Marek Krawc rozprawja wo aktualnje rozjimanych temach w Čěskej

Praha. Bórzomny nawrót wulkopósłanca Jewhena Perebyjnisa do Ukrainy je wjetšinu načolnych politikarjow přesłapił, štož su někotři z nich kónc tydźenja w telewizijnej debaće zwuraznili. Sobotu bě ukrainske ministerstwo za wonkowne naležnosće wozjewiło, zo je Wolodymyr Zelenskyj swojich najwyšich diplomatow z Němskeje, Madźarskeje, Norwegskeje, Indiskeje a Čěskeje wotwołał. Po słowach rěčnika ukrainskeho wulkopósłanstwa w Praze bě personalna změna hižo dawno planowana. Wšako skutkuje Perebyjnis mjeztym wjace hač pjeć lět w swojim zastojnstwje – normalne su štyri lěta. ­Šefowy diplomat je hižo w 1990tych ­lětach we wulkopósłanstwje w čěskej ­stolicy dźěłał, 2017 sta so z ukrainskim wulkopósłancom. Wón rěči běžnje čěsce a maja jeho za wulkotneho znajerja ­stawiznow a kultury ­susodneho kraja. Ministerski prezident Petr Fiala je kónc tydźenja zhromadnje z Janom Liptavskim, ministrom za wonkowne naležnosće Perebyjnisowy nawrót wobžarował.

Praha (dpa/SN). Čłonske staty EU su po spočatku ruskeho nadpada na Ukrainu luksusowe łódźe, imobilije a druhe zamóženstwa w hódnoće 13,8 miliardow eurow blokowali. Wot sankcijow potrjecheni oligarchojo a organizacije nimaja tuž na to žadyn přistup wjace. Tole je justicny komisar EU Didier Reynders wčera na kromje konferency EU w Praze zdźělił. Runočasnje wón kritizowaše, zo pochadźa najwjetši dźěl sumy – wjace hač dwanaće miliardow eurow – z runje pjeć čłonskich statow EU. Druhe kraje chcył wón hišće přeswědčić, to runje tak sčinić, rjekny Belgičan. Kotre kraje su wosebje wjele zamóženja blokowali, wón njepřeradźi. Europska unija bě spočatk Ruskeje wójny přećiwo Ukrainje cyły rjad ruskich oligarchow na sankcisku lisćinu zapisała, dokelž jim wumjetuje, zo wójnu podpěruja. Spočatk měrca su wosebitu komisiju EU załožili, kotraž ma so wo lěpše zhromadne dźěło krajow EU postarać a zamóženje oligarchow wuslědźić. Kónc meje namjetowaše komisija EU razniše naprawy přećiwo tym, kotřiž spytaja, chłostanske naprawy wobeńć. Jich zamóženja chcedźa potom dospołnje sćazać.

Praha (dpa/SN). Hladajo na starosće móžneho dospołneho přetorhnjenja dodawanja ruskeho zemskeho płuna dla planujetej Němska a Čěska zhromadne solidaritne zrěčenje za zemski płun. Zwjazkowy hospodarski minister Robert Habeck (Zeleni) a čěski minister za industriju a wikowanje Jozef Sikela staj wčera w Praze wotpowědne wotpohladowe zrěčenje podpisałoj. „Pomhamoj sej mjez sobu ze zemskim płunom a chcemy to tež z Němskeje na dobro Čěskeje činić“, rjekny Habeck wo kooperaciji we wobłuku Europy. Čěska je nimale dospołnje wot ruskeho płunoweho importa wotwisna.

Na prašenje, hač budźe płunowód Nord Stream I po 21. juliju zaso aktiwizowany, rjekny Habeck, zo ma wšitko za móžne. Hač do toho přewjeduja tam po oficialnych informacijach porjedźenske a hladanske dźěła. „Nadźijamy so najlěpšeho a přihotujemy so na to najhórše“. Jeho kolega Sikela rozprawješe, zo chce so Čěska na terminalu za židki zemski płun w Nižozemskej wobdźělić.

W susodnym kraju wjeršk NATO rozdźělnje hódnoćeny

Waršawa. Wjerškowe zetkanje NATO w španiskej stolicy Madridźe a jeho wuslědki zbudźeja w pólskich medijach rozdźělne reakcije. Předewšěm knježerstwu přichilene medije rěča wo wulkim wuspěchu. Tak piše konserwatiwny tydźenik Do Rzeczy wo „historiskim wjeršku“. Wšako su tam mjez druhim wobzamknyli, wojakow USA přichodnje w Pólskej trajnje zaměstnić, zo móhli kraj při móžnym nadpadźe Ruskeje zakitować. Tuchwilu je w Pólskej 10 000 ameriskich wojakow, kotrychž po komplikowanym systemje prawidłownje wuměnjeja. Přichodnje ma njedaloko Poznanja 5. ameriski korps wobstajnje prezentny być, ­ličbu oficěrow USA wot tuchwilu 200 na 700 powjetša.

Tež iniciatiwu NATO, wutworić při­datnu bojowu jednotku 300 000 wojakow za pad wójny, sej Do Rzeczy jara waži. To samsne płaći za wotpohlad, Finsku a Šwedsku do NATO přiwzać. Prezident Andrzej Duda ma to za wažny element zawěsćenja zapadneje wojerskeje aliancy na sewjeru Pólskeje. Na wobrazu je widźeć, kak so Duda njedaloko prezidenta USA Joewa Bidena hordźe prezentuje.