Zo je „módra strona“ pola najmłódšich wolerjow tuchwilu najsylniša, ma wjele z tym činić, zo so woni prěnjotnje w socialnych syćach interneta wo politice informuja. A tam pěstuja najwušiknišo populisća swoju politisku komunikaciju. Tohodla je zwjeselace, zo je runje wjelelětna łužiska zapósłanča Caren Lay, kotraž je na polu socialnych a serbskich naležnosćow hižo dołho jako spušćomna wojowarka připó­znata, „módru“ konkurenca přesćahnyła. Jeje najpopularniša tema – angažement přećiwo přewysokej podruži – drje ludźi we Łužicy lědma potrjechi, ale nimale wšěch młodostnych z našeho regiona, kotřiž znajmjeńša nachwilnje na wukubłanju w metropolach přebywaja. Nimo toho Caren­ Lay ze swojimi přinoškami politisku kulturu polěpšuje, dokelž demonstruje: Popularne­ rozestajenje z politiskimi pozicijemi njeje jenož bjez hidy a škaranja móžne, ale samo ze žorćikami, kiž zwuraznjeja, zo tež chutne wěcki přechutnje brać nje­trjebaš. Marcel Brauman

Perfektne slědy je młodostny w sněze zawostajił. W sakskim Altenbergu je wón policiji spěšnje pomhał njeskutk wuslědźić. Kaž Drježdźanska policajska direkcija zdźěli, bě 16lětny zawčerawšim rano zakazane symbole na sćěnje garaže zawostajił. Na městno njeskutka zwołani zastojnicy trjebachu jenož slědam w sněze sćěhować. Wone dowjedźechu jich direktnje k podhladnemu.

Hrónčko „Za dessert je přeco městno“ je nětko wědomostnje wobkrućene. Tak so bańki nerwow wo to postaraja, zo maja ludźo apetit na něšto słódke. Tak mjenowany dessertowy žołdk je tuž w mozach zakótwjeny. To su za wšitkich lubowarjow chłóšćenkow dobre powěsće.

Štwórtk, 6. małeho róžka, zwostanje nam jako čorny dźeń w pomjatku. Dóstachmy bolostnu powěsć, zo je Andreas Ošika – naš jednaćel, kolega a mnohim z nas tež přećel – 46lětny zemrěł. Dźeń do toho smy z nim hišće dźěłali, protyku za nowe lěto nadźěłali, bjesadowali … To nětko ženje wjace njebudźe. Přihotował bě so ­na sportowe wužadanje, za kotrež je tež srjedu wječor trenował. Kaž činješe tole ze zapalom a z jasnym cilom před wo­čomaj – chcyše połmarathon zmištrować –, wěnowaše so tež naležnosćam ­Serb­skeho šulskeho towarstwa, kotrehož ­jednaćel wón wot lěta 2022 běše. Běše rady a z wjeselom žiwy. To so nic na­posledk w tym jewješe, zo běše jemu dobra mjezsobnosć ludźi a z tym dobra ­atmosfera – tež při wobchadźenju z problemami – wažna. Z toho smy stajnje profitowali.

Prjedy hač je do zarjada SŠT přišoł, dźěłaše mjez druhim w Sakskim centrumje epilepsije w Radebergu, w klóštrje Marijinej hwězdźe w Pančicach-Kukowje a w Zwjazku Carity Hornja Łužica we wodźacych funkcijach.

Chrósćicy (SN/MkWj). Čłonojo Towarstwa Cyrila a Metoda su na swojej wčerawšej hłownej a wólbnej zhromadźiznje w Chrósćicach swojemu předsydstwu dowěru wuprajili a gremij zaso do zastojnstwa wuzwolili. Za předsydu katolskeho towarstwa wuzwolichu znowa Cyrila Hančika z Radworja.

W swojej narěči w nic runjewon wutepjenej wosadnej žurli móžeše 47lětny předsyda TCM na cyły rjad aktiwitow pokazać, kotrež su skutkowanje cyłka loni charakterizowali. Tak su w Radworju znowa wopomnjenski běh na česć zbóžneho martrarja Alojsa Andrickeho z wulkej ličbu wobdźělnikow přewjedli. Nimo toho su wjelelětneho předsydu towarstwa Jakuba Skalu składnostnje toho 100. posmjertnin wopominali. Sobu najwažniši nadawk je wudawanje tydźenika Katolski Posoł, štož je so najebać nowe financne problemy znowa poradźiło.