„Dary“ Pólskeje w Kijewje witali
Ministerski prezident Morawiecki skići wojersku a humanitarnu pomoc
Waršawa. W konflikće wokoło Ukrainy su w Pólskej chětro dołho wahali, kak móhli najlěpje reagować. Hižo jewjachu so přesłapjene hłosy z Kijewa, zo njejsu z Pólskeje hišće ničo dóstali. To chcyše ministerski prezident Mateusz Morawiecki na kóždy pad změnić a je susodam na swojim wopyće w ukrainskej stolicy minjenu wutoru kopicu „darow“ připowědźił. W rozmołwje zakitowanski minister Oleksij Reznikow zhoni, zo chce Pólska Ukrainje wojersku a humanitarnu pomoc skićić. Tak sćele Waršawa wšelake kalibry municije za armeju, nimo toho tanki a lětadła wotwobarace rakety a k tomu słušace raketomjety. Humanitarna podpěra wobsteji w prěnim rjedźe z medicinskeho materiala a lěkow. Pječa ma so přichodne dny 29 nakładnych awtow z mjenowanymi pomocnymi srědkami do směra na Ukrainu nastajić. Nic naposledk Morawiecki swojemu hosćićelej přilubi, zo chcyła Pólska swoje składy zemskeho płuna z Ukrainu dźělić, dyrbjał-li ruski prezident Wladimir Putin krajej na kóncu tola hišće „płunowy honač“ zawjertnyć.
W Donbasu strach najwjetši
Denys Trubeckoj rozprawja za Serbske Nowiny z ukrainskeje stolicy
Kiew. Napjatosće wokoło Ukrainy dale přiběraja. Minjenu sobotu je ruski prezident Wladimir Putin wukazał, zmóžnić socialne popłatki 720 000 ruskim staćanam w kónčinach, kotrež separatisća kontroluja. To je dalša kročel w integraciskim procesu samopostajenju ludoweju republikow Donjeck a Luhansk. Mjeztym zo swět starosćiwje na ruski wojerski manewer zhladuje, kiž ma so 10. februara zahajić, ukrainski prezident Wolodymyr Zelenskyj njepřestajnje před paniku warnuje. Britiski premierminister Boris Johnson rěčeše we wobłuku wopyta na Ukrainje předwčerašim, wutoru, wo móžnej humanitarnej katastrofje, kotraž w padźe ruskeje inwazije hrozy.
Lěpše móžnosće wukrajnikam
Marek Krawc rozprawja wo aktualnje rozjimanych temach w Čěskej
Praha. Při ludličenju lěta 2021 w Čěskej běchu zwěsćili, zo tysacy dźěći z migraciskim pozadkom do tamnišich zakładnych šulow chodźa. Wone su so w susodnym kraju narodźili, abo su ze swojimi staršimi tam zapućowali. Dokelž doma mjez swójbnymi často hinašu rěč hač čěšćinu nałožuja, ma wjetšina z nich wulke ćeže, po wuchodźenju zakładneje šule – wona traje w Čěskej wosom lět – złožić přijimanske pruwowanja za kubłanišćo wyšeho schodźenka.
W Pólskej nětko darmotne testy
Waršawa (dpa/SN). Ličba dalšich natyknjenjow z koronawirusom w Pólskej je hižo třeći dźeń za sobu nowy rekord docpěła. W běhu 24 hodźin zličichu tam strowotniske zarjady 57 659 nowych padow, kaž strowotniske ministerstwo minjeny pjatk zdźěli. To je najwjetša ličba po wudyrjenju pandemije. W samsnym času je 262 ludźi w zwisku z wirusom zemrěło. Pólska ma něhdźe 38 milionow wobydlerjow, mjenje hač połojcu telko kaž w Němskej.
Po wukazu kubłanskeho ministerstwa dyrbja we wšěch šulach kraja wot 5. lětnika zaso distancnu wučbu zarjadować. Rjadowanje ma měsac płaćić. Nimo toho je w Pólskej wotnětka móžno so darmotnje na koronawirus testować dać. Móžno je to w 64 apotekach po cyłym kraju, informowaše minister za strowotnistwo Adam Niedzielski. Opozicija reaguje z wusměšowanjom. „To njejstej ani hišće dwě apotece na milion wobydlerjow, wulkotne“, pisaše frakciski šef Wobydlerskeje platformy Borys Budka. Wón knježerstwu PiS hižo dlěši čas wumjetuje, zo so boji drastiske naprawy přećiwo wirusej wukazać, zo njeby hněw přećiwnikow šćěpjenja w swójskich rjadach zbudźiło.
