Pućujetaj po serbskej hudźbje
Budyšin. Pod hesłom „Pućowanja po hudźbnym swěće Serbow“ wuhotujetaj huslerjej Malte Hübner a Holm Birkholz sobotu, 14. decembra, w 19 hodź. koncert na žurli Budyskeho Serbskeho muzeja. W programje su „twórby klasiskich/romantiskich serbskich komponistow kaž tež jich „naslědnikow“ a swójske přinoški Hübnera, Birkholza a Petera Manfreda Wolfa.
Kantina přećehnje
Wojerecy. Kantina na Wojerowskim industrijnišću poskićuje zajutřišim posledni raz snědań a wobjed. Potom přećehnje na nowu městnosć do Łužiskeje kupjele. Wot 6. januara 2025 potom tam hłódnych hosći wita.
Sinfoniski koncert ansambla
Seniorojo škotuja
Budyšin. Posledni lětuši škotowy turněr serbskich seniorow wotměje so jutře, wutoru, w Budyskej rezidency seniorow. Tam zwěsća cyłkowneho dobyćerja lětušich měsačnych zetkanjow. Započatk budźe w 14 hodź. Prěni turněr 2025 wotměje so 28. januara w Lejnjanskim Kubicec hosćencu.
Serbski wječor w geoparku
Mały Kólsk. UNESCO-geopark Mužakowski zahork přeprošuje srjedu, 11. decembra w 17 hodź. na serbski filmowy a kulturny wječor. W historiskim ambienće Stareje cyhelnicy w Małym Kólsku (Klein Kölzig) předstaja serbske hodowne filmy kaž tež serbske pěsnje. Nimo toho podawaja organizatorojo regionalne jědźe a napoje. Dokelž je ličba wobdźělnikow wobmjezowana, proša wo přizjewjenje a to pod tel. čo. 035600 365607 abo z mejlku na . Wopytowarjo maja tež składnosć, sej aktualnu wuměłstwowu wustajeńcu w domje wobhladać.
Awtorka čita
Přednošuje wo Sawdi-Arabskej
Chrósćicach. We wobłuku 13. kulturneje zymy putniskeje hospody Chrósćicy přednošuje tam jutře, sobotu, wot 19.45 hodź. Beno Bělk wo Sawdi-Arabskej. Hač do 2019 bě Sawdi-Arabska za wukrajnych wopytowarjow kruće zawrjeny kraj. Po koronje tam hakle w lońšej nazymje zaso prěni cuzy do kraja přijědźechu. Beno Bělk je tam lětsa w januaru měsac dołho po cyłym kraju jěł. Wosebje jeho zajimowaše, kak so žonam w kraju wjedźe. Dale je wopytał Medinu a Mekku – za muslimow swjatej měsće, za njewěriwych pak wostanjetej zawrjenej. Kak je so jemu poradźiło měsće tola wopytać a što je tam dožiwił, budźe dźěl rozprawy. Hižo w 16 hodź. pokazuja za najmjeńšich dźěćace kino.
Wječork na nowym městnje
Spěwaja w dwórnišću
Awtorka signuje knihu
Wojerecy. Silke Richter signuje jutře, štwórtk, wot 15 do 17 hodź. w foyeru Wojerowskeje měšćanskeje biblioteki Brigitte Reimann swoju knihu. Wojerowčanka je swobodna awtorka mjez druhim tež za Serbske Nowiny. Nimo toho wona dźěćace powědančka pisa. Pod pseudonymom Andrea Urleben je 54lětna nětko prěnju knihu „Zwiebelkind“ wudała. Psychologiska awtobiografija wopisuje žiwjenski puć awtorki, kotraž dyrbješe znjewužiwanje, zanjechanje a samotnosć znjesć Tola skónčnje je puć k wuhonjenju namakała. W ramiku hodźiny signěrowanja móža sej zajimcy knihu kupić.
Arena sobu najwoblubowaniša
Digitalnu kompetencu nabyć
Budyšin. Towarstwo Kamjentny dom poskićuje hromadźe z Medijowej syću Łužica prawidłownje seminary, w kotrychž podawaja pomoc a pokiwy za přebytk w digitalnym swěće. Na zarjadowanjach zhonja wobdźělnicy wjace wo strachach w interneće a mjez druhim nawuknu, kak tam najlěpje wěsće ze swojimi sensibelnymi datami wobchadźeja. Přichodny seminar wotměje so štwórtk, 5. decembra, we 18 hodź. w zetkanišću na Allendowej čo. 49. Wobdźělenje je darmotne. Zajimcy njech přizjewja so telefonisce w Kamjentnym domje pod telefonowym čisłom 03591 5319972 abo z mejlku na: .
