Drježdźany (SN/JaW). Sakska kubłanska agentura (SAB) poskića ze swojimi regionalnymi wotnožkami wot dźensnišeho wšitkim požadarjam wo wučerske městno w Sakskej nowy serwis. We wšěch wotnožkach maja wot dźensnišeho serwisowu hotline, piše sakske ministerstwo za kultus w nowinskej zdźělence. „Tam poradźuja fachowcy SAB zajimcow w prašenjach k požadanju a přistajenju w sakskim šulstwje kaž tež wo zwoprawdźenju paketa wučerskich naprawow“, kaž z ministerstwa rěka. Telefoniske poradźowanje poskićeja w Budyskej wotnožce kubłanskeje agentury pod čisłom 0160/984 77 525 stajnje wot póndźele do pjatka wot 8 do 17 hodź. Kaž kultusowe ministerstwo dale zdźěla, móža zajimcy za wučerstwo swoje prašenja k požadanju a paketej wučerskich naprawow tež pod e-mailowej adresu wotbyć.
Ministerstwo kroči njewšědny puć, zo by wo wučerjow wabiło. Bě dźě so wjele mjenje zajimcow přizjewiło, hač su k zaručenju wučby na šulach trěbni.
Chrósćicy (SN/BŠe). „W kraju wjesołych dźěći“ bě hesło sobotneho popołdnišeho programa na Chróšćanskim Krawčikec dworje. Najmłódši sobuskutkowacy folklorneho festiwala wjedźechu přihladowarjow do wosebiteho paradiza, tworjo skónčnje pisany kwěćel dźěćaceje zabawy. Program zahajił bě dorost Smjerdźečanskeje rejwanskeje skupiny. Delnjoserbski dźěćacy a młodźinski ansambl přednjese skerje cunje zynki. Tři rejwarki z Delnjeje Łužicy pak překwapichu z modernym breakdancom.
Zrudźaca powěsć so po Łužicy rozšěrja, zo je angažowana serbska wučerka Christa Elina 68lětna 11. junija w Choćebuzu nahle zemrěła.
Dopominam so na kónc awgusta 1974. Jako nowačcy 9. lětnika tehdyšeje Choćebuskeje Serbskeje rozšěrjeneje wyšeje šule „Marjana Domaškojc“ smy so w přihotowanskim tydźenju ze serbšćinu, delnjoserbšćinu, zeznajomili. Jazyk so ćežko wjerćeše. A z dźensnišeho wida tak jednore słowo kaž „njeźela“ prawje wurjekować bě žno wuspěch. Christa Elina pak nas zas a zaso pohonješe. A to bě zasada jeje skutkowanja jako wučerka serbšćiny: Na zaměrne, ale přećelne wašnje swoju maćeršćinu sposrědkować. Naš lětnik njebě prěni, w kotrymž młoda wučerka za serbšćinu a rušćinu wuwučowaše. Naša rjadownja pak běše prěnja, za kotruž bě Christa, kaž ju pozdźišo mjenowachmy, zamołwita jako rjadowniska wučerka. Styki přez lěta njepopušćichu, wostachu wuske. Słušachmy hromadźe, skoro 39 lět dołho po abiturje.
Sakska pyta wučerjow. Kaž z kultusoweho ministerstwa rěka, móžachu dotal jenož něšto wjac hač 60 procentow planowanych 1 400 městnow za přichodne šulske lěto wobsadźić.
Budyšin (SN/JaW). „Ličba přizjewjenjow na wučerske městna je nimale we wšěch šulskich družinach za wočakowanjemi wostała. W městach móžachu najwjac wobsadźić, we wjesnych kónčinach je dotal najwjac městnow njewobsadźenych“, zdźěli sobudźěłaćerka sakskeho kultusoweho ministerstwa Bianca Schulz.
Zo chce so ze žurnalistku stać, je za Charlene Seidel z Hórnjeje Hórki hižo nětko jasne. Dokelž pak so 16lětna šulerka 10. lětnika Budyskeho Serbskeho gymnazija serbšćinu, kotruž mjeztym pjeć lět wuknje, hišće dosć njewobknježi, chcyše poprawom swój šulerski praktikum w redakciji dźenika Sächsische Zeitung wukonjeć. „Su pak mi prajili, zo tam jako praktikant skerje jenož papjeru ničiš a pódlanske wěcy činiš“, Charlene wuswětla. Pola SN pak měješe nětko tydźenjej šansu pisać. A to wona chce.
„Započach wot toho časa, zo sym w šuli, małe stawiznički pisać“, Charlene powěda. Najprjedy běchu to jenož někotre sady a mnohe wobrazy. Spočatk 7. lětnika je prěnju knižku spisała. „Ta pak so jara špatnje čitaše. Chcych přiwuknyć a so polěpšić.“ W 9. lětniku zwaži so tuž na dalši pospyt. Mjeztym je na appje „Wattpad“ 30 kapitlow wopřijacy krimi wozjewiła. A třeća kniha, thriller wokoło młodeje holcy, runje nastawa. Ideje za dalše stawiznički njepobrachuja, dohromady 60 tajkich je wona do knihi zestajała.