180 kilometrow do Waršawy
Polacy boja so ruskeho wojerskeho nadpada na swój kraj
Waršawa. Strach před ruskej agresiju je w pólskich medijach tele dny wšo postajaca tema. Při tym njeńdźe jenož wo móžny nadpad ruskeho wójska na Ukrainu, ale tež na Pólsku. Kraj ma – štož mnozy w Němskej ani njewědźa – tež direktnu mjezu k Ruskej na sewjeru pola Kaliningrada. Hižo rysuja medije strašne wójnske scenarije: By-li Ruska Pólsku přez Běłorusku nadpadnyła, njebychu ruske tanki z bliskeho Brjesta wjace hač 180 kilometrow do Waršawy měli. Wěstotna rada susodneho kraja mjeztym prawidłownje z prezidentom Andrzejom Dudu wo połoženju wuradźuje.
Jako čłon NATO so Pólska na to spušća, zo změje w padźe nadpada podpěru zapadneho wojerskeho zwjazka. Hižo dźensa je 4 500 wojakow USA na wuchodźe kraja zaměstnjenych. W „chutnym padźe“ móhli Američenjo dalšich 8 500 wojakow ze zepěranišćow zapadneje Europy spěšnje do Pólskeje přeměstnić. Pječa su ameriscy wojacy na zasadźenje přihotowani. Nimo toho steja dalše wojerske jednotki USA w baltiskich krajach Litawskej, Letiskej a Estiskej.
W Čěskej rekord natyknjenjow
Praha (dpa/SN). Čěska je druhi dźeń za sobu rekordnu ličbu infekcijow z koronawirusom registrowała. W běhu 24 hodźin su 39 614 dalšich wobkrućenych padow zličili. K tomu přińdźe 2 459 nowoinfekcijow mjez hižo wustrowjenymi. Mjeztym je po informacijach zamołwitych w strowotniskich zarjadach wirusowa warianta omikron nimale wšitke infekcije zawinowała a dotalnu wariantu delta dospołnje wutłóčiła. Minister za strowotnistwo Vlastimil Válek z tym liči, zo žołma omikrona hišće tutón tydźeń swój wjeršk docpěje. Ličba pacientow w chorownjach je snadnje na 1 781 přiběrała. Wulkeho nawala dla dyrbja ludźo z městnami tři dny na PCR-test čakać.
Čěski dom zapósłancow chce so přichodnu wutoru k wurjadnemu posedźenju zetkać, zo bychu wo podlěšenju pandemiskeho zakonja wuradźowali. Zakoń, kotryž ma kónc februara wuběžeć, zmóžnja daloko sahace naprawy kaž zawrjenje wobchodow. Opozicija kritizuje, zo su naprawy přehnate a njedomyslene. Fachowcy na polu wustawy sej žadaja, pandemiske połoženje časowje wobmjezować.
Bórze dojednanje?
Marek Krawc rozprawja wo aktualnje rozjimanych temach w Čěskej
Praha. Wčera registrowachu strowotniske zarjady w Čěskej z 42 073 dalšimi natyknjenjemi wospjet rekordnu ličbu wot wudyrjenja koronapandemije w lěće 2020. Tak wučinja incidencna hódnota w susodnym kraju tuchwilu 1 689. Strowotniski minister Vlastimil Válek ma spěšne wuwiće za spočatk dalšeje žołmy, kotrejež zawinowarka je nowa wirusowa warianta omikron. Po měnjenju ekspertow strowotnistwa ma žołma přichodny tydźeń ze wšědnje 80 000 nowoinfekcijemi wuwjercholić. W stolicy Praze pak je swój wjeršk hižo docpěła, tam ličba pacientow na intensiwnych stacijach mjeztym zaso spaduje.
