Posledni dwójny koncert
Budyšin. Dołhe, rjane lěćo je nimo. Tež towarstwo „Dźěłań dźeń“ w dźěłarni na Sukelnskej 18 chce je štwórtk, 31. oktobra, wot 19 hodź. z poslednim dwójnym koncertom zakónčić. Zastup je darmotny. Zarjadowanje zahaji hudźbna skupina z Ulma I SAW DAYLIGHT ze swojej hudźbu w stilu melodic hardcore. Hudźbny cyłk je so w lěće 2011 załožił a je po cyłej Němskej po puću. Po tym chce duwo Mamba ze Zhorjelca publikum ze swojim wotměnjawym hudźbnym stilom tak mjenowaneho punch-rocka zahorić a do soburejowanja pohnuć.
Na wiki karjerow do Wojerec
Wojerecy. We Wojerowskim Łužiskim centerje wotměwaja so dźensa a jutře wot 10 do 16 hodź. druhi raz wiki karjerow, na kotrymž so dohromady 40 regionalnych dźěłodawarjow předstaja. Zajimcy namakaja tu poskitki nastupajo wukubłanske kaž tež dźěłowe městna a móža so na městnje poradźować dać. Tež poradźowanje nastupajo samostatne dźěło abo dalekubłanje poskićuja.
Ludowe spěwy w nowym płašću
Finisaža wustajeńcy w muzeju
Budyšin. Serbski muzej w Budyšinje přeprošuje njedźelu, 27. oktobra, w 15 hodź. na finisažu wosebiteje wustajeńcy „Twarski inženjer Eberhard Dučman. Mjez łužiskej drjewowej architekturu a industrielnym twarjenjom“, kotraž wěnowaše so žiwjenju a skutkowanju dotal hišće mało znatemu serbsko-němskemu twarskemu specialistej. Zhromadnje z kuratorku a dźowku inženjera dr. Betinu Kaunowej zhladuja muzejownicy w ramiku wjedźenja a přednoška hišće raz na Dučmanowe (1926–2005) wusahowace regionalne a nadregionalne wukony na polu twarstwa a pomnikoškita.
Čita z noweje kriminalki
Łaz. Spěchowanske towarstwo Zetkanišćo dom Zejlerja a Smolerja we Łazu přeprošuje wšitkich zajimcow wutrobnje na čitanje z knihi „Der Wassermann-Räuber. Ein Oberlausitzkrimi“. Serbski awtor Christian Schneider z Hrubjelčic je kriminalny roman hižo na lětušich Lipšćanskich knižnych wikach šěršemu publikumej předstajił. Nětko chce swoju twórbu tež zajimcam we Łužicy zbližić a to pjatk, 25. oktobra, we 18 hodź.
Herkuleskeule w Budyšinje
Dohlady do šulskich stawiznow
Z přirodu swoje mocy měrić
Sprjewje. Na wosebite dožiwjenje za cyłu swójbu přeprošuje přirodoškitna stacija wuchodna Hornja Łužica do hrodu w Sprjewjach a to njedźelu, 27. oktobra, wot 10 do 14 hodź. Pod hesłom „Přiroda je sylna – sy ty sylniši?“ chce mjez dźěćimi a młodźinu zahoritosć za přirodu budźić. Mjez druhim nawuknu, kak sej z přirodnych materialijow přirodny dešćowy škit natwarja, sami woheń zapala abo so bjeze šmóratka w lěsu orientuja. Dalše informacije dóstanjeće pod tel. čo. 035893 508571 abo z mejlku na .
Gmejnska rada we Worklecach
Worklecy. Wjesnjanosta gmejny Worklecy Clemens Poldrack přeprošuje wutrobnje na zhromadźiznu gmejnskeje rady, kotraž wotměje so jutře, 23. oktobra, w rjadowni čo. 10 šule „Michał Hórnik“ we Worklecach. Započatk zjawneho dźěla posedźenja je we 18.30 hodź.
Koncert w awli gymnazija
Gmejnska rada w Chrósćicach
Chrósćicy. Radźićeljo Chróšćanskeje gmejny schadźuja so štwórtk, 24. oktobra, w 19 hodź. w sydarni „Łužica“ w Chróšćanskim gmejnskim a kulturnym centrumje. Na zjawny dźěl na spočatku posedźenja su wšitcy wobydlerjo gmejny wutrobnje přeprošeni.
