W Hućinje su minjeny kónc tydźenja 30. wjesny a hatny swjedźeń woswjećili. Zdobom su wopytowarjo składnosć wužili oldtimery wobdźiwać. Njedźelu dopołdnja zetkachu so wěriwi ze wsy a wokoliny w swjedźenskim stanje na swjatočne kemše. Po tym ­zahudźichu Hornjołužiscy muzikanća na rańše piwo. Najbóle spektakularne pak bě jězba w kupanskej wanje po wjesnym haće. To běše wosebje dźěćom a młodostnym wulke wjeselo a dobre wochłódźenje při horcych temperaturach. Foto: Jurij Helgest

Zakazowa skóržba aktiwistomaj

Choćebuz. Koncern LEAG chce aktiwistomaj, kotrajž běštaj w lěće 2019 brunicowe bagry blokowałoj, „přistup k jamam a haćenje tamnišich dźěłowych procesow“ juristisce zakazać. Móžna pokuta wučinja hač do 250 000 eurow. Proces bu dźensa na krajnym sudnistwje w Choćebuzu zahajeny. Organizaciji Robin Wood a Ende Gelände matej „zakazowu skóržbu, kotrejež zaměr je hłownje dalšim protestam zadźěwać“, za njewoprawnjenu a připowědźitej tuž demonstracije.

Čara zapusćenja w Žylowje

Choćebuz. Wichorowa trubjel je 300 metrow dołhu čaru zapusćenja po chójninje a Škodowskim puću wčera wječor w měšćanskim dźělu Žylowje zawostajiła. Sćěhi běchu wotkryte a wobškodźene třěchi, spowalene a wu­wróćene štomy, po powětru lětacy campingowy wóz a wobškodźene awta, kaž město informowaše. Wjedra dla měješe wohnjowa wobora 17 zasadźenjow jeničce w Žylowje.

Powabjenje wo myto móžne

Budyšin (SN/MWj). Zo by wobydlerjam přichodnje wšitke schodźenki digital­neho přizjewjenja jězdźidłow poskićeć móhł, chce Budyski krajnoradny zarjad w lětnich prózdninach trěbne přihoty wotzamknyć. Wobšěrneho přestajenja kompjuterowych programow a internetnych systemow kaž tež dalekubłanja sobudźěłaćerjow dla dóńdźe wot 15. julija hač do 8. awgusta k wobmjezowanju při přizjewjenju jězdźidłow a při wobdźěłanju naležnosćow wokoło jězbneje dowolnosće, rěka w nowinskim zdźělenju krajnoradneho zarjada.

Tak budźetej přizjewjerni w Kamjencu a Wojerecach 15. a 16. julija zawrjenej, ta w Budyšinje wostanje wot 17. do 19. ju­lija zawrjena. 19. julija budu wšitke tři přizjewjernje zawrjene. Wot 22. julija hač do 8. awgusta hodźa so naležnosće wobydlerjow jenož z terminom wobdźěłać respektiwnje maja wopytowarjo z dlěšimi čakanskimi časami ličić.

Budyšin. Za šulske dźěći, jich staršich kaž tež za dźědow a wowki je Budyski Serbski muzej wšelake poskitki za čas prózdnin přihotował. Za nje přizjewić móža so zajimcy pod abo pod telefonowym čisłom 03591 2708700. W tutym a přichodnym tydźenju, 4. a 11. julija stajnje wot 10 do 12 hodź. přeproša na zarjadowanje pod ­hesłom „Twarić a bydlić w měsće při­choda“. Při tym póńdźe wo to, kak předstajimy sej w přichodźe bydlenja, drastu, žiwjenske wašnje, mobilitu, ludźi, přirodu a twarstwo. K tomu wopytaja wobdźělnicy wosebitu wustajeńcu a po tym swójske kreatiwne ideje namoluja abo pasla sej swoje měst(n)o přichoda. Wudźěłki 8. septembra na Dnju wote­wrjeneho pomnika w muzeju prezentuja. Přizjewić móža so dźěći wot šěsć lět, wobdźělenje płaći na wosobu šěsć eurow.