K jubilejej wulki nawal ludźi
Pančicy-Kukow (SN/MWj). Optimalne lětnje wjedro, wysoki jubilej, wulka syła najwšelakorišich poskitkow a pisany program na jewišćomaj su wčera wjele ludźi do klóštra Marijineje hwězdy w Pančicach-Kukowje přiwabili. Klóšterski a swójbny swjedźeń Budyskeho wokrjesa bě jedyn z wjerškow lětušeje 775. róčnicy załoženja klóštra. Po swójskich wuprajenjach organizatorow je něhdźe 4 000 ludźi swjedźeń wopytało. Božu mšu k zahajenju swjedźenja swjećeše Drježdźansko-Mišnjanski biskop Heinrich Timmerevers. 1. serbska kulturna brigada je kemše hudźbnje wobrubiła.
17lětny Willi Karsch, šuler 11. lětnika Großröhrsdorfskeho ...
Krótkopowěsće (19.06.23)
Wyše mzdy a plajty firmow
Drježdźany. Hladajo na pobrachowacych fachowcow liči ekonom Joachim Ragnitz z dale stupacymi mzdami we wuchodnej Němskej. Z tym pak hroža firmowe plajty, rjekny zastupowacy jednaćel Drježdźanskeho Ifo-instituta nowinje „Leipziger Volkszeitung/Dresdner Neueste Nachrichten). Do dalšeho přiměrjenja mzdow ma so hospodarska wukonliwosć, produktiwita, zwyšić.
Spěchowanje hatarjam
Drježdźany. Spěchowanske srědki we wysokosći 2,5 milionow eurow dóstanje 87 hatarjow a hatarkow w Sakskej. Z tym swobodny stat rybarstwo a přirodoškit podpěra. Suchota je w minjenych lětach hatnistwa njesměrnje wužadała, ratarske ministerstwo minjeny pjatk zdźěla. Minister Wolfram Günther (Zeleni) wuzběhny, kak wažne hatarske hospodarstwo za zachowanje mnohotnosće družin je.
Pavel chcył Rusow dohladować
Pyta za bukwicami a mlóčemi
Najprjedy smědźa wodychnyć
Zawodowe kóšty Rakečanskeje pěstowarnje so loni lědma zwyšili
Rakecy (JK/SN). Starši dźěći, kotrež chodźa do Rakečanskeje pěstowarnje „Raj palčikow“, móža lětsa dale z dotalnym popłatkom ličić. Wuslědki wuhódnoćenja lońšich zawodowych kóštow, kotrež su sobu zakład za wobličenje popłatka, předstaji wjesnjanosta Swen Nowotny (CDU) srjedu na posedźenju Rakečanskeje gmejnskeje rady.
Policija (16.06.23)
Z hrajneho salona do jastwa
Wojerecy. Poprawom chcychu policisća předwčerawšim we Wojerowskim hrajnym salonje jenož dodźerženje předpisow kontrolować. Při tym wuhladachu 37lětnu žonu, přećiwo kotrejž přikaz zajeća předležeše. Po puću na rewěr zastachu w bydlenju žony. Mjeztym zo wona swoje wosobinske wěcy zapakowaše, napadny zastojnikam e-scooter, kiž bu hižo 2021 pokradnjeny. Dokelž dyrbješe žona po sudniskim wusudźe hišće 1 500 eurow zapłaćić, ale telko pjenjez njeměješe, dowjezechu ju zastojnicy do jastwa.
Do akademije pohladnyć
Budyšin. Zajimcy za dualny studij su jutře, sobotu, wot 9 do 13 hodź. na dźeń wotewrjenych duri do Budyskeje statneje studijneje akademije přeprošeni. Hromadźe ze swojimi partnerami z praksy předstaja studijne poskitki, wobsahi a wuměnjenja za studij w Budyšinje.
Za bus na festiwal so přizjewić
Chrósćicy. Na program folklorneho festiwala pjatk, 7. julija, w Hochozy pojědźe z Hornjeje Łužicy bus. Wón wotjědźe w 17.15 hodź. w Radworju a w 17.30 hodź. w Chrósćicach. Domoj wotjědźe bus w 23.30 hodź. Zajimcy měli so hač do 30. junija w regionalnym běrowje Domowiny w Chrósćicach pod telefonowym čisłom 035796/ 96 254 přizjewić. Jězba płaći na wosobu dźesać eurow.
Po parku so wuchodźować
Smochćicy. Smochčanske kubłanišćo swj. Bena přeprošuje jutře w 14 hodź. na wodźenje po hrodowym parku. W 16.30 hodź. přizamknje so beneficny koncert bigband Drježdźanskeho gymnazija swj. Bena. Z wodźenjom a koncertom podpěra załožba Carity w Drježdźansko-Mišnjanskim biskopstwje Kamjensku měnjensku bursu dźěćaceje drasty.
Něhdy sušili, naselili a zawarili
Budyšin (CRM/SN). Na zarjadowanje w rjedźe Kofej w třoch je Serbski muzej znowa minjenu srjedu přeprosył. Na blidźe přihotowany pak njeběše ke kofejej tónraz słódny pjekarski abo samopječeny tykanc, ale nakrate běchu wšelake družiny chlěba a k tomu sydaše butra, měd, marmelada a domjaca kołbasa. Tema kuratorki Andreje Pawlikoweje dźě bě „Naslědnosć w domjacnosći – sušić, naselić, zawarić“. Wona zwěsća, zo „wjele z něhdyšeho so dźensa zaso wožiwja“. K tomu nima dom wězo jenož eksponaty w swojim składźe. Wona składźe nowše knihi na blido a bě sej tohorunja swětłowobrazowy přednošk zdźěłała.
Krótkopowěsće (16.06.23)
Serbskaj redaktoraj mytowanaj
Zielona Góra. Mjez dobyćerjemi lětušeho Němsko-Pólskeho žurnalistiskeho myta Tadeusza Mazowieckeho je team rozhłosoweje redakcije MDR „Hej susodźe“. Redaktoraj Roman Nuk a Štefan Šmit staj myto zhromadnje z dalšimi pjeć kolegami w kategoriji „Nowe žurnalistiske formaty“ wčera w Zielonej Górje přijałoj.
Rjekojo abo mordarjo?
Praha. Čěscy filmowcy natoča film „Bratraj“ wo Mašínec dwójnikomaj. Tutaj staj započatk 1950tych lět w tehdyšej Čěskosłowakskej krawne wobrónjene spjećowanje přećiwo komunistiskemu režimej wjedłoj. Film měri so wosebje na Mašínec dyrdomdejske předobyće přez teritorij NDR hač do Zapadneho Berlina w lěće 1953. Jeju skutkowanje pak w dźensnišej Čěskej kontrowersnje posudźuja.
Španiska w finalu
Policija (15.06.23)
Z tanka ćěriwo kapało
Hodźij. Na statnej dróze S 111 w Hodźiju su sej policisća wutoru popołdnju nakładne awto bliže wobhladali. Při jězdźidle 61lětneho bě přidatny tank přitwarjeny. Z njeho ćěriwo kapaše. Při dokładnišim přepruwowanju zastojnicy zwěsćichu, zo bě tank wobškodźeny. Dalšu jězbu policisća mužej zakazachu. Wón ma nětko nanajspěšnišo defekt wotstronić dać. Policisća wodźerjej znajmjeńša dowolichu, hač do přichodneje zamkarnje jěć.
