Worklečanska dnjowa hladarnja „Při Krabatowym puću“ přewjedźe ...
Wotedawk gmejnow zwyšili
Drježdźany/Budyšin (SN). Sakska krajna direkcija je tele dny dwójnemu etatej Budyskeho wokrjesa za lěće 2023 a 2024 přizwoliła. Etat ma lětsa wobjim 606 milionow eurow a klětu budźe to 619,6 milionow eurow. Lětsa chce Budyski wokrjes něhdźe 68,8 milionow eurow inwestować. W lěće 2024 ma to potom trochu wjace być. Přewažnje su pjenjezy za naprawy w dróhotwarje, šulach a za nowotwar wuchowanskich stražow předwidźane.
Dwójny etat pak je so jenož wuwzaćnje schwalił. Tak je Swobodny stat postajił, zo su wuwzaća tuchwilu energijoweje krizy dla móžne. Srjedźodobnje ma wokrjes mjenje pjenjez wudać.
Wotedawk, kotryž gmejny na wokrjes płaća, je wo 1,5 procentnych dypkow stupał a wučinja potom cyłkownje 33,5 procentow. Dale z informacije Sakskeje krajneje direkcije wuchadźa, zo nima Budyski wokrjes dosć swójskeho kapitala, zo móhł inwesticije zwoprawdźić. Tuž su kredity trěbne, z kotrymiž maja so wudawki narunać. Klětu su kredity we wobjimje 5,43 milionow eurow trěbne, lěto po tym je to 7,1 milion eurow.
Město dźěći
Zhorjelc/ Zgorzelec (SN/MG). Kóžde druhe lěto přewjeduje towarstwo Meetingpoint Memory Messiaen z.t. ze Zhorjelca hranicupřesahowacy projekt Kindermiasto. We wobłuku tutoho skići so dźěćom z Němskeje a Pólskeje móžnosć, w dwěmaj tydźenjomaj wot 18. do 21. a wot 24. do 27. julija w swójskim „dźěćacym měsće“ žiwi być. Na wšěch 200 dźěći wobdźěla so na lětušim poskitku, kotryž wotměwa so na terenje zakładneje šule čo. 5 na ul. Kosciuszki 68 w Zgorzelecu. Wšědnje wot 9 do 16 hodź. móža so dźěći we wobłuku Kindermiasta w dohromady 30 powołanjach z najwšelakorišich wobłukow wupruwować. Wězo pak njedyrbja jeno dźěłać, ale smědźa so tež na mnohe poskitki w swobodnym času wjeselić.
Dale maja wobdźělnicy nadawk, měšćanostu za swoje město wuzwolić a z nim zhromadnje přemyslować, na kotre wašnje hodźało so město atraktiwniše stać. Damian Dąbek, nowy projektowy nawoda towarstwa Meetingpoint Memory Messiaen, je wot wothłosa dźěći na poskitk přemóženy: „Po tym, zo přichwatachu prěnje dźěći na ležownosć, je so nam wšěm wutroba wolóžiła a nam je so wujasniło, zo běchu naročne přihoty wopodstatnjene.“
Ofensiwa zjawnostneho dźěła (2)
Cyłkownje 18 towarstwow je so w zwisku z wubědźowanjom Leaderoweje kónčiny Hornjołužiska hola a haty „Podpěra regionalne dźěła“ wuznamjeniło. W swojej lětnjej seriji wěnuje so wječornik dobyćerjam a chce towarstwa a jich zaměry předstajić.
Drje jedna z najznaćišich dujerskich kapałow w Serbach su Chróšćanscy muzikanća. Wšudźe tam, hdźež dobra nalada knježi, nadeńdźeš wjesołych hudźbnikow, kotřiž zawjeseleja swój publikum z klasikarjemi, ale tež nowymi zynkami dujerskich instrumentow. Zo by pak towarstwo, kotrež wobsteji tuchwilnje z dwaceći aktiwnych hudźbnikow kaž tež třiceći spěchowanskich sobustawow, dale na tak agilne wašnje wobstać móhło, su sebi za zjawnostnu kampanju tysac eurow spěchowanskich pjenjez wudobyli.
Krótkopowěsće (19.07.23)
Smědźa zaso brunicu wudobywać
Waršawa. Pólske wyše zarjadniske sudnistwo je wčera rozsudźiło, zo smě wobhospodar PGE w brunicowej jamje Turjej zaso brunicu wudobywać. Skoržili stej mjez druhim město Žitawa a wobswětowa organizacija Greenpeace z Čěskeje a Němskeje, dokelž mějachu wobmyslenja nastupajo wobswětoškit.
Hrimanja a sylne spadki móžne
Drježdźany. Wobydlerjo w Sakskej maja so w nocy na njewjedra nastajić. Tak su lokalnje hrimanja a sylne zliwki móžne. Kaž meteorologojo Němskeje wjedroweje słužby dźensa zdźěla, wočakuja z blakami tež sylny wichor. Temperatury přichodne dny budu trochu niše. Tak leža jutře mjez 21 do 24 stopnjemi celsiusa. Zajutřišim dyrbja ludźo z dešćom ličić.
