Sakska rybarstwo spěchuje

Drježdźany. Sakska je dźensa spěchowanje inwesticijow w akwakulturje a rybarstwje kaž tež za přezdźěłanje a zwičnjenje rybow a rybjacych wudźěłkow zahajiła. Za to trěbna wobnowjena a rozšěrjena spěchowanska směrnica natwari na dotalne spěchowanje hatarstwa a rybarstwa. Swobodny stat 7,4 miliony eurow přewostaja za přiměrjenje na změnu klimy, naprawy ke klimowej neutraliće a inowatiwne technologije a wudźěłki.

Nabožny tydźeń zahajeny

Budyšin. W nimale wšitkich serbskich katolskich wosadach je so dźensa nabožny prózdninski tydźeń zahajił. Najwjac wobdźělnikow maja w Chrósćicach, hdźež přizjewi so 180 dźěći. Wjeršk tydźenja budźe srjedu, hdyž putnikuja dźěći do Róžanta. Horcota organizatorow lětsa znowa jara wužaduje.

Radnica jako narodny pomnik

Trezor kradnyć zwrěšćiło

Budyšin. Sprjewinu kupjel w Budyšinje su sej njeznaći předwčerawšim rano za padustwo wupytali. Po wšěm zdaću pak su alarma dla ćeknyli. Kaž policija pozdźišo zwěsći, běchu so skućićeljo na předawanišćo zakuskow měrili. W nim drje chcychu trezor pokradnyć, štož pak so jim njeporadźi. Přiwšěm nasta nimale 3 500 eurow wěcneje škody.

Łužiske haty su tež zwonka našeje domizny swojich rybow dla sławne

Njeswačidło (SN/MiR). Łučny hat podłu B96 pola Njeswačidła měješe zašłe tydźenje wosebity napohlad. Njefachowc dohlada so małych hromadkow, kotrež kaž muster na dnje hata bjez wody, jedna pódla druheje, móhłrjec sedźachu. Njetraješe dołho a wódne ptački sej hórki wotkrychu a so na nje zesydachu. Zdźěla tam samo wjacore hodźiny wutrachu. Mjeztym pak sej zaso w rohodźi na kromje hata swój schow pytaja. Wšako woda krok po kroku stupa, a hromadki so na te wašnje pod hładźinu wody zhubja. Zo to chětro pomału dźe, zwisuje z tym, zo je zawěra we Łuze zwotkelž woda přińdźe, chětro zarosćena a tuž woda dosć njećeče. Robert Kretschmer, wotnajer Njeswačanskich hatow, chce zawěru přichodne dny wurjedźić, zo by woda w haće spěšnišo stupała.