Praha (dpa/SN). Tysacy ludźi su minjeny kónc tydźenja w Čěskej přećiwo naprawam w zwisku z koronawirusom demonstrowali. W Praze je předwčerawšim njedźelu něhdźe 4 000 wobdźělnikow winowatostne šćěpjenje pře koronawirus wotpokazało. Na transparentach stejachu hesła kaž „Njejsmy zwólniwi k eksperimentam“ abo „Chcemy dialog“. Hižo sobotu bě so něhdźe 2 000 ludźi w druhim najwjetšim měsće Brnje k protest­nemu zarjadowanju zhromadźiło.

Bywše knježerstwo ministerskeho pre­ziden­ta Andreja Babiša bě winowatostne šćěpjenje přećiwo koronawirusej za wšitkich wobydlerjow nad 60 lětami a za wšelake powołanske skupiny wobzamknyło. Zakoń ma wot měrca płaćić. Nowe liberalno-konserwatiwne knježerstwo pod ministerskim prezidentom Petrom Fialu njeje hišće rozsudźiło, hač zakoń přesadźi abo hač winowatostne šćěpjenje zaso wotstroni. W Čěskej su po in­formacijach strowotniskeho zarjada Europ­skeje unije 62,4 procenty wšeho woby­dlerstwa dospołnje pře koronu šćěpjene. To je mjenje hač w přerězku EU. Incidenca natyknjenjow wučinja 431.

Praha (dpa/SN). Čěska skrótši dobu domjaceje karanteny po pozitiwnym tesće na koronawirus wot 14 na pjeć dnjow. To je liberalno-konserwatiwne knježerstwo w Praze wobzamknyło. Hladajo na spěšne rozšěrjenje warianty omikron je wažne, zo so stat a strowotniski system njesypnjetej, rjekny minister za strowotnistwo Vlastimil Válek. Dobu karanteny za kontaktne wosoby natyknjenych wobmjezuja na pjeć dnjow.

Knježerstwo je nimo toho wobzamknyło, masowe testy na koronawirus rozšěrić. Wot 17. januara dyrbja wšitcy při­stajeni w předewzaćach a přistajeni stata winowatostnje dwójce wob tydźeń spěšnotest přewjesć. Nowe je, zo dyrbja so tež šćěpjeni a boosterowani testować dać. W Čěskej wučinja sydom dnjowska incidenca tuchwilu 368 nowych infekcijow na 100 000 wobydlerjow.

Něhdźe 3 000 přistajenych stata je protestny list přećiwo planowanemu winowatostnemu šćěpjenju w jich powołanskich skupinach podpisało. Mjez nimi su wojacy, policisća, wohnjowi wobornicy a sanitetarjo. Woni liča z wulkej žołmu wupowědźenjow, štož móhło stat wohrozyć.

Praha (dpa/SN). Nowy čěski ministerski prezident Petr Fiala je w swojej prěnjej nowolětnej narěči před jednym z „najwobćežnišich a najćešich lět“ w młódšich stawiznach kraja warnował. Jako wohroženja mjenowaše 57lětny minjenu sobotu płaćizny energije, inflaciju a koronapandemiju. Wón namołwješe swojich krajanow k jednoće a zhromadnosći.

W Čěskej knježi wot najnowšeho koalicija pjeć liberalnych a konserwatiwnych stron. Fiala narěča tež prezidentstwo Rady­ EU, kotrež Čěska w druhej połojcy lěta wot Francoskeje přewozmje. „Wjacore měsacy budźemy sylnišo słyšeć a widźeć, naše měnjenje změje wjetšu wahu“, rjekny předsyda Demokratiskeje wobydlerskeje strony. Jeho kabinet je tuchwilu při tym, „w poslednjej mjeńšinje“ financowanje zaručić a wotpowědny program zdźěłać. Knježerstwu swojeho předchadnika Andreja Babiša Fiala wumjetuje, zo je zadołženje stata dale masiwnje powjetšiło. Mjeztym je Babiš připowědźił, zo chcył z bydlenskim mobilom po kraju pućować a so „k ludźom“ podać. Nowiny na to tukaja, zo hotuje so wón na prezidentske wólby 2023.