Wuběrk: Sylnišo z Pólskej dźěłać!
Berlin (dpa/SN). Wuběrk němskeho hospodarstwa za wuchodne naležnosće žada sej wot zwjazkoweho knježerstwa sylniše zasadźenje za hospodarsku kooperaciju z Pólskej. „Zhromadne dźěło mjez Berlinom a z wotstawkom najsylnišim wuchodnym wikowanskim partnerom Pólskej dyrbi nowu kwalitu docpěć“, rjekny předsydka wuběrka Catharina Claas-Mühlhäuser w Berlinje.
Z wikowanskim wobjimom nimale 172 miliardow eurow bě Pólska 2024 znowa pjaty najwjetši wikowanski partner zwjazkoweje republiki. Jako wiki za němske twory je Pólska Chinu ze štwórteho městna wutłóčiła, z datow Zwjazkoweho statistiskeho zarjada wuchadźa. „Dyrbimy Pólsku jako hospodarski sylny kraj bóle na wědomje brać, předsydka wuběra rjekny. Je to jedne z čłonskich krajow EU z raznje wuwiwacym so hospodarstwom. Pólska budźe tež wažny kraj we wobłuku europskich napinanjow při nowonatwarje Ukrainy, je sej Claas-Mühlhäuser wěsta. Přichodne zwjazkowe knježerstwo dyrbjało kóždolětne němsko-pólske knježerstwowe konsultacije na hospodarski wobłuk rozšěrić.
Dźesać ludźi morił
To a tamne (12.02.25)
Kedźbliwy pěšk je w přijimarni hódnotnych maćiznow w hornjej Bayerskej panteroweho chameleona ze styroporoweje tyzy wuchował. Zwěrjo z mjenom Lucifer běchu prawdźepodobnje strowotnych problemow dla wusadźili, fachowcy stacije za reptilije měnja. Muž bě škrabanje w tyzy słyšał a na kóčku tukał. Na to wuhladachu chameleona. Zwěrjo dyrbi nětko do karanteny. Wobsedźerjej hrozy pokuta ranjenja zakonja za škit zwěrjatow dla.
Wot junija minjeneho lěta w swětnišćowej staciji ISS čakacaj astronawtaj móžetaj so nětko snano tola prjedy na zemju wróćić hač myslene. NASA, swětnišćowy zarjada USA, je rozsudźił, zo bjeru za nawrót hižo raz wužiwanu kapslu typa „Dragon“. Poprawom chcychu čakać, doniž njeje nowa kapsla dotwarjena. To pak móhło trać. Trjebany nastroj steji porno tomu hižo w měrcu k dispoziciji.
Ekstremisća „na straži“ byli
Budyšin (SN). Prawidłowna póndźelniša manifestacija w Budyšinje, kotraž so „napominanska straža“ mjenuje, bě tež tema w njedawno wozjewjenej rozprawje krajneho zarjada za škit wustawy za december 2024. Zarjad, kotryž podsteji nutřkownemu ministerstwu Sakskeje, je drje tež dwustotu „napominansku stražu“, kiž wotmě so loni 9. decembra, jako „njeekstremistisku“ pohódnoćił. Zarjad pak starosći, zo je so 70 přiwisnikow „subkulturelneje prawicarskoekstremistiskeje sceny“ wosebje z Budyšina a Lubija na zarjadowanju wobdźěliło. Ći běchu w předpolu ze swójskej namołwu za termin wabili, běchu so čornu drastu woblekli a tworjachu swójski blok za transparentom „ReMigration – Heimatliebe ist kein Verbrechen“.
K skupinje słušeštaj tež hudźbnikaj Proto a Runa wot labela NDS Records, kotryž Wikipedija jako „wočiwidny naci-rap“ pohódnoća. Tež tónraz bě předsyda sakskeje AfD Jörg Urban mjez rěčnikami napominanskeje straže. Wón měrješe so na „wójnskich škarakow w Berlinje“ a praješe: „Miliony młodych syriskich muži móža domoj hić a swój kraj zaso natwarić.“
Wjace pjenjez za zakitowanje
Brüssel (dpa/SN). Přichodne zwjazkowe knježerstwo drje dyrbi po najnowšich planach NATO wo wjele wjace pjenjez za zakitowanje zaplanować hač dotal. Kaž powěsćernja dpa z kruhow aliancy zhoni, žadaja sej zaměrowe směrnicy NATO po tuchwilnych wobličenjach kóždolětne wudawki 3,6 procentow nutřkokrajneho bruttoprodukta. Němska planuje dwaj procentaj. Přidatne wudawki wučinjeja 20 miliardow eurow.