Wot spočatka tohole tydźenja płaći w susodnym kraju za wšitkich přistajenych w předewzaćach, tež za trójce šćěpjenych, winowatosć, so tydźensce znajmjeńša dwójce na koronawirus testować dać. Tale naprawa ma pak za šćěpjenych jenož tři tydźenje płaćiwa być. Po woli čěskeho knježerstwa móhli runje wotchorjenych na čas jednoho měsaca wot winowatosće testowanja wuswobodźić. Nowe postajenje móhło 31. januara płaćiwosće nabyć.
„Nichtó na nas njesłucha“
Dale přiběrace koronainfekcije w Pólskej – medicinska rada rozpušćena
Waršawa. Rada lěkarskich fachowcow, kotraž pólske knježerstwo w boju přećiwo koronawirusej poradźuje, je faktisce rozpušćena. Z cyłkownje 17 čłonow je 13 gremij wopušćiło. Hłownu přičinu rezignacije je jedyn z nich w jeničkej sadźe zjał: „Nichtó na nas njesłucha“.
Jedyn z najpopularnišich zastupnikow rady, Wrócławski lěkar, prof. Krzysztof Simon, w rozmołwje z nowinarjemi zwěsći, zo nima dźěło komisije hižo žanoho zmysła. Wón ma zaćišć, zo knježerstwo poručenja medicinskeje rady drje na wědomje bjerje, ale so po nich nima, wosebje šćěpjenje pře koronu nastupajo. Skerje nawopak! W sejmje je sylny blok zapósłancow, kotřiž cyle zjawnje přećiwo šćěpjenju wustupuja, bjez toho zo by so knježerstwo jim spjećowało. Tak móžeše šulska radźićelka Barbara Nowak, wažna politikarka na polu kubłanja, zjawnje rjec, zo ma šćěpjenje „za wulki eksperiment na ludźoch“. Prof. Simon je sej wěsty, zo by sylny signal był, bychu-li so čłonojo knježerstwa a wšitcy zapósłancy sejma a senata přećiwo wirusej šćěpić dali.
Wulkopósłanc zaso doma
Waršawa (JBR/SN). Pólsko-čěske poćahi minjeny čas jara špatne wupadaja. Nowy wulkopósłanc w Praze Mirosław Jasiński, hakle wot decembra w zastojnstwje, je nadobo dźěło zhubił a dyrbi zaso wróćo do Waršawy. W njedawnym interviewje za internetny portal Deutsche Welle bě wón rjekł, zo pólsko-čěski konflikt wokoło brunicoweje jamy Turów „arogancu a pobrachowacu empatiju“ pólskeho knježerstwa wuskutkuje. Tamniši ministerski prezident Mateusz Morawiecki komentowaše jeho wuprajenje jako „skandalozne“. Wón twjerdźi, zo dyrbi wulkopósłanc loyalny być a ma měnjenje knježerstwa prezentować a ničo druhe.
Dale dźěłaca brunicowa jama Turów blisko čěskeje mjezy tamnišim wobydlerjam spochi dnownu wodu „kradnje“. Dokelž běchu Češa tři lěta spytali – bjez wuspěcha – z Pólskej so dorozumić, su loni skónčnje na Europskim sudnistwje w Luxemburgu skoržili. A te bě skónčnje na dobro Čěskeje rozsudźiło: Pólska ma jamu zawrěć abo wšědnje 500 000 eurow pokuty płaćić. Jeje knježerstwo pak wobstawa dale na swojim skostnjenym stejišću: Njezawrjemy a njezapłaćimy.
Vakcína – čěske słowo lěta 2021
Marek Krawc rozprawja wo aktualnje rozjimanych temach w Čěskej
Praha. Koronapandemija njeje jenož dominowaca tema w čěskich medijach, ale wotbłyšćuje so tež we wubědźowanju wo čěske słowo lěta 2021. Čitarki a čitarjo dźenika Lidové noviny rozsudźichu so w elektroniskim naprašowanju za słowo vakcína – šćěpiwo. Kónc lěta 2020 započachu so Češa koronje ze šćěpjenjom wobarać. Horco požadane medicinske srědki pak stajnje měnjacych so wirusowych wariantow dla wočakowanjam mnohich ludźi spočatnje njewotpowědowachu.
