Na popołdnjo swójbow
Budyšin. Sobudźěłaćerjo Budyskeho Serbskeho muzeja přeprošuja na popołdnjo swójby „Ducy domoj“. Te budźe njedźelu, 21. januara, wot 15 hodź. Wobdźělnicy móža tu wustajeńcu z fotografijemi Jürgena Maćija interaktiwnje zeznać. Dźěći pasla leporelo, nowolětki a maski za ptači kwas abo póstnicy. Za dorosćenych poskićuja organizatorojo w tym času kuratorske wjedźenje z Jürgenom Maćijom a Alexandrom Pólkom. Jeli sněh hišće leži, twarja wšitcy zhromadnje sněhoweho muža abo sněhowu žonu. Twarcy najrjeńšeho eksemplara dóstanu myto. Za wšitkich je přikusk přihotowany.
Pinocchio je po puću
Budyšin. W Budyskim dźiwadle pokazaja sobotu, 20. januara, w 17 hodź. přidatnje inscenaciju PINOCCHIO. Carlo Collodis je ze swojej stawiznu wo starcu Gepetto ze swojej žiwej drjewjanej klanku literarnu twórbu napisał, kotraž je do dźensnišeho jara woblubowana. Inscenacija je napjata a pohonjuje swójsku fantaziju. Dźiwadłownicy poručeja hru za dźěći w starobje wot šěsć lět.
Hnujace spěwy wo žiwjenju
Dźěłowy kruh so zetka
Budyšin. Prěni króć w tutym lěće schadźuje so dźěłowy kruh za serbske naležnosće města Budyšin, a to 24. januara, w 17 hodź., na žurli radnicy. Mjez druhim chcedźa čłonojo wo serbskich poskitkach w pěstowarni wuradźować. Dale póńdźe wo koncept, serbsku rěč w zjawnym rumje bóle widźomnu sčinić. Tež Wjacławske wiki maja tema wuradźowanja być. Na zeńdźenje su wšitcy zajimcy witani.
Do kina w Kamjentnym domje
Budyšin. Kino w Budyskim Kamjentnym domje w Budyšinje pokaza dźensa wječor w 20 hodź. sfilmowany roman „Ein ganzes Leben“. Hłownej hrajerjej staj Stefan Gorski a Julia Franz Richter. Starc wysokeje staroby zhladuje wróćo na wosom lětdźesatki swojeho žiwjenja, w kotrymž njeje runjewon lochki dóńt měł. Wot 19 hodź. móža sej zajimcy do kina dóńć a so při barje Kamjentneho domu na film nastajić a sej pobjesadować.
Předstaji film wo přesydlenju
Na čitanje do „Smolerki“
Budyšin. Smolerjec kniharnja w Budyšinje přeprošuje štwórtk, 18. januara, w 19 hodź. na čitanje. Prof. dr. Thomas Menzel, awtor knihi „Komplexität und soziolinguistische Typologie in den Flexionssystemen des Sorbischen“, předstaji tu zhromadnje ze swojej lektorku dr. Sonju Wölkowej swoju twórbu. W knize zaběra so wón z gramatiskimi wosebitosćemi hornjo- a delnjoserbskeje rěče, kotrejž zdawatej so porno druhim přiwuznym rěčam kompleksnišej być. Swoje prěnje zjawne čitanje je awtor pod hesło „Warum ist das Sorbische besonders (schwierig)?“ stajił. Kniha wuńdźe jako 71. wudaće w rjedźe Spisow serbskeho instituta w Ludowym nakładnistwje Domowina.
Zazelenerjo informuja
Budyšin. Iniciatiwa „Budyscy zazelenerjo“ informuje wo tym, zo chce srjedu, 17. januara, w Budyskim ekumeniskim tachantskim wobchodźe wo aktualnym stawje swojeho projekta „Tysac štomow za Budyšin“ rozprawjeć. Zarjadowanje započina so w 19.30 hodź. Akterojo iniciatiwy chcedźa z projektom Budyšin dźeń a bóle wozelenić a tomu zadźěwać, zo so štomy twarskich naprawow dla podrubaja.
Nowa fachowa kniha
Poslednje předstajenje
Njebjelčicy. Štóž njeje dotal hišće inscenaciju Kulowskeho Bratrowstwa „Tónkróć něšto z niwowom!“ widźał, změje njedźelu, 14. januara, w Njebjelčicach poslednju składnosć to nachwatać. Hrajerki a hrajerjo předstaja swoju komediju w 16.30 hodź. w Njebjelčanskej „Bjesadźe“. Wšitcy lubowarjo serbskeho lajskeho dźiwadła su wutrobnje přeprošeni.
Mjenje porodow
Budyšin. W lěće 2023 je so w Budyšinje 621 dźěći narodźiło. To bě mjenje hač w lětomaj do toho (2022: 740; 2021: 820). Najwoblubowaniše mjena pola holcow běchu Frieda (8), Emilia a Mia (wobě 6) kaž tež Charlotte, Emma, Lina a Lotta (stajnje 5). Pola hólcow běštaj Emil a Finn (wobaj 6) wosebje woblubowanaj, na dalšich městnach běchu Konstantin a Luca (stajnje 5) kaž tež Aaron, Anton, Leo, Lio, Louis, Milo a Oskar (stajnje 4).
Wo planowanju ćopłoty
Budyšin. Pod hesłom „Zhromadnje za na přichod wusměrjene ćopłotne planowanje“ přewjedźe Budyski měšćanski zwjazk CDU swoje prěnje lětuše zjawne stajne blido. Zarjadowanje wotměje so štwórtk, 11. januara, w 19 hodź. w Budyskej piwarni na Mannowej. Měšćanosta za twarstwo a měšćanske wuwiće Heiko Nowak chce wobdźělnikow wo aktualnym stawje ćopłotneho planowanja informować. Po tym budźe rozmołwa.
Tři skupiny hraja hardcore
Budyšin. Kapały Street Hammer, Sick Times a Slapface zahudźa sobotu, 13. januara, w Budyskim Kamjentnym domje hardcore a punk. Zastup je wot 19.30 hodź., koncert započnje so w 20.30 hodź. Lisćiki za 13 eurow w předpředani dóstanu zajimcy pod .
Wědomosć live dožiwić
Lisćiki sej zawěsćić
Mejenjo koncertuja
Radwor. Chór Meja přeprošuje na swój tradicionalny hodowny koncert sobotu, 6. januara, w 17 hodź do Radworskeho hosćenca „Meja“. Nimo chóra hudźace Radworske dźěći sobu skutkuja. A Hanka Rjelcyna recituje hodowno-zymske teksty a basnje. Přizamknje so spěwny wječor. Tež wječer budźe poskićena.
Z Čilakami spěwać
Hórki. Lubowarjo serbskeho ludoweho spěwa a cymbaloweje hudźby njech njeskomdźa spěwny wječor jutře, sobotu, wot 19 hodź. na Hórčanskim Smolic statoku. Na njón přeprošuje skupina Čilak. Z hosćom budźe skupina Cymbálová muzika Stupava z Dolnich Bojanovic na Morawje. Wottam přijědźe tohorunja pinčnik Franka, kiž poskićuje swójske wino. Zastup płaći sydom eurow. Wšitcy zajimcy su na zabawny spěwny wječor wutrobnje witani.
Wědomosć live dožiwić