„Groko“ najwoblubowaniša
Berlin (dpa/SN). Koalicija CDU/CSU a SPD je dale najwoblubowaniša opcija za nowe knježerstwo po wólbach zwjazkoweho sejma. Tole je wuslědk woprašowanja instituta Forsa w nadawku sćelaka RTL. Ze 43 procentami steji tak mjenowana „groko“ na prěnim městnje mjez wolerjemi. Slěduje koalicija CDU/CSU a Zelenych (22 procentow) před koaliciju CDU/CSU a AfD (17 procentow). Tajki zwjazk pak kanclerski kandidat unije Friedrich Merz wuzamkuje. Koaliciju unije a Zelenych šef CSU Markus Söder wotpokazuje.
Ćěła migrantow našli
Při busowym njezbožu w Guatemali je znajmjeńša 51 ludźi žiwjenje ...
Wotehnaćedale zakazane
Berlin (dpa/SN). Naćisk zakonja k legalizowanju wotehnaća w prěnich dwanaće tydźenjach samodruhosće je zwrěšćił. Prawniski wuběrk zwjazkoweho sejma je rozsudźił, zo žane wothłosowanje wo wotpowědnym naćisku zakonja w zwjazkowym sejmje njezmóžni. K tomu by wurjadne posedźenje wuběrka trěbne było. Dokelž pak so CDU/CSU a FDP tomu spjećuja, so žana wjetšina njenamaka.
Zastupnicy SPD a Zelenych, kotřiž běchu naćisk nastorčili, běchu přesłapjeni. Loni nazymu bě 328 zapósłancow zwjazkoweho sejma tak mjenowanu skupinsku próstwu zapodało. Z njej chcychu wotehnaće w prěnich dwanaće tydźenjach legalizować. Dotal je wotehnaće w Němskeje zasadnje zakazane.
Kijew hotuje so na rozmołwy
Trump hrozy Hamas zastajencow dla
Washington (dpa/SN). Po tym zo bu proces pušćenja israelskich zastajencow z rukow Hamas přetorhnjeny, je prezident USA Donald Trump islamistam ultimatum stajił. Wón wupraji so za to, mjez Israelom a palestinskej terorowej organizaciju wujednany přiměr wupowědźić, jelizo hač do soboty připołdnja wšitkich zastajencow njepušća. Hewak „hela wudyri“, hrožeše Trump we Washingtonje. Nimo toho hrozy wón Jordaniskej a Egyptowskej, wažnymaj zwjazkarjomaj USA na Bliskim wuchodźe, z financnymi konsekwencami, jeli so jeho planam nastupajo Gazaske pasmo dale spjećujetej.
Hamas bě sobotu planowane pušćenje israelskich zastajencow na njewěsty čas přestorčiła. Rěčnik Hamas Israelej wumjetowaše, zo dojednany přiměr njedodźerži. Tak a tak słaby přiměr je nětko hišće bóle wohroženy. Israelski zakitowanski minister Israel Katz je w Gazaskim pasmje stejacym jednotkam wójska najwyši alarmowy hotowostny schodźenk přikazał. Kotre konsekwency ma Hamas wočakować, Trump njepřeradźi.
Merz nochce so zamołwić
Poslednje posedźenje zwjazkoweho sejma do wólbow
Berlin (dpa/SN). Dwaj tydźenjej do wólbow zwjazkoweho sejma je dźensa w parlamenće Němskeje k poslednjemu rozestajenju mjez knježerstwom a opoziciju dóšło. Přičina bě tak mjenowana dojednana debata, potajkim diskusija, wo kotrejž su so frakcije dorěčeli, zo chcedźa politiske połoženje w Němskej wobswětlić. Na diskusiji staj so tež zwjazkowy kancler Olaf Scholz (SPD) a kanclerski kandidat CDU/CSU Friedrich Merz wobdźěliłoj. Hłowne temy wjacorych rěčnikow běchu migracija, hospodarstwo a socialne połoženje w Němskej.
Předsyda CDU Friedrich Merz je wčera hišće raz potwjerdźił, zo nima žanu přičinu, so wo toho distancować, zo je při wothłosowanju wo migraciskej politice hłosy AfD akceptował. „Nimam scyła žanu přičinu, něšto relatiwizować, wróćo wzać abo so zamołwić“, rjekny předsyda frakcije CDU/CSU do posedźenja zapósłancow tuteju stron w Berlinje.
