Wobwliwuje do dźensnišeho
Wosebitej wustajeńcy, wědomostny forum: Wo wuznamje Jana Buka
Choćebuz (NC/SK/SN/bn). Składnostnje wotewrjenja wosebiteju wustajeńcow „Wšo je krajina – serbski moler Jan Buk“ a „Hommage à Jan Buk“ w Choćebuzu (SN rozprawjachu) wuhotowachu tam minjeny pjatk „Němsko-serbsko-pólski swjedźeń – zetkanje a dialog“. Zastupujo Choćebuskeho wyšeho měšćanostu Tobiasa Schicka (SPD) powita financny decernent dr. Markus Niggemann (CDU) hosći jako „Europjankow a Europjanow serbskeho, pólskeho a němskeho pochada“ a wuzběhny partnerstwo městow Choćebuz a Zielona Góra. Wosebje podšmórny wón „mostowu funkciju Serbow“ mjez Łužicu a Pólskej. Zastupowaca ministerska prezidentka a ministerka za socialne, strowotu, integraciju a škit wužiwarjow Braniborskeje Ursula Nonnemacher (Zeleni) rjekny, zo je „cyły dźensniši dźeń swjedźeń za serbsku kulturu a swjedźeń za braniborsko-pólske susodstwo. Braniborska wuznawa so k swojim winowatosćam napřećo Serbam – nic dokelž to dyrbimy, ale dokelž to chcemy.
Zeleni kritizuja azylowy kurs
Berlin (dpa/SN). W rjadach Zelenych jewi so jasna kritika přećiwo planam nastupajo reformu azyloweho prawa ze stron EU – a tež na postupowanju swójskeho wodźaceho personala w tutej diskusiji. Nowiny rozprawjeja wo lisće 730 čłonow Zelenych wodźacym politikarjam strony. Rozprawy wo stejišću zwjazkoweho knježerstwa w tymle prašenju su awtorow lista „hłuboko zludali“. Přiwótřenje prawa na azyl na njedobro ćěkancow baza Zelenych jasnje wotpokazuje, w lisće rěka.
Pence kandiduje za prezidenta
Washington (dpa/SN). Bywši wiceprezident USA Mike Pence chce so z prezidentom Zjednoćenych narodow stać. Republikan je wčera zwjazkowej wólbnej komisiji trěbne podłožki za wólby w nowembru 2024 zapodał. Pence wužada ze swojej kandidaturu tež swojeho tehdyšeho šefa Donalda Trumpa, kiž chce tohorunja k wólbam nastupić. Wot lěta 2017 hač do 2021 bě Pence naměstnik Trumpa. Na kóncu sta so z njepřećelom toho přiwisnikow, kotřiž chcychu jeho morić.
Komuny měli sami rozsudźić
Sudnicy: Pólska rani prawo EU
Luxemburg (dpa/SN). Pólska je w zwadźe z Europskej uniju wo njewotwisnosć pólskich sudnikow před Europskim sudnistwom doskónčnu poražku poćerpjeła. Po wčera wozjewjenym wusudźe ranja postajenja pólskeje justicneje reformy z lěta 2019 prawo EU. Sudnistwo w Luxemburgu je tak skóržbje komisije EU wotpowědowało. Při tym dźěše na přikład wo to, zo njesmědźa pólske sudnistwa prawo EU pruwować, bjez toho zo bychu jim disciplinariske jednanje napołožili abo wo to, zo dyrbja sudnicy swoje politiske aktiwity dokumentować.
Pólske narodno-konserwatiwne knježerstwo justicu kraja najebać mjezynarodnu kritiku hižo wjele lět přetwarja. Komisija EU je wospjet přećiwo tomu skoržiła. Zdźěla su rozsudy Pólskeje w Luxemburgu zaso zběhnyli a pokutu postajili. We Waršawje rozsudy Europskeho sudnistwa wotpokazuja.
Dwójna moralka
Błyskače na priwatnych ležownosćach su stajnje problem. W Radworju mějachmy podobny pad. Tam běchu błyskač takrjec na iniciatiwu wobydlerja na kromje wsy nastajili. Swójba měješe toho dosć, zo smala awta tam hižo ze spěšnosću, jako bychu dawno zwonka wsy byli. Někotryžkuli šofer njebě sej ani toho wědomy, zo tachometer awta na tutym městnje spěšnosć pokazuje, kotraž je wšo druhe hač normalna. A wězo słyšach tež stajnje zaso argument, zo tam na kromje wsy spěšnje jěduce awta woprawdźe nikoho wjace njewohrožuja. Na swójbu, kiž bě nastajenju błyskača přizwoliła, hladachu wotnětka čornje a što jej při piwowych blidach nadawachu, móže sej kóždy myslić.
Wěste pak tež je, zo bychu samsni ludźo z protestnymi plakatami před gmejnskim zarjadom stali, po tym zo su prěnje – wot awta – ćežko zranjene dźěćo do chorownje dowjezli, wumjetujo zamołwitym, zo su smalerjam přihladowali. Hladajmy raz do špihela! Marko Wjeńka
Murja spjateho jězora wobškodźena
Cherson (dpa/SN). We wot Ruskeje wobsadźenej juhoukrainskej kónčinje Cherson su po informacijach wobeju wójnskeju stron wažny spjaty jězor njedaloko fronty wobškodźili. Kijew a Moskwa dawatej sej mjez sobu winu za podawk, kiž móhł razne sćěhi měć. Ukrainske wójsko zdźěla, zo su ruscy okupanća murju jězora njedaloko města Nowa Kachowka sami rozbuchnyli. Guwerner kónčiny, Oleksander Prokurin, warnuje, zo móhła woda spjateho jězora w běhu někotrych hodźin wšu kónčinu zapławić.
Ruske wójsko porno tomu Ukrainjanam wumjetuje, zo su murju spjateho jězora „Kachowka“ sami wobškodźili. Wot Moskwy zasadźeny ruski měšćanosta Wladimir Leontjew zdźěli statnym ruskim powěsćernjam, zo woda w rěkach přiběra. Dotal pak nima za trěbne, wobydlerjow ewakuować.
Mjeztym je ukrainski prezident Wolodymyr Zelenskyj hladajo na wobškodźenu murju spjateho jězora nuzowe posedźenje narodneje wěstotneje rady zwołał, wumjetujo Ruskej zamołwitosć.
Minjenu nóc knježeše po wšej Ukrainje alarm ruskich nalětow dla.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje: Manja Bujnowska 577 262
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (06.06.23)
Horce rulady z běrnjacymi kulkami su w Hornjej Frankskej wobchadne njezbožo zawinowali – po tym zo je so hornc z horcej jědźu šoferej wosoboweho awta na klin wulał. Kaž policija zdźěla, bě 82lětny šofer kontrolu nad swojim awtom zhubił, jako so hornc na pódlanskim sedle w křiwicy powali. Wustróžany muž zrazy do parkowaceho awta, kotrež so na dalše awto suny. Wěcna škoda wučinja po prěnim trochowanju 25 000 eurow.
Mórsku dróhu mjez Němskej a Danskej – Fehmarnbelt – chce Kamjeničanski płuwar dołhich čarow Joseph Heß zmištrować. Po tym zo bě loni Ryn wot žórła hač k zaliwej přepłuwał, je sej 35lětny nowe wužadanje předewzał. Něhdźe 25 kilometrow dołhu čaru chce wón w něhdźe wosom hodźinach přeprěčić. Rekord nastajiła je Lotta Steinmann w štyrjoch hodźinach a dwanaće mjeńšinach.
Po nowym kalendrje
Kijew (B/SN). Samostatna ortodoksna cyrkej w Ukrainje (OKU) je njedawno rozsudźiła, zo budźe w přichodźe po nowo-julianskim kalendrje hody (25. decembra město 7. januara) a swj. Mikławša (6. decembra) zhromadnje z katolskimi a protestantskimi křesćanami swjećić. To pak njepłaći za jutry a swjatki, kotrež njejsu na kruty dźeń w kalendrje wjazane. Tak chcedźa so wot rusko-ortodoksneje cyrkwje distancować. Krajny koncil ma reformje hišće přihłosować.
Poslednja słužba
Lipsk (B/SN). K smjerći zasudźeni mordarjo w Americe maja prawo na dušepastyrske zastaranje. Wjacori duchowni su swoje nazhonjenja protokolowali a zwěsćili, zo mnozy swoje njeskutki wobžaruja. W lěće 2022 su po cyłym swěće znajmjeńša 883 ludźi w 20 krajach wotprawili. Po podaćach Amnesty International je to najwjetša ličba po lěće 2017.
Archiwy wohrožene
Rozprawa mylnje wozjewjena
Moskwa (dpa/SN). Ruske wójsko je mylnje rozprawu wo problemach w zwisku z mobilizowanjom za wójnu přećiwo Ukrainje wozjewiło. Tekst su drje spěšnje zaso šmórnyli, ruski internetny portal „The Insider“ pak móžeše dokument zawěsćić. W pismje mjenuja hladajo na žołmu mobilizowanja loni nazymu dwaj problemaj: „Pobrachowacu zwólniwosć k spjelnjenju wojerskeje winowatosće“ a „njedostatk zastaranja wojakow z wojerskim materialom a zaměstnjenjom“.
W Lipsku měrnje wostało
Lipsk (dpa/SN). Po ćežkich namócnosćach mjez radikalnymi lěwicarjemi a policiju w Lipsku je wčera wječor w měsće měrnje wostało. Po informacijach nowinarjow su so w měšćanskim dźělu Connewitzu wjacori ludźo zhromadźili, zarjadowanja pak so žane wjace njewotměchu. Do toho bě město za wčera wječor přizjewjenu demonstraciju zakazało. Wopodstatnili su to z ćežkimi namócnosćemi sobotu wječor, při kotrymž so wjacori demonstranća a policisća zranichu.
Sudźa wo justicy Pólskeje