Radźićeljo wuradźuja
Worklecy. Worklečanski wjesnjanosta Clemens Poldrack přeprošuje wšitkich zajimcow na posedźenje gmejnskeje rady a to srjedu, 4. decembra, we 18.30 hodź. do rjadownje čo. 10 we Worklečanskej šuli.
Serbske mjena w Grodku
Na medijo-pedagogiski wječor
Radwor. Medijowa syć Łužica přeprošuje dźensa wječor we 18 hodź. na medijo-pedagogiski staršiski wječor pod titulom „Staršich sylnić. Dźěći škitać!“ do Radworskeho dwórnišća inkluzije. Fachowcy, mjez nimi medijowy pedagoga Michał Cyž z Budyskeho studija LUCIJA, informuja wo strategijach a metodach, kak móža so starši a dźěći najwěsćišo w digitalnym swěće pohibować. Wobdźělenje je darmotne.
Zhromadnje spěwać
Budyšin. Zwjazk serbskich spěwarskich towarstwow přeprošuje na dalše zhromadne spěwanje. Wone wotměje so jutře, 3. decembra, we 18 hodź. w chórowej rumnosći Serbskeho ludoweho ansambla. Wšitcy zajimcy su wutrobnje witani!
Porěči wo kurwjerchu
Zaswěća adwentnu pychu
Chrósćicy. Runja zašłym lětam chce Chróšćanske wjesne towarstwo Domizna hromadźe z Chróšćanami a hosćimi na předwječoru prěnjeho adwenta adwentnu pychu na nawsy zaswěćić. Tak to jutře, sobotu, wot 17 hodź. při dujerskej adwentnej hudźbje, horcym winje a přikusku zhromadnje činja. Zo njebychu přewjele wotpadkow nadźěłali, njech sej kóždy swójsku šalku za horce wino sobu přinjese. Na zwučene wašnje zahaji so jutře wječor tež kulturna zyma w Chróšćanskej putniskej oazy. Wot 19.45 hodź. porěči Beno Šołta ze Sernjan wo swojich dožiwjenjach w Nowoseelandskej. Dalše temy a terminy nadeńdu zajimcy na internetnej stronje pod adresu . Hižo wot 18 hodź. putniska mać Monika Gerdesowa dźěćom serbsku bajku baje.
Dźěćetko wužohnuja
Slepo. Po wsach Slepjanskeje wosady budźe lětsa znowa dźěćetko ze swojimaj přewodźerkomaj po puću. Wužohnować budźe je na Božej słužbje zajutřišim, njedźelu, w 9.30 hodź. superintendent na wuměnku Jan Malink. Prěnja stacija dźěćetka budźe samsny dźeń serbske wosadne popołdnjo na Slepjanskej farje.
Adwentne wiki w Njebjelčicach
Na wobydlersku rěčnu hodźinu
Kamjenc. Zapósłanča krajneho sejma Elaine Jenčec přeprošuje na swoju prěnju wobydlersku rěčnu hodźinu we wólbnym wokrjesu. Póndźelu, 2. decembra, wot 15 do 17 hodź. móža wobydlerjo we wólbnym běrowje w Kamjencu na Zapadnej dróze 4 swoje naležnosće přednjesć. Zajimcy njech so rady přizjewja. Telefonisce pod čo. 03578 305383 wot póndźele do pjatka w času wot 8 do 14 hodź. abo z mejlku na .
Změna wotewrjenskich časow
Budyšin. Wot 1. decembra sem wostanje Budyski krajnoradny zarjad stajnje wutoru a štwórtk w času 12 do 13 hodź. za wopytowarjow zawrjeny. 23. decembra je zarjad cyły dźeń zawrjeny. 27. a 30. decembra su lětsa wšitke zarjady inkluziwnje wobydlerskich zarjadow kaž tež wotrjada za přizjewjenje awtow a wustajenje jězbnych dowolnosćow wot 9 do 12 hodź. wotewrjene.