Na Serbski dźeń w Bukecach
Bukecy. Na lětuši Serbski dźeń w Bukecach přeprošujetej Bukečanska Bjesada a Serbske ewangelske towarstwo wšitkich zajimowanych zbliska a zdaloka a to sobotu, 26. oktobra. Dźeń zahaji so z dźěłarničku Bjesadow w ewangelskej šuli w Bukecach, na Šulskej dróze 7. w 14 hodź. z witanjom a nutrnosću. Po rěčnych zwučowanjach a konwersaciji kaž tež předstajenjom rěčnych motiwatorow projekta ZARI je zhromadna swačina. W 16 hodź. wočakuje pěstowarske a šulske dźěći kaž tež serbsce wuknjacych dorosćenych dwurěčne dźiwadło „Čmjeła Hana wočakuje wopyt“ na wosadnej žurli při farje. Zastup je darmotny. Wot 17.30 hodź. zaspěwa žónski ansambl Jarobinka, kotryž je mnohim ze swojimi pěsnjemi w filmje „Pola nas rěka wona Hanka“ znaty.
Přednošuje wo Romje
Pančicy-Kukow. Domowinska skupina Pančicy-Kukow přeprošuje swojich čłonow a wšitkich dalšich zajimcow na přichodne zarjadowanje srjedu, 23. oktobra, w 19 hodź. do awle Šule Ćišinskeho w Pančicach-Kukowje. Tam přednošuje skupinarka Bogna Korjeńkowa wo swojich dožiwjenjach w Romje. Wosebje zajimawa drje budźe jeje rozprawa wo wopyće we Vatikanje a wo jeje priwatnej awdiency pola bamža Franciskusa.
Sinfoniskej koncertaj
Wojerecy. Nowa łužiska filharmonija předstaji srjedu, 23. oktobra, swój 2. filharmoniski koncert we Wojerowskej Łužiskej hali. Pod hesłom „Seidenstraße“ zaklinča twórby Johna Adamsa, Fazila Sayja a Antona Brucknera. Nawod wukonja generalny hudźbny direktor Roman Brogli-Sacher, solist na křidle je Sheng Cai. 31. oktobra předstaji ćěleso samsny program w Budyšinje, a to na hłownym jewišću Němsko-Serbskeho ludoweho dźiwadła. Zastupne lisćiki za wobě zarjadowani su po schodźenkach na předań a płaća znajmjeńša 20 a maksimalnje 28 eurow.
Dźěłarnička w Radworju
Mlokowy swět zeznać
Koćina. Ludowa šula Wojerecy přeprošuje pjatk, 18 oktobra, na zhromadny wopyt Krabatoweho mlokoweho swěta w Koćinje. Nimo nowostkow z ratarskeho zawoda zhoni wopytowar tež to abo tamne wo Krabaće a wo historiskej wosobje Johanna Schadowitza. Po zhromadnym wobjedźe a woptawanju słódnych produktow z mlokoweho swěta dožiwi zajimc na wodźenju po zawodźe mjez druhim, kak z mloka twarožk nastanje. Zetkanje je w 10 hodź při zachodźe dwórskeho wobchoda w Koćinje čo. 2. Popłatk za wobdźělenje a wobjed wučinja 30 eurow.
Molujo so z krajinu zaběrać
Lěšće. Na hrodźe w Lěšćach (Hornow) na Šulskej 33, chce so molerka a wuměłska terapeutka Andrea Neitzel ze wšitkimi zajimowanymi na slědy Maxa Raby w dźěłarničce pod hesłom „Krajina“ podać. Mjez druhim znazorni wona zhotowjenje tempera-barby z jeja a pigmentow. Zarjadowanje wotměje so sobotu, 19. oktobra, wot 10 do 17 hodź. Popłatk za wobdźělenje, wobjed a dźěłowy material wučinja 50 eurow.
Sinfoniski koncert w Budyšinje
„Kuzłar Krabat“ w muzeju
Budyšin. Dalši prózdninski termin za dźěći wo temje „Kuzłar Krabat“ poskićuje Serbski muzej w Budyšinje štwórtk, 17. oktobra, wot 10 do 12 hodź. Mali wopytowarjo zaběraja so słuchajo a paslo ze znatej a woblubowanej serbskej bajowej postawu Krabata. Při tym zhonja, štó bě wěrna historiska wosoba.
Lěpše fota ze šmóratkom
Wojerecy. Ludowa šula we Wojerecach přeprošuje štwórtk, 17. oktobra, wot 10 do 14 hodź. zajimcow w starobje wot dźewjeć lět na dźěłarničku, w kotrejž profesionelnje ze šmóratkom fotografować nawuknu. Nimo techniskich faktow zeznaja principije kompozicije wobraza a dóstanu pokiwy za wobdźěłanje fotow. Popłatk za wobdźělenje wučinja 20 eurow.
Prózdninski molowanski kurs
Boršć. Přirodoškitna stacija Wuchodna Hornja Łužica přeprošuje małych a wulkich wuměłcow na molowanski kurs z wuměłču Gudrun Feuerriegel a to sobotu, 19. oktobra, wot 10 do 16 hodź. do wódneho młyna w Boršći na Wjesnej dróze 36. Popłatk za material wučinja 10 eurow.
Filmowy wječor
Budyšin. Přichodny filmowy wječor w Ekumeniskim tachantskim wobchodźe wotměwa so póndźelu, 21. oktobra, w 19.00 hodź. Předstaji so film „The Quiet Girl“ irskeho režisera Colma Bairéada. Filmowa drama, kotraž měješe w februaru 2022 na filmowym festiwalu w Berlinje swoju premjeru, ma krótkopowědančko spisowaćela Fostera Claira Keegana jako předłohu a je prěni irsko-rěčny film, kotryž bu za Oscar nominowany.
Dźeń astronomije
Budyšin. Na dnju astronomije, sobotu, 19. oktobra, přeprošuje Budyska šulska hwězdarnja wot 17 do 22 hodź. na wosebity podawk: Prěni raz wot lěta 2020 móžemy na tutym dnju komet na hwězdnišću bjez pomocnych srědkow wobkedźbować. Sobudźěłaćerjo hwězdarnje pak poskićuja zajimcam tež wobkedźbowanja přez teleskop, na přikład planetow Jupiter, Saturn abo wosebiteje žadnostki: Měsačka blisko Plejadow. Tež přednoški k aktualnym temam, mjez druhim wo aktualnym wuwiću astronawtiskeho předewzaća SpaceX, maja we wječornym programje. Zastup za dorosćenych wučinja 10 eurow, za dźěći do 16 lět 5 eurow.
Póndźelniše čitanje
Gmejnska rada Pančicy-Kukow
Pančicy-Kukow. W Lejnjanskim hosćencu „K Lipje“ wotměje so wutoru, 15. oktobra, w 19 hodź. zhromadźizna gmejnskeje rady Pančicy-Kukow, na kotruž wjesnjanosta Markus Kreuz wutrobnje přeprošuje. Mjez druhim poda so rozprawa gmejny k dodźerženju hospodarskeho plana 2024 a znazorni so próstwa wo zwyšenje kapacity wot 32 na 50 pěstowarskich městnow w serbskej pěstowarni we Wotrowje.
Saněruja móst w Koćinje
Koćina. Po tym, zo je so tele dny na sewjernej kromje Koćiny saněrowanje betona při mosće přez Čorny Halštrow zahajiło, je puć do Salowa nětko na wosom dnjow zawrjeny. Wobjězdka přez Hózk je zarjadowana.
Serbske baje za cyłu swójbu
Kulow. Rěčnej motiwatorce projekta ZARI Marija Šołćic a Juliana Kaulfürstowa přeprošujetej wosebje swójby štwórtk, 17 oktobra, wot 10 hodź. do zetkawanišća wustawa Jakubetz w Kulowje na wosebite zarjadowanje k temje „serbske baje“. Tute nochcytej jenož čitajo předstajić, ale so tež zhromadnje na cyle kreatiwne wašnje z nimi rozestajeć.
Gmejnska rada w Radworju
