Zwjazk narunanskich kasow žada sej dołhodobne rozrisanje

Berlin (dpa/SN). Hladanje w starownjach je dale a dróše. Připłatki ze swójskeje kapsy hladanja potrěbnych a jich swójbnych su hišće raz jasnje přiběrali. Tole je zwjazk narunanskich chorobnych kasow 1. julija w přepytowanju zwěsćił. Prěnje lěto w starowni dyrbjachu wobydlerjo w cyłoněmskim přerězku 2 548 eurow zapłaćić – 348 eurow wjace hač srjedź lěta 2022. Poćežowanje ludźi tak najebać mjeztym zawjedźenych pomocnych připłatkow dale přiběra. Při tym so wyše mzdy za nuznje trěbne hladarki a hladarjow wuskutkuja. Tole tež wudawki za přebywanje, jědź a napoje su dale rozrostli.

W mjenowanej sumje je swójski podźěl za ryzy hladanje zapřijaty. Přetož hladanske zawěsćenje přewozmje – hinak hač chorobne zawěsćenje – jenož dźěl kóštow. Za wobydlerjow starownjow přińdu potom hišće wudawki za přebywanje, zastaranje a inwesticije domu k tomu. Bjez pomocnych připłatkow by kóždy wobydler měsačnje 2 610 eurow płaćić dyrbjał. Jeničce swójski podźěl za hladanje je w běhu dwanaće měsacow wo 281 na 1 245 eurow wob měsac rozrostł.

Waršawa (dpa/SN). „Wróćće dźěćom jich rěč“ – z tajkimi plakatami protestuja přiwisnicy němskeje mjeńšiny w Pólskej přećiwo planam tamnišeho knježerstwa, mnóstwo hodźinow němčiny na pólskich šulach redukować. W februarje 2022 bě konserwatiwne knježerstwo strony PiS wobzamknyło tydźenske hodźiny wot třoch na jednu redukować. Wopodstatniło je knježerstwo rozsud z tym, zo němske knježerstwo pólšćinu na němskich šulach njespěchuje. Wot skrótšenjow su dohromady někak 53 000 šulerkow a šulerjow potrjechenych, praji Rafał Bartek wot zwjazka němskeje mjeńšiny. Tež rozmołwy z pólskim ministrom za kubłanje, Przemsysławom Czarnekom, wo wonej temje běchu bjez wuspěcha. Na twitteru pokazowaše wón na to, zo inwestuje pólske knježerstwo lětnje 27 milionow eurow do wučby němčiny. „Byšće-li znajmjeńša spytali swojich němskich staćanow wo tym přeswědčić, zo njeje prawje pólskich staćanow diskriminować, potom sym zwólniwy, dalše kroki hić“, pisa wón dale. Pólske knježerstwo wupraja so před wólbami w nazymje přiběrajcy antiněmsce.

Mysteriozna namakanka na pobrjoze sewjernje awstralskeho města Perth fachowcow zaběra. Jedna so wo cylindriske sudobjo z lochkich wuhlowych nitkow, nimale tři metry wysoke a 2,5 metrow šěroke, medije rozprawjeja. Prěnja kontrola je wunjesła, zo njejsu ludźo wohroženi. Awstralska swětnišćowa agentura je sej wěsta, zo móhł objekt kanister rakety być. Nětko prašeja so mjezynarodnych partnerow, komu móhł nastroj słušeć.

Wokoło stać, sedźeć abo samo ležeć je w centrumje zapadno francoskeho města Angoulême wotnětka zakazane – znajmjeńša tam, hdźež móhło to druhich wobćežować. Wosebje alkoholizowane a harowace skupiny chce město tak wuhnać. Štóž zakaz njedodźerži, dyrbi z pokutu ličić. Njeje to naprawa přećiwo prošerjam, zdźěla město, kotrež je kóždolětnje zaměr mnohich turistow.

Vatikan (B/SN). 21 nowych kandidatow, kotrychž 30. septembra do zastojnstwa kardinala zapokazaja, bu we Vatikanje nominowanych. Mjez nimi su nawodźa wažnych biskopstwow a zasłužbni diplomaća, tež z Hongkonga. 18 z nich by so tuchwilu na wólbje bamža wobdźělić móhło, dokelž su młódši hač 80 lět.

Praktiske pokiwy

Berlin (B/SN). Po měnjenju němskeho psychologi Rolfa Schmiela podawa biblija wjele politiskich pokiwow, kak hodźi so žiwjenje lěpje zmištrować. Lubosć k blišemu kaž tež wodawanje a zrozumjenje za druheho su wažny zakład do­stojneho žiwjenja. „Dobre psychologiske knihi bazuja k 80 procentam na křesćanskich hódnotach“, wón podšmórnje.

Z nowymi zaměrami

Vatikan (B/SN). Přichodny prefekt wučby wěry, argentinski arcybiskop Victor Fernández, ma nadawk, bamža a biskopow při wozjewjenju ewangelija po cyłym swěće podpěrać. 60lětny Fernández stanje so srjedź septembra ze šefom vatikanskeho centralneho zarjada romsko-katolskeje cyrkwje. Fernández chce wote­wrjeny dialog znutřka a zwonka cyrkwje spěcho­wać a wjace cyrkwinskich zastojnstwow žonam zmóžnić.

Nawróćić so