Dopominaće so hišće, zo je UNESCO połobskemu dołej w Drježdźanach status jako swětowe herbstwo sćazała? Přičina běše twar mosta při lěsnym hrodźiku. Zo je rozsud UNESCO sakskej stolicy relewantnje zeškodźał, nichtó njetwjerdźi. Naše swjedźenje a nałožki resp. wobrjady su wuraz serbskeho žiwjenja, kaž Bjarnat Cyž pjatk na posedźenju zwjazkoweho předsydstwa Domowiny wobkrući. Tohodla je derje, zo su na lisćinje imaterielneho kulturneho herbstwa Němskeje zapisane. Hač, hdy a kak požadanje wo městno na lisćinje ­dale sćěhuje, pak njech so najprjedy woměrje dodiskutuje, to ma Jan Bělk cyle prawje. Zawěsće so jenož Damian Dyrlich nje­praša, hač dyrbjeli swoje nałožki „přiměrić“, zo bychu na wonu lisćinu dóšli a što to nam přinjese. Abo je jenož prašenje, kak wjerški našeho žiwjenja wušiknišo „předamy“? Wo tym měli wěcownišo a měrnišo diskutować hač něhdy komunalni a krajni politikarjo wo Drježdźanskim swětowym herbstwje. Marcel Brauman

Sławny British Museum w Londonje wostanje po nadpadźe bywšeho sobudźěłaćerja z wulkeho dźěla zawrjeny. Hdy budźe dom zjawnosći zaso přistupny, njemóžeše rěčnik muzeja medijam hišće rjec. Sobotu běchu zdźělili, zo je so bywši technikar do muzeja zadobył a tam wjacore systemy wotšaltował. Policija wobkrući, zo su wěstotne a digitalne syće muzeja wobškodźene. Technikarja su zajeli.

Na wotpadkowu deponiju je rjedźerka w Italskej staru matracu dowjezła, w kotrejž so pjenjezy a debjenki w hódnoće 50 000 eurow chowachu. Rentnarka bě tam pjenjezy, swójbne debjenki a kreditne karty za špatne časy składowała. Zo bě matraca preč, žona hakle někotre hodźiny pozdźišo zwěsći. Zhromadnje z policiju a dźowku dojědźechu na deponiju, hdźež matracu po něšto času namakachu: Pjenjezy, debjenki a karty tam hišće běchu.

Spěšnje roznjese so wutoru rano powěsć, zo je daloko znaty Konječan Jan Šołta w kruhu swójbnych w Drježdźanskej chorowni zemrěł. Wón bu 83 lět a bě čas ­žiwjenja z ratarstwom, pčołarstwom a serbskim spěwom zwjazany.

9. hodownika 1941 narodźi so Jan Šołta serbskej ratarskej swójbje w Salowje. Nan bě we wójnje padnył a tak je so njeboćički hižo za šulski čas z ratarskim dźěłom ze­znajomił. 16 hektarow wulke swójbne ­ratarstwo dźě měješe wobhospodarjene być. Po wopyće šulow w Koćinje a Kulowje da so wón we Wojerecach na ratarskej šuli wukubłać a dźěłaše w domjacym ratarstwje. Jako pak nuzowachu mać 1959 do prodrustwa, so Jan z ćežkej wutrobu ratarskeho dźěła wzda. Na to zasłužeše sej swój wšědny chlěb we Wojerowskej twarskej uniji, po překubłanju jako powołanski šofer. Po słužbje we wójsku dźěłaše wón w Salowskej cyhelnicy hač do jeje zawrjenja 1970. Přechodnje dźěše Jan ­Šołta do lěsnistwa a přińdźe po tym do Ralbičanskeje prodrustwoweje zamkarnje a pozdźišo do zamkarnje Ralbičanskeje kormjernje swini.

Podstupim (dpa/SN). K zahajenju tarifowych jednanjow za přistajenych Zwjazka a komunow warnuja dźěłarnistwa před ćežkej krizu w zjawnej słužbje. „Tójšto ­komunow je na kromje dźěłakmanosće, přistajeni su přežadani“, rjekny předsyda dźěłarnistwa ver.di Frank Bsirske powěsćerni dpa. „Hdyž spěšnje njejednamy, hrozy kolaps.“ Hižo nětko je poł miliona městnow w zjawnej słužbje njewobsadźenych. Dźěłarnistwo žada sej mjez druhim wosom procentow wjace mzdy.

Warnuja před lutowanjom

Berlin (dpa/SN). Wjacore wulke akademije wuměłstwow warnuja před sćěhami skrótšenjow na polu kultury. „W času polarizowaneho swěta móžetej wuměłstwo a kultura towaršnostnej zhromadnosći a mjezynarodnemu wujednanju přinošować“, pisaja prezidenća šěsć němskich akademijow w zhromadnym lisće. Pozadk su lutowanske plany w mnohich kulturnych institucijach Němskeje. Je­ničce w Berlinskim kulturnym referaće chcedźa 130 milionow eurow zalutować.

Ukrainske truty Rusku trjechili