Sobudźěłaćerjo Njeswačanskeje přirodoškitneje stacije su tule ...
Plan steji – prašenja wostanu
Zo móhli inwesticije w gmejnje sčasom zwoprawdźeć započeć, wobzamknychu Rakečanscy gmejnscy radźićeljo wčera na swojim posedźenju wustawki za lětuši hospodarski plan. Jich wobsah předstaji wjednica financneho zarjada gmejny Franziska Pfeiffer a pokaza při tej składnosći na žórła gmejnskich financow a jich zestawu.
Rakecy (JK/SN). Gmejna změje tež lětsa najebać dale trajace konsolidowanje gmejnskeho hospodarstwa wurunany etat a chce po słowach wjesnjanosty Swena Nowotneho (CDU) dołh na wobydlerja wot dotal 635 na 459 eurow pomjeńšić. Lětuše najwažniše inwesticije budu doskónčne ponowjenje Cyrkwinskeho naměsta srjedź Rakec kaž tež ponowjenje sanitarnych připrawow tamnišeje zakładneje šule. Dale chcedźa wutwarić a ponowić nadróžne wobswětlenje přemysłownišća při Jitkowskim puću. Za prěnjej dwě poziciji njetrjeba gmejna swójskeho podźěla, dokelž zasadźi za to spěchowanske srědki kaž tež klučowe připokazanki wokrjesa.
Kołojězba lětsa z jubilejom
Ramnow (SN). Lětuša Ramnowska hrodowa kołojězba konjacych zapřahow wotměje so njedźelu, 21. meje. Za jubilejnu 20. kołojězbu planuja organizatorojo jěchanskeho towarstwa Hufnagel wosebitu čaru. Start a cil budźetej před kulisu Ramnowskeho barokneho hrodu. Čara powjedźe wottam přez Biskopicy składnostnje 790lětneho wobstaća města. Připołdniša přestawka budźe při Steinaskim lěsnym hosćencu „Zur Finke“.
Kołojězba skići tež lětsa wobdźělnikam wulkotny wuhlad na łužisku krajinu. Podłu čary budu zajimawe stacije z překwapjenkami spřihotowane. Kołojězba započnje so w 9 hodź., do cila dojědu zapřahi něhdźe w 14 hodź. Při Ramnowskim baroknym hrodźe čakaja na wopytowarjow bohaty program a kulinariske poskitki.
Kołojězba nima w prěnim rjedźe charakter wubědźowanja, skerje steji wjeselo w srjedźišću. Nimo toho chcedźa organizatorojo na něhdyše rjemjesło pohonča a z nim zwjazanu bursku tradiciju jako kulturne namrěwstwo skedźbnić.
Kmane městno namakali
Twarski plan za nowu Kulowsku pěstowarnju schwaleny
Kulow (AK/SN). Njedaloko Krabatoweje zakładneje šule a wyšeje šule „Korla Awgust Kocor“ ma nowa Kulowska pěstowarnja w nošerstwje katolskeje wosady nastać. Na swojim wčerawšim posedźenju su měšćanscy radźićeljo twarski plan schwalili. „Žaneje wjetšeje alternatiwy njeje. W měsće je lědma druheje ležownosće, kotraž je tak centralna, tak derje wuhotowana a tak derje pěši docpějomna“, podšmórny planowarka dr. Barbara Braun z Drježdźanskeho inženjerskeho běrowa Braun und Barth.
To hromadźe słuša
Witana pomoc towarstwu
Pytaja mjeno za nowy dom
W Kamjencu twari skupina AZURIT pod Budyskej hórku nowy centrum seniorow. Přichodnej nawodnicy zarjadnišća Kathleen Hanschke je wažne, ludnosć wo twarskim postupje běžnje informować a hromadźe z nimi mjeno za nowy dom nańć.
