Dožiwimy na póstnicach w Kulowje serbsku baru? A zasłyšimy po žonjacym karnewalowym ćahu sobotu a róžowu póndźelu našu maćeršćinu? Na kóždy pad: Tuž do Kulowa!

Kulow (bl/SN). Hač we wulkej bróžni, w přetwarjenej garaži abo na starej žurli – we wšěch kutach Kulowa so šrubuje, moluje a pasli. Witać chcedźa póstniski kónc tydźenja a hač do přichodneje wutory zaso tysacy hosći, kotřiž w njeličomnych mjeńšich a wjetšich barach hejsuja.

Radźićeljo maja so lětsa wažnym gmejnskim naležnosćam wěnować

Njebjelčicy (SN/mwe). W Serbskich Pazlicach matej lětsa nowej busowej čakarni nastać. Inwesticija płaći něhdźe 18 000 eurow. Projekt předstajił je wčera wječor na prawidłownym posedźenju gmejnskeje rady w Njebjelčicach Peter Linke z Drježdźanskeho inženjerskeho a twarskoplanowanskeho běrowa. Radźićeljo su na to wobzamknjenje k inženjerskemu zrěčenju schwalili.

Schwaliła gmejnska rada tohorunja je, podpisać zrěčenje planowanskeho dojednanja mjez Budyskim wokrjesom, gmejnu a Kamjenskim zaměrowym zwjazkom za wopłóčki. „Hdźe wo to, planować puć ze Serbskich Pazlic do směra na Miłoćicy a dale přez wjes hač k přemysłowej štwórći. To rěka, štó kotre kóšty přewozmje“, wjesnjanosta Tomaš Čornak (CDU) našemu wječornikej rozłoži. Inwesticija ma něhdźe tři miliony eurow płaćić. Gmejna ma so ze swójskim podźělom na kóštach za kolesowarsku šćežku, za chódniki a wobswětlenje starać. Twar noweje dróhi, kotryž je wot klětušeho hač do lěta 2020 planowany, ma so w třoch wotrězkach přewjesć.

Budyšin/Wojerecy/Drježdźany (SN/CoR). Ze spěchowanskeho programa „Integratiwne naprawy“ přewostaji sakske ministerstwo za runostajenje a integraciju třom projektam Budyskeho wokrjesa dohromady 125 000 eurow.

Spěchowanje dóstanu Budyski Kamjentny dom za wjetšinu a ćěkancow zwjazowacy projekt „Ćěkancow w Budyšinje integrować“, towarstwo Majak jako interkulturny centrum z poradźowanskim poskitkom, kotryž chce mjezykulturny a -na­božinski dialog spěchować, kaž tež Wojerowske regionalne dźěłanišćo za kubłanje, demokratiju a žiwjenske perspektiwy za projekt „Integracija požadarjow azyla we Wojerecach“, zdźěla ministerstwo za runostajenje a integraciju. „Demokratiske a integraciske dźěło w Sakskej je wjace hač trěbne. To su minjene tydźenje a měsacy pokazali. Ze spěchowanjom tworimy poskitki, kotrež tyja wšitkim wobydlerjam. Klima so polěpši, hdyž zesylnimy mjezyčłowjeski a interkulturny dialog kaž tež solidarnu mjezsobnosć“, podšmórny ministerka Petra Köpping (Lěwica).

Mjenje mortwych na dróhach

Wiesbaden. Ličba smjertnych woporow při wobchadnych njezbožach je w Sakskej loni widźomnje woteběrała. Cyłkownje 162 ludźi je na dróze žiwjenje přisadźiło, zdźěla Zwjazkowy statistiski zarjad we Wiesbadenje. To je 30 mjenje hač lěta 2015. Po wšej Němskej zličichu loni 3 214 smjertnje znjezboženych.

Tysac kulturnych wjerškow

Podstupim. Hač w koncertnych halach, cyrkwjach abo pod hołym njebjom – w Braniborskej chcedźa lětsa wjace hač tysac koncertow, dźiwadłowych předstajenjow, operow, čitanjow, filmow a dalšich zarjadowanjow wotměć. Wone su wažny wobstatk kulturneho turizma a zesylnjeja regiony, potwjerdźi kulturna ministerka Martina Münch (SPD).

Planuja datajowy skład

Hrádek nad Nisou. Liberecska firma „CS spoje“ planuje na přemysłownišću pola Hrádeka nad Nisou natwarić najwjetši skład kompjuterowych datajow w sewjernej Čěskej. W kruće škitanym objekće móhli statne organy, předewzaćeljo kaž tež priwatnicy swoje dataje jako rezerwu składować. Projekt wusměrja so tež na zajimcow w Němskej, kaž čěske medije rozprawjeja.