Krótkopowěsće (28.06.23)
Za kulisy pohladać
Budyšin. Šulerki a šulerjo 9. a 11. lětnikow z regiona mjěchu dźensa móžnosć za kulisy justicy pohladać. Hamtske sudnistwo Budyšin bě na tak mjenowany „dźeń justicy“ přeprosyło. We wodźenjach po domje, přednoškach a realnych procesach móžachu šulerjo wobraz wo wšědnym dnju w sudnistwje zdobyć. Rozmołwy z wukubłancami běchu we „wukubłanskej kofejowni“ požadane.
Tučelowa chorhoj nad radnicu
Choćebuz. Nad Choćebuskej radnicu tuchwilu tučelowa chorhoj zmawuje. To je znamjo na rjad zarjadowanjow k Christopher Street Day w měsće a w Delnjej Łužicy. Po słowach patronki, měšćanostki Marietty Tzschoppe „wopokazamy z tym mjezsobny respekt, česćownosć čłowjeskeje dostojnosće a wjelestronsku lubosć“.
Łódźnistwo na Łobju rozwiwaja
Policija (27.06.23)
Ničo w awće njewostajić
Bjezdowy. Štóž w přichodnych lětnich tydźenjach k jednomu z łužiskich jězorow kupać jědźe abo chce so tam na druhe wašnje wočerstwjeć, njech na to kedźbuje, zo žane hódnotne wěcy w awće njewostaji. Předwčerawšim wječor su so mjenujcy njeznaći do třoch wosobowych awtow na parkowanišću při Bjezdowskim jězoru (Partwitzer See) zadobyli. Paduši wzachu šmóratka a pjenjezy sobu. Hódnotu rubizny trochuje policija na něhdźe 1 050 eurow.
Chcedźa spěwać a čitać
Běrow nětko za zajimcow přistupny
Radwor (SN/BŠe). Radworski campus EksperiMINT w nošerstwje tamnišeje staršiskeje iniciatiwy je zańdźeny pjatk oficialnje swój běrow wotewrěł. Radworski wosadny farar Beno Jakubaš je rumnosće nimo toho poswjećił. W twarjenju za hosćencom „Meja“ je nětko zarjadnišćo z najwšelakorišimi poskitkami za dźěći přihotowane. Hač šijawy, robotery, nastroje za grawury atd. wšitko je w rumnosćach zarjadowane. Tež projektowa sobudźěłaćerka Diana Mejnowa je na městnje. Na nju smědźa so zajimcy rady wobroćić.
„Chcemy dźěćom zwonka šule rěčne rumy poskićeć, hdźež móža serbšćinu nałožować“, wuzběhny čłon iniciatiwy Wito Bejmak před mnohimi hosćimi, kotrež běchu wćipni na to, štož so za durjemi běrowa chowa. Tak běchu zastupjerjo Domowiny runje tak do Radworja přišli, kaž zastupjerjo gmejny.
Za tři lěta móhli započeć
Profesoraj gmejnskim radźićelam plany wědomostnikow předstajili
Róžant (JK/SN). Na minjenym posedźenju gmejnskeje rady Ralbicy-Róžant witachu radźićeljo dobreju znateju a mjeztym tež dobreju přećelow gmejny, profesorow Günthera Hasingera a Christiana Stegmanna. Prof. Stegmann předstaji wuslědki prěnich pola Konjec přewjedźenych měrjenjow, kotrež wočakowanja wědomostnikow nastupajo podzemsku ćišinu wobkrućichu. Z tym je wědomostnje potwjerdźene, zo je łužiski zornowc hłuboko pod zemju optimalne městno za wědomostne slědźenje. Po připrajenju ze stron zwjazkoweho ministerstwa za wědomosć w Berlinje a po tym zo je financowanje projekta dołhodobnje zaručene, koncentruja so wědomostnicy na załoženje předewzaća Astrocentrum Łužica, kotrež budźe so wo natwar slědźenskeho centruma a slědźenje starać.
W połnej cyrkwi koncertowali
Baćoń (FK/SN). Kopata połna bě minjeny pjatk wječor Baćońska cyrkej, jako chór Lipa swój nócny koncert zahaji. Wjedra dla njemóžachu wonka pod farskimi lipami spěwać. Pod nawodom Jadwigi Kaulfürstoweje přednjesechu Lipjenjo cunje, pokojne, ale tež zahorjace pěsnje, kiž hodźachu so k atmosferje lěćneho wječora. Čućiwe interpretacije dirigentki, kotrež chór z wulkej intensitu a fleksibelnosću přesadźowaše, připosłucharjow zdźěla jara hnujachu.
Přeswědčenja dla so mištra wzdał
Wot spočatka měrca 1992 wuchadźeja Serbske Nowiny jako wječornik. A wot toho časa je pomocnicy w mnohich wjetšich a mjeńšich wsach wšědnje čitarjam do domu noša. Najwjetši čas tuž našich pilnych roznošowarjow w lětnjej seriji předstajić (1).
Naša prěnja stacija su Kašecy, mała wjes mjez Wotrowom a Porchowom. Njeposrědnje před Kašecami na wjeršku stupaceho puća pozastać so při rjanym wjedrje wudani. Wottam njeje jenož Čornobóh, ale samo Sedło (Landeskrone) pola Zhorjelca widźeć. Do sewjera hladajo pokazuja cyrkwine wěže na Wotrow, klóšter Marijinu hwězdu, Ralbicy, Róžant, Njebjelčicy a Chrósćicy. Tež Čorna Pumpa a Hamorska milinarnja zdawatej so cyle bliskej być. Kašecy ze swojimi 110 wobydlerjemi, prěni króć 1374 pisomnje naspomnjene, běchu hač do lěta 1957 samostatna gmejna, wot 1994 pak přisłušeja do Pančic-Kukowa.
Wjele zabawy a wjesela knježeše minjeny kónc tydźenja na wjesnym ...
Wjace wopytowarjow do hrodźišća přiwabić
Raduš (PB/SN). Wjace hač 20 lět mjeztym tomu je, zo smědźeše Dieter Weißhahn, tehdy wjesnjanosta hišće samostatneje gmejny Raduš a čestny čłon jubilejneho zarjadowanja, posledni hozdźik do hrubeho twara słowjanskeho hrodźišća w Radušu zabić. Měsacy pozdźišo, 28. meje 2003, objekt oficialnje wotewrěchu. Z wulkej zjawnej a medialnej kedźbnosću tehdyša braniborska ministerka za kulturu a wědomosć Johanna Wanka znowa natwarjene hrodźišćo přepoda. Wot nowinarjow wulce chwalene, dožiwi hrodźišćo spočatnje hoberski nawal wopytowarjow. Lěta po tym je so ličba zajimcow pola něhdźe 50 000 wob lěto stabilizowała. „To njeje špatny wuslědk. Za porjadnu bilancu dochodow pak to njedosaha“, rjekny Wětošowski měšćanosta Bengt Kanzler. Zo by Radušanske hrodźišćo dale wobstało, chcedźa atraktiwnosć z kulturnymi poskitkami dale zwyšić. Tak chcedźa ličbu wopytowarjow na wjace hač 70 000 stopnjować. Trěbna je přiwšěm dalša pjenježna pomoc wokrjesa a Braniborskeje, Kanzler rjekny. Zo njeje žadyn zastupnik wokrjesa a kraja na zarjadowanje do Raduša přichwatał, je jemu špatne znamjo.
Krótkopowěsće (27.06.23)
Wjace fachowcow přiwabić
Drježdźany. Po słowach Geerta Mackenrotha (CDU), sakskeho społnomócnjeneho za wukrajnikow, dyrbi swobodny stat na swojim imagu dźěłać a wotewrjeniši być, zo by wjace fachowcow do kraja přiwabił a z tym wuwiwanje hospodarstwa podpěrował. „Z dźěćimi, kotrež so pola nas narodźa, to hižo móžne njeje“, praji wón powěsćerni dpa.
Počesći zasłužbnu Bórkowčanku
Podstupim. Braniborski ministerski prezident Dietmar Woidke (SPD) počesći dźensa sydom wosobinow ze zasłužbowym rjadom kraja Braniborskeje. Mjez nimi je Bórkowčanka Lydija Budischin. Dołholětna kantorka Bórkowskeje wosady swjeći wot lěta 2021 tež kemše a organizuje wosadne žiwjenje. Nimo toho nawjeduje chóry a instrumentalne skupiny.
Dźěłaja nětko po tarifje