Kamjenc (SN). Nowy centrum budźe moderne a atraktiwne zarjadnišćo za hladanja potrěbnych seniorow. Lětsa w septembrje ma dźěłać započeć. Po słowach přichodneje šefowki Kathleen Hanschke su „jara optimistiscy, zo twarske dźěła sčasom wotzamknjemy“.
Krótkopowěsće (16.03.17)
Ličba zatepjenych so podwojiła
Berlin. Ličba ludźi, kotřiž su so loni w Sakskej zatepili, je so porno lětu 2015 na 15 nimale podwojiła. Wo tym informuje dźensa Němska towaršnosć za wuchowanje žiwjenja DLRG w Berlinje. Po cyłej Němskej je ličba smjertnych woporow loni na dohromady 537 rozrostła, najwjace w zašłych dźesać lětach.
Wudobywanje brunicy wina
Choćebuz Kaž Choćebuske krajne sudnistwo wčera rozsudźi, bě wudobywanje brunicy na tym wina, zo je 20 štomow zahinyło. Skoržiła bě swójba, kotraž bydli na kromje Janšojskeje brunicoweje jamy. Kelko pjenjez ma nětko jako wotrunanje za štomy wot wobhospodarjerja jamy dóstać, hišće jasne njeje.
Pismik „ř“ tola wostanje
Praha. Čěski senator Jaroslav Doubrava wuraznje na Facebooku kritizuje pozdatny namjet Europskeje unije, pismik „ř“ z alfabeta europskich rěčow šmórnyć. Přičina měło pječa zjednorjenje snadneho wustupowanja tohole pismika być. Hakle reakcije čitarjow na Facebooku senatorej wuwědomichu, zo je so wot hižo staršeje satiriskeje fiktiwneje powěsće za nós wodźić dał.
Chcedźa Thiaga wróćo měć
Policija (16.03.17)
Paduch drasty lepjeny
Kamjenc. Z tym drje 28lětny paduch zawčerawšim dopołdnja w Kamjencu ličił njebě. Na Klóšterskej hasy hrabny sej wón před modowym wobchodom wjacore dźěle drasty a so w bliskim domje zhubi. Tam wón etikety z płaćiznu wotstroni. W tym wokomiku staj jeho ciwilnaj policistaj Kamjenskeho rewěra, kotrajž běštaj njeskutk wobkedźbowałoj, překwapiłoj a młodeho muža zaještaj. Sobudźěłaćerjo modoweho wobchoda scyła hišće pytnyli njeběchu, zo bě so drasta w hódnoće 200 eurow zhubiła.
Bjesada wuspěšnje dźěłała
Dwě njedźeli do hłowneje zhromadźizny Domowiny we Wojerecach zeńdźechu so čłonojo Jasčanskeje Bjesady k swojej hłownej zhromadźiznje. Předsyda towarstwa Guido Zahrodnik móžeše w swojej rozprawje na mnohe derje wopytane zarjadowanja w lěće 2016 pokazać. Na póstničce na přikład bě so wjele młodych ludźi wobdźěliło. Něhdźe 40 čłonow sćěhowaše w měrcu wuwjedźenja serbskeho krosnowarja Achima Miča z delnich Sulšec. Na mały wjesny swjedźeń je so mjeztym tež w Jaseńcy chodojtypalenje wuwiło. Wjeršk běše bjezdwěla zaso adwentnička, na kotrejž su lajkojo znowa dźiwadło hrali.
W juniju pobychu Jasčenjo w čěskej wsy Srbsko. Přičina, partnersku komunu Bóščanskeje gmejny wopytać, bě wulki swjedźeń składnostnje 700. narodnin Korle IV. na hrodźe Karlštejn.
Čłonojo Jasčanskeje Bjesady dźěłachu tež na arealu wokoło kulturneho domu. Nalěto a nazymu bě wulke rjedźenje. Tež při kładźenju sylnoprudoweho kabla do zemje su pomhali. Wužadanje běše twar beachvolleyballnišća blisko małeho sportnišća. Za připrawu kaž tež za sportnišćo je towarstwo wjacore saki kupiło.
