Krótkopowěsće (11.06.24)
Knježi dwór mjez dobyćerjemi
Moritzburg. Sakske ministerstwo za kulturu a turizm kaž tež sakski krajny turistiski zwjazk stej wčera w Moritzburgu najlěpše přebywanišća Swobodneho stata wuznamjeniłoj. Mjez třomi dobyćerjemi je tež knježi dwór w Dobruši, hdźež su prózdninske bydlenja zaměstnjene. Jako premiju dóstachu dobyćerjo komunikaciski pakćik.
Wuběrk so w Dešnje schadźował
Dešno. Poradźowacy wuběrk za prašenja serbskeho ludu poboku zwjazkoweho ministerstwa za nutřkowne bě wčera w Dešnje, zo by so na swojim posedźenju z połoženjom serbskeho ludu zaběrał. Tučasne financne zrěčenje Załožby za serbski lud běži hač do kónca 2025. Jednanja wo slědowace zrěčenje so hižo wjedu. Nimo toho zeznajomichu so čłonojo wuběrka z projektom „Zorja“, kotryž ma zaměr delnjoserbsku rěč rewitalizować.
Do šule ze šěsć lětami zastupić
Pytaja za 14lětnej
Běła Woda. Zastojnicy policajskeho rewěra w Běłej Wodźe pytaja hižo wot srjedy, 5. junija, za 14lětnej Ashley D. a proša ludnosć wo podpěru. Młodostna je šwižna, něhdźe 1,60 m wulka a waži 63 kg. Wona ma ćmowo-swětłe, napoł dołhe włosy a nosy nawoči. Prawdźepodobnje běše so wona naposledk pak čorny pulower a čorne cholowy abo běły pulower a zelene cholowy woblekła. Prošu podajće pokiwy na policiju w Běłej Wodźe pod čisłom 03576- 2620 abo na kóždym policajskim rewěrje we wašej wokolinje.
Tankownju wobškodźił a ćeknył
Budyšin. Dotal njeznaty šofer nakładneho awta je tydźenja štwórtk do tankowanskeho stołpa na wotpočnišću Hornja Łužica-juh při awtodróze A4 zrazył a potom wotjěł. Škoda wučinja něhdźe 1 000 eurow. Policija přepytuje njedowoleneho wotsalenja z městna njezboža dla.
W Pěskecach na kopańcu so zešli
Planuja moderny přitwar
Trjebin (AK/SN). Dobrowólna wohnjowa wobora Trjebin w Slepjanskej wosadźe ma bórze moderny přitwar dóstać. Za to so gmejna Trjebin tuchwilu zasadźuje. „Wot Sakskeho nutřkowneho ministerstwa smy informaciju dóstali, zo tele předewzaće njespěchuje. Woni njewidźa trěbnosć młodźinu a wukubłanje spěchować“, je wjesnjanosta Robert Sprejz (Trjebinske wolerske zjednoćenstwo) zašłu srjedu na posedźenju gmejnskeje rady wuswětlił.
Ministerstwo běše na to skedźbniło, zo je před lětami dźensniše twarjenje Trjebinskeje wohnjoweje wobory spěchowało. Tuž je Robert Sprejz ze zastupjerjemi LEAG wuradźował. „Chcemy zhromadnje a tež z dalšimi partnerami kaž ze Zhorjelskim wokrjesom a Sakskej banku za natwar za rozrisanjom pytać“, wjesnjanosta rjekny. Při tym wotwažuja wo spěchowanju we wjesnych kónčinach z programa Leader. Tole pak ma so dokładnje pruwować. Fakt je, zo je plan za přesadźenje naprawy jasny. Inženjerski běrow z Krušwicy je přitwar na Trjebinski wohnjowoborny depot hižo planował.
6. turněr zapřahow
Chrósćicy. Zarjadniski zwjazk „Při Klóšterskej wodźe“ přeprošuje na 6. turněr zapřahow, dnja 15. a 16. junija do Chrósćic. Wjace hač 50 zapřahow wubědźuje so kołowokoło pomnika za padnjenych pólskich wojakow sobotu wot 8 hodź. w dresurje a w jězdźenju mjez kehelemi a njedźelu wot 9 hodź. w razantnej jězbje přez kraj.
Njedźela za swójby
Smochčicy. Smochčanske kubłanišćo swj. Bena přeprošuje njedźelu, 16. junija, mjez 10.30 hodź. do 15.00 hodź. na njedźelu za swójby. Po Božej mši wočakuje ludźi pisany program na jewišću z hudźbu, serbskimi rejemi a klankodźiwadłom. Dalše poskitki dnja su: bubnowanska dźěłarnička, pryskanje wody z wohnjowej woboru abo jězba z kremserom po wsy. Tež wobjed poskićuja. Zastup je darmotny. Za dalše informacije kontaktujće prošu Stephanie Barwanietz pod info@kebs.de abo telefonisce pod 035935-22316.
„Kak to widźiće?“
Šulerjo chcedźa wědu wo žiwjenju
Něhdźe 100 šulerjow wyšeho schodźenka z Wojerowskich kubłanišćow je njedawno projektowy dźeń na temu „Dźeń přichoda“ dožiwiło. Zakład wšeho běše inspiracija šulerki Lessingoweho gymnazija.
Wojerecy (SiR/SN). Štyrjo šulerjo ze šulerskeho zastupnistwa Wojerowskeho Lessingoweho gymnazija su projektowy dźeń zhromadnje ze šulerskej rěčnicu Mariettu Heinze přihotowali. Při tym su jich šulerjo Wojerowskeho Johanneuma podpěrali. Hižo loni běchu šulerjo a šulerki Lessingoweho gymnazija projektowy dźeń na temu „Strowota“ organizowali. Wulke připóznaće ze strony šulerjow a wučerjow kaž tež projektowych partnerow běše nastork za lětušu akciju.
„Šnajdrec wnučki“ zaspěwali
Njewšědny swójbny chór ze serbskimi a mjezynarodnymi pěsnjemi zahorił
Pančicy (SN). Hižo třeći króć wotmě so pjatk wječor na kopaće połnym Błažikec-Kaulfürstec dworje w Kukowje wosebity koncert. Po tym, zo běštej jón w zašłymaj lětomaj skupinje Wólbernosće a Přezpólni wuhotowałoj, wustupichu tónkróć wnučki Hany Šnajdroweje a Bena Šnajdra ze Smječkec, kotryž by lětsa swoje 100. narodniny woswjećił, hromadźe ze swojimi partnerami. Dohromady 16 spěwarjow a instrumentalistow poskići pisany program. Znate serbske štučki kaž „Słyšće kak pišćele w korčmje du“, „Maćernu rěču lubuju“ abo klasikar Zejlerja a Kocora „Tam kóždy dźeń je lubosć nowa“ wotměnjachu so z klasiskim a popowym mjezynarodnym repertoirom. Tež publikum dósta składnosć, někotre chórowe sadźby sobu spěwać, na přikład znate słowakske „Aká si mi krásna“. Hromadźe z akordeonom zanjese připosłucharstwo z elanom pěsnje kaž „Lubka lilija“ abo „Pod Kulowom w holi“.
Krótkopowěsće (10.06.24)
Myto Worklečanskim šulerjam
Berlin. Šulerjo Serbskeje wyšeje šule we Worklecach su dźensa připołdnju w Berlinje přebywali, zo bychu za swój film „Móšnička w zapadźe, korjenje w serbskej Łužicy“ pjenježne myto přijimali. We wubědźowanju Zwjazkoweje załožby k předźěłanju SED-diktatury pod titulom „Časy přewróta“ běše wón mjez cyłkownje 33 přinoškami prěnje městno zdobył.
Juristiske pruwowanje sej žadali
Lěšće. Předsydstwo župy Delnja Łužica ma hač do přichodneje hłowneje zhromadźizny juristisce přepytować dać, hač smě čłonow wuzamknyć, kotřiž wukonjeja funkciju w Domowinje a dźěłaja w antidemokratiskich a ekstremnych stronach a organizacijach sobu. To je hłowna zhromadźizna župy Delnja Łužica předwčerawšim w Lěšćoch (Hornow) z wjetšinu hłosow wobzamknyła.
Pastoralny koncept přepodaty
Próstwy za wobydlerski budget
Budyšin (SN/MiR). Budyski wokrjes chce 38 000 euro za komunalny wobydlerski budget zasadźić. Zajimcy móža wotnětka próstwy wo financielnu podpěru za swoje ideje zapodać. Zaměr spěchowanja je podpěra za komunalne resp. lokalne projekty. Wšitcy wobydlerjo wot 16 lět móža so požadać, kotřiž chcedźa projekty z bjezposrědnim poćahom k gmejnje, w kotrejž bydla abo ke kotrejž maja wosebity poměr, zwoprawdźić a z tym lokalnu komunu skrućić.
W truskalcach „pobyli“
Kamjenc. Zastojnicy policajskeho rewěra w Kamjencu su w nocy na srjedu na polu pola Gelenauwa dweju pozdatneju paduchow truskalcow lepili. Swědkojo běchu jich informowali. Skućićelaj běštaj 72lětny muž a 71lětna žona. Měještaj bow při sebi, kotryž bě k třećinje z truskalcami pjelnjeny. Wobaj spytaštaj so před zastojnikami schować. Škoda za bura wučinja něhdźe 20 eurow.
Do mopeda zrazył
Mješicy. Njeznaty šofer wosoboweho awta je póndźelu rano w Bukečan gmejnskim dźělu Mješicach do mopeda zrazył, potom pak dale jěł. 19lětny młodostny běše z mopedom z Bukec do Mješic po puću. Před zachodom do wsy wón zaborzdźi. Tole za nim jěducy wodźer awta po wšěm zdaću přewidźa a do njeho zrazy. Młodostny so lochce zrani. Wěcna škoda na mopedźe wučinja 500 eurow.
