětro błóćane je swjedźenišćo lětušeho heavy-metaloweho ...
To a tamne (02.08.23)
Lód za njerozsudźenych poskićuja w kofejowni w badensko-württembergskim Gaggenauwje. Wobsedźer lodarnje měješe toho dosć, zo započina so kóžda skazanka ze znatym „ehm ...“, byrnjež rynk čakacych hižo dosć dołhi był. Štóž sej z tutym słowom pola njeho lód skaza, dóstanje woprawdźe lód družiny „ehm ...“, kreaciju lodu z běłej šokolodu a pistacijemi. Wothłós na nowy lód je pječa dobry.
Z elektro-rolerom na awtodróze 2 po puću był je 27lětny pola Braunschweiga. Policistam muž rozłoži, zo jědźe k tankowni po bencin, dokelž je tank awta prózdny. Zastojnicy ćišćachu awto na přichodne parkowanišćo. Tam zwěsćichu, zo njebě roler zawěsćeny. Jako chcyše muž znowa k tankowni jěć, policisća jězdźidło skónčnje sćazachu, napisawši skóržbu přećiwo 27lětnemu.
Ukrainske žito do Chorwatskeje
Kijew (dpa/SN). Ukraina je so po swójskich informacijach z Chorwatskej wo wuwožowanju žita přez přistawy nad Adriju dojednała. Ratarske wudźěłki chcedźa z łódźemi po Dunaju do Chorwatskeje dowjezć, wonkowne ministerstwo w Kijewje zdźěla. Po tym chcedźa je ze železnicu k pobrjohej Adrije transportować. Kajke mnóstwa su po tutym puću docpějomne, njezdźělichu. Ukraina chce tak blokadu Ruskeje wobeńć. Ruske łódźe ukrainske přistawy blokuja.
Habeck žada sej lěpšu pomoc
Berlin (dpa/SN). Hospodarski minister Robert Habeck (Zeleni) žada sej wot financneho ministra Christiana Lindnera (FDP) skutkownišu pomoc na dobro hospodarstwa. „Namjety Lindnera su cuni započatk toho, štož trjebamy. Tole pak njedosaha.“ Habeck žada sej „trojozynk naprawow“, zo móhł hospodarstwu pomhać: Zaměrnu podpěru inwesticijow, dawkowe wolóženja a industrijnu płaćiznu miliny za wěsty přechodny čas. Lindner chce hospodarstwu šěsć miliardow eurow wob lěto spušćić.
Tobak: Kritizuja Němsku
Při njewšědnje sylnych zliwkach je w chinskej stolicy Pekingu ...
Starosća so Wagnerowcow dla
Vilnius (dpa/SN). Prezident Litawskeje Gitanas Nauseda starosća so ruskich zóldnarjow skupiny Wagner w susodnej Běłoruskej dla. Wojacy su chutne wohroženje, rjekny statny šef baltiskeho čłona EU a NATO powěsćerni BNS na swojim wčerawšim wopyće w namjeznym přechodźe Medininkai. Nasueda rjekny, zo je „woprawdźe wabjace“, Wagnerowcow za wšelake prowokacije w kónčinje wužiwać. Jich móhli za wojerske akcije přećiwo Pólskej a Litawskej runje tak zasadźić kaž přećiwo Letiskej, kotraž ma tohorunja mjezu k Běłoruskej. Zdobom wón přizna, zo nima dotal žanych konkretnych pokiwow, zo tajke prowokacije woprawdźe přihotuja.
Jednotki priwatneje armeje zóldnarjow šefa Jewgenija Prigožina běchu po zwrěšćenym zběžku přećiwo Moskwje do Běłoruskeje přesydlili. Wojerske nawodnistwo w Minsku zdźěla, zo zóldnarjo wojakow běłoruskeje armeje wukubłuja. Běłoruska stej po boku Ruskeje. Nauseda warnuje, zo móhli zóldnarjo mjezu překročić a so za migrantow wudawać.
Němska na dróze přěhračkow
Zastupnicy hospodarstwa zhladuja z wulkimi starosćemi do přichoda
Berlin (dpa/SN). Wodźace zwjazki němskeho hospodarstwa zhladuja z wulkimi starosćemi na połoženje konjunktury. Prezident zwjazka němskeje industrije Siegfried Russwurm rjekny powěsćerni dpa: „Němska kroči po dróze přěhračkow, wosebje w mjezynarodnym přirunanju.“ Prezident zwjazka dźěłodawarjow Rainer Dulger rjekny dpa: „Chcemy-li jedyn z wodźacych industrijnych krajow wostać, dyrbimy na mnohich blakach tójšto změnić.“ Prezident Centralneho zwjazka rjemjesła Němskeje Jörg Dittrich rjekny: „Dyrbimy nuznje jednać, zo njebychmy so sami do hłubokeje krizy storhnyli.“
