Nowa kniha a wustajeńca k jubilejej
Pančicy-Kukow (SN/MWj). Hudźbne wjerški a wjele poskitkow za swójby čakaja na wopytowarjow klóšterskeho a swójbneho swjedźenja njedźelu, 18. junija, w klóštrje Marijinej hwězdźe w Pančicach-Kukowje. Je to jedyn z wjerškow lětušeje 775. róčnicy wobstaća klóštra.
Swjedźeń zahaja w 10.30 hodź. z Božej mšu z Drježdźansko-Mišnjanskim biskopom Heinrichom Timmereversom. Kemše wobrubi 1. serbska kulturna brigada pod nawodom Friedemanna Böhme. Wona hižo dźeń do toho na samsnym městnje w 17 hodź. koncert k jubilejej klóštra wuhotuje. Njedźelu wot 13 hodź. předstaja so na jewišću na klóšterskim dworje dorostowi wuměłcy z Budyskeho wokrjesa. Wot 16 hodź. zahraje Sakski krajny policajski orchester wurězki ze swojeho wobšěrneho repertoirea. Dale předstaji so njedźelu Serbski ludowy ansambl. Virginia Hanuzowa wot