Wopačny wobraz wo mjeńšinach?
Berlin (SN/mb). Mjeńšinowa rada sej wot Zwjazkoweje centrale za politiske kubłanje (BpB) cofnjenje informaciskeho łopješka wo domoródnych narodnych mjeńšinach w Němskej žada. Předsydka Gitte Hougaard-Werner kritizuje, zo njejsu gremij do zdźěłanja teksta zapřijeli. Nimo toho awtoram zmylki wumjetuja, tak su ličby přisłušnikow narodnych mjeńšin „bjez zakłada a tendenciozne.“
We wotrězku wo Serbach steji, zo je jich 60 000, 40 000 w Sakskej a 20 000 w Braniborskej. Tohodla chcychu SN wědźeć, na čimž so mjeńšinowa rada konkretnje postorkuje. Nawodnica mjeńšinoweho sekretariata, Nele Feuring, wotmołwi w nadawku mjeńšinoweje rady, zo je wuznaće k mjeńšinje swobodne a tohodla njemóžeš žane ličby podać.
Mjez druhim kritizuja naspomnjenje druhich zastupnistwow zajimow mjeńšin kaž „Serbski sejm“ jako „parlamentariske zastupnistwo“ – to je iritěrowace a njewobkedźbuje płaćiwe zakonske zakłady. Domowina pak so w teksće BpB jako „připóznate zastupnistwo“ mjenuje, wo Serbskim sejmje pisaja, zo „njeje dotal žane připóznaće nadešoł“.
Antisemitizm sylnišo chłostać
Berlin (dpa/SN). Na šulach a uniwersitach chcedźa přichodnje sylnišo přećiwo antisemitizmej a hidźe na Israel postupować. Tole wobsahuje zhromadny naćisk SPD, CDU/CSU, Zelenych a FDP, kotryž je zwjazkowy sejm wčera z přemóžacej wjetšinu wobzamknył. Po tym chce so zwjazkowe knježerstwo z kultusowymi ministerstwami krajow wo to postarać, zo wjedźe antisemitiske zadźerženje na kubłanišćach k sankcijam, w ćežkich padach hač k eksmatrikulaciji.
Wothłosowanja kmani njebyli
Berlin (dpa/SN). Zwada politiskich stronow wo přidatnej pjenježnej pomocy na dobro Ukrainy je dočasny kónc posedźenja zwjazkoweho sejma zawinowała. Do nócneho wothłosowanja nastupajo próstwu FDP wo wudawkach třoch miliardow eurow, su zwěsćili, zo njeje sejm za to wjace kmany. AfD, kiž wojersku pomoc za Ukrainu wotpokazuje, bě njedostatk zwěsćiła: Za wothłosowanje dyrbjała połojca wšěch 733 zapósłancow přitomna być. Tomu wjac tak njebě.
Miliony dolarow Trumpej
Palestinska organizacija Hamas je dźensa znowa israelskich ...
Trump chce lěhwo migrantow
Stabilny eksport do Jendźelskeje
Zražka lětadła nad Washingtonom
Washington (dpa/SN). Njedaloko lětanišća stolicy USA Washingtona stej pasažěrske lětadło z 64 pasažěrami a helikopter wójska w powětře do so zrazyłoj. Regionalne lětadło předewzaća American Airlines je na to do rěki Potomac padnyło. Po informacijach medijow su pomocnicy wjacore ćěła z rěki wućahnyli. Mjeztym su wulku pytansku akciju zahajili. We Washingtonje je tuchwilu jara zyma. Rěka, při kotrejž stolica leži, je zdźěla zamjerznjena. Zwjazkowa policija FBI njetuka na teroristiski nadpad. Za to njepředleža žane dopokazy. Lětanišćo Ronald Reagan Washington National Airport su po njezbožu zawrěli. Wšitke wotlěty a přizemjenja na lětanišću su přetorhnyli. Hłowna hala wostanje pak dale přistupna. W běhu dnja informuja zamołwići zjawnosć wo nadrobnosćach.
Na internetnych platformach namakaš widejo, na kotrymž widźiš nócnu zražku w powětře z wulkim wohenjom. Hač so woprawdźe wo potrjechene lětadło jedna, njeje jasne. Wotkal je helikopter přišoł, tohorunja njewědźa.
Scholz: Zasada ranjena
Wothłosowanje zwjazkoweho sejma wo migraciji zbudźa diskusiju
Berlin (dpa/SN). Zwjazkowy kancler Olaf Scholz (SPD) je wot CDU/CSU, AfD a FDP zhromadnje wobzamknjeny naćisk za přiwótřenje migraciskeje politiki jako „złamanje tabuwa“ wopisował. 29. januar je „najskerje jara wuznamny dźeń w stawiznach zwjazkoweje republiki Němskeje“ był, rjekny Scholz wčera wječor w sćelaku ARD. Unija je po słowach Scholza zasadu raniła, kotraž je mjez demokratami w Němskej knježiła. „Mjenujcy konsens, zo njeje žanoho zhromadneho dźěła demokratiskich stron z ekstremnymi prawicarjemi. Dźensa pak je so tole stało“, wón zwurazni.
Zwjazkowy sejm bě do toho z wjetšinu hłosow naćiskej přihłosował, kotryž zmóžnja wotpokazanje za azylom pytacych při mjezach Němskeje. Naćiskej CDU/CSU je tež frakcija AfD přihłosowała. Zeleni, BSW a Lěwica jón wotpokazachu. Naćisk njeje zawjazowacy.
Dobre wuhlady?
Łobjo zaso wužiwajomne
Drježdźany (dpa/SN). Łódźe smědźa Łobjo w Sakskej wot přichodneje póndźele zaso bjez zadźěwkow wužiwać. Jězbna čara, kotruž su zawrěli, po tym zo je so před štyrjomi měsacami Carolinowy most sypnył, je zaso swobodna. „Hač do 17. februara pak dyrbja so łódźe za to přizjewić“, rjekny Karsten Wild Drježdźanskeho zarjada za wodowe dróhi a łódźnistwo. Po tym njeje přizjewjenje wjace trěbne. Łódźe smědźa pak kaž při ampli stajnje jenož do jedneho směra jězdźić.
Parniki Běłeje floty maja wuwzaćne rjadowanje. Předwčerawšim, štwórtk, je wulětniska łódź August sylny jako prěnja swojeho razu pod mostom jěła. Jej sćěhowachu štyri historiske parniki bjez pasažěrow. Wšitke łódźe běchu po puću do łódźnicy, zo bychu je tam na nowu sezonu přihotowali.
Zapadny dźěl Carolinoweho mosta bě so w nocy na 11. september 2024 njewočakowano na něhdźe sto metrow zwjezł a do Łobja padnył. Wot toho časa je tež zbywacy dźěl mosta zawrjeny a wobchad łódźow bě přetorhnjeny. To bě za susodnu Čěsku wulki problem, dokelž je Łobjo jenički zwisk po wodźe do Hamburga.
