Berlin/Podstupim (dpa/SN). Što činić, hdyž milina dlěši čas wupadnje? Kotre pomocne organizacije dźěłaja w padźe katastrofy hromadźe? Na po wšej Němskej prěnim Dnju škita ludnosće chcedźa sobotu w Podstupimje mjez druhim pokazać, kak měło so z nuzowymi padami wobchadźeć a kak móža sej ludźo w tajkim padźe sami pomhać. Popołdnju ­maja po wšěm měsće za probowe warnowanje sireny ruć. Na Dźeń škita wobydlerjow wočakuja zwjazkowu nutřkownu ministerku Nancy Faeser runje tak kaž braniborskeho ministerskeho prezidenta Dietmara Woidkeho (wobaj SPD). Wohnjowa wobora, policija, zwjazkowa wobora, techniski pomocny skutk a dalše ­po­- mocne organizacije budu w centrumje Podstupima prezentne. Poskićić chcedźa přednoški, ale tež akcije k sobučinjenju – wot warjenja bjez miliny hač k zasadźenju wuchowanskich psow. Truty a jězdźidła słužby za škit před katastrofami budu widźeć. Po informacijach zwjazkoweho nutřkowneho ministerstwa chcedźa wot klětušeho tajki dźeń škita wobydlerjow kóždolětnje zarjadować, zo ­bychu ludźi wobšěrnišo informowali.

Styskniwa powěsć je mje w dowolu dosćahnyła: We Waršawje je minjeny štwórtk, 15. smažnika, we 80. žiwjenskim lěće Bohdan Urbankowski zemrěł – wu­znamny pólski basnik, dramaturg, historikar a filozof. Z pjera wuměłca a wědomostnika pochadźeja njeličomne zběrki poezije a prozy, dźiwadłowe hry, po­jednanja a biografije, mjez druhim wo Adamje Mickiewiczu, Józefje Piłsudskim a Janje Pawole II.  

Nowy tematiski wobłuk w Berlinskim kabineće wóskowych figurow „Madame Tussauds“ wotewrěł je bywši knježacy měšćanosta Klaus Wowereit. Wotdźěl „Award Party“ ma swjatočnosće spožčenja myta na čerwjenym přestrjencu z tójšto prominentnymi wosobami napodobnić. Kabinet Madame Tussauds swjeći lětsa 15. róčnicu wobstaća. Wowereit bě swojoraznu přehladku Pod lipami lěta 2008 jako měšćanosta wotewrěł a je tam wězo ze swójskej figuru zwobraznjeny.

Narodniny krala Charlesa III. su w britiskim wulkopósłanstwje w Berlinje ze 400 hosćimi woswjećili. „Je hišće trochu nje­zwučene, wo narodninach krala rěčeć“, wulkopósłanča Jill Gallard hladajo na dołhi čas zastojnstwa kralowny Elizabeth II. rjekny. Narodniny britiskeho monarcha swjeća stajnje w lěću, dokelž maja tam wuhlady na rjane wjedro.

Berlin (dpa/SN). Ze wšoněmskim akciskim dnjom su chorownje Němskeje dźensa na swoje dramatiske pjenježne połoženje skedźbnili. Centralne zarjadowanje bě w Berlinje planowane. Aktualnje z toho wuchadźeja, zo bědźi so 20 do 30 procentow wšěch klinikow z hrožacej insolwencu. Prezident zwjazka městow Němskeje Markus Lewe žada sej dalšu spěšnu pomoc. Chorownje njemóža na reformu klinikow čakać. Planowanych šěsć miliardow eurow je přemało, Lewe rjekny.

Zelenskyj: Žane straty

Kijew (dpa/SN). Ukrainska armeja njeje při swojej tuchwilnej přećiwnej ofensiwje přećiwo ruskim jednotkam po słowach prezidenta Wolodymyra Zelenskeho žane teritorialne straty poćerpjeła. W někotrych kónčinach ukrainscy wojowarjo postupuja, w druhich so zakituja a so ruskim nadběham wuspěšnje wobaraja, tak Zelenskyj. Znowa wón wobydlerjam kraja přilubi, zo módro-žołta ukrainska chorhoj něhdy zaso po wšěch tuchwilu wobsadźenych kónčinach zmawuje.

Łžě Johnsona w rozprawje