Dźiwje swinjo w basenku na priwatnej ležownosći w Neuenhagenje pola Berlina je zasadźenje policije a wohnjoweje wobory zawinowało. Wobydlerjo běchu zwěrjo sobotu rano w poolu wuhladali. Něhdźe 40 kilogramow ćežke zwěrjo bě prawdźepodobnje za wochłódźenjom pytało, njemóžeše pak wjace z basenka wulězć. Wobornicy wodu wotpušćichu a swinjo z pasami wućahnychu. Zwěrjo bě po wuchowanju chětru wučerpane a so bórze na to w bliskim lěsu zminy.

Hara motorowych piłow bě kónc tydźenja w Heinersdorfje we wokrjesu Wódra-Sprjewja prezentna. Tam wubědźowaše so 20 wobdźělnikow we wowčerni wo myto najspěšnišeho a najlěpšeho rězbarja z motorowej piłu „Speedcarving“. Při tym dyrbjachu w 45 mjeńšinach ze 1,10 metrow wysokeho a 30 centimetrow tołsteho zdónka wuměłsku twórbu rězbarić.

Kijew (dpa/SN). Ukrainski prezident Wolodymyr Zelenskyj je Ruskej wumjetował, zo po zničenju spjateho jězora humanitarnu katastrofu hišće pohórša. Ruske jednotki na pomocnikow a ewakuowanych třěleja, rjekny Zelenskyj w swojim wšědnym widejowym poselstwje. Wozjewjene wideja maja tole dokumentować. Zelenskyj Ruskej nimo toho wumjetowaše, zo wot zapławjenja potrjechenym wobydlerjam njepomha.

Za partnerstwo z Kolumbiskej

Cali (dpa/SN). Zwjazkowa wonkowna ministerka Annalena Baerbock je za wuske partnerstwo w energijowym a klimowym wobłuku ze štwórtym najwjetšim krajom Łaćonskeje Ameriki, Kolumbiskej, wabiła. W něhdźe sto kilometrow wot pacifiskeho pobrjoha zdalenym měsće Cali je so politikarka Zelenych z kolumbiskej wiceprezidentku Franciju Marquez zetkała. Tam dźěše mjez druhim wo měrowy proces w kraju. Tež wobłuki klima, energija, surowizny a prawa žonow běchu tema.

Wosobny hotel popryskany