Čěski „Colt“ Ukrainu wubróni
Praha/Ottawa. Kanadiske knježerstwo je wozjewiło, zo w zwisku z wojerskej pomocu přepoda wojowacej Ukrainje 21 000 nadběhowych třělbow, 38 mašinskich třělbow kaž tež 2,4 miliony projektilow. Tute brónje a municiju doda předewzaće Colt Canada – jedna ze zamórskich filialow čěskeje firmy Colt CZ Group (do lěta 2022 znateje jako Česká zbrojovka).
Policija (18.07.23)
Ze 4 promilemi z kolesom jěł
Wojerecy. Trochu jara hłuboko do piwoweje škleńcy hladał je muž, kotrehož policisća njedźelu wječor we Wojerecach zadźeržachu. Napadnył wón bě, dokelž z kolesom na lěwym boku dróhi do napřećiwneho směra jědźeše, a to dosć njewěsće. Test wunjese pola njeho 4,06 promilow alkohola w kreji.
W jubilejnym lěće koncertowali
Do fabriki pohladać
Hórnikecy. „Změna w fabrice“ rěka prózdninski poskitk Hórnikečanskeje energijoweje fabriki. Wobdźělnicy nazhonja, kak ćežke a mazane tam dźěło něhdy bě a kotre nadawki přistajeni mějachu. Terminy su 20. a 27. julija kaž tež 3., 10., 17. a 24 awgusta stajnje wot 11 hodź. Zajimcy njech přizjewja so pod telefonowym čisłom 03571/ 60 70 340.
Předpředań zahajena
Budyšin. Předpředań zastupnych lisćikow za předstajeni oratorija „Žně“ Korla Awgusta Kocora a Handrija Zejlerja, kiž wotmějetej so 18. awgusta w 19.30 hodź. a 19. awgusta w 17 hodź. w Budyskej „Krónje“ je zahajena. Swětny oratorij předstajitej chór 1. serbskeje kulturneje brigady a orchester Serbskeho ludoweho ansambla pod hudźbnym nawodom Friedemanna Böhmy. Z tym rozžohnuje so cyrkwinski hudźbny direktor Friedemann Böhme jako wjelelětny wuměłski nawoda chóra 1. serbskeje kulturneje brigady na wuměnk. Z lěta 1996 wón spěwne ćěleso Serbskeho gymnazija nawjeduje. Kartki dóstanu zajimcy při kasy SLA w Budyšinje abo online pod www.ansambl.de. Kasa SLA je wot 22. julija do 14. awgusta dowola dla zawrjena. W tym času hodźa so lisćiki dale online skazać.
Běły kur do Berlina pósłali
Sulšecy (GM/SN). Něšto stow ludźi je minjeny kónc tydźenja wjesny swjedźeń w Sulšecach wopytało. Sobotu na přikład je so wjace hač 30 mustwow na wubědźowanju wo třělenje jědnatkow wobdźěliło.
Wjeršk bě njedźelu popołdnju pisany program. Dźěl toho je hižo wjacore lěta wjesne wjetowanje. Moderator Heiko Harig přednjese wjesnemu předstejićerjej Jurjej Brösanej nadawk, w běhu jedneje hodźiny 20 lěsnych dźěłaćerjow w dźěłowej drasće a z motorskej piłu na jewišćo přiwabić. Nimo toho měješe pjeć žonow přichadźeć, kiž měli 20 steakow sobu měć a dale pjeć metrow wysoki wuheń. Z nim chcychu signal w formje běłeho kura politikarjam w Berlinje pósłać, zo měli wo swojej tepjenskej politice hišće raz rozmyslować. Jurij Brösan měješe tróšku wobmyslenja dla 20 lěsnych dźěłaćerjow, dokelž wšak wobydlerjo w Sulšecach zwjetša ze zemskim płunom tepja. Skónčnje dojednachu so z moderatorom na 15 lěsnych dźěłaćerjow a runje telko steakow.
Zrěčenje bórze předpołoža
Přećeljo wlečakow chcedźa towarstwowy dom jako zetkanišćo zachować
Łaz (AK/SN). Kobličanske towarstwo přećelow wlečakow chce w Koblicach wjesny towarstwowy dom wot Łazowskeje gmejny dołhodobnje přewzać. Tole podšmórnychu čłonojo a wobydlerjo na zašłym posedźenju Łazowskeje gmejnskeje rady. Kónc julija chce gmejna towarstwu naćisk zrěčenja předpołožić. „Po tym chcemy so z towarstwom wo tym rozmołwjeć. Hnydom po lětnjej přestawce móhła gmejnska rada zrěčenje wobzamknyć“, wjesnjanosta Thomas Leberecht (CDU) připowědźi.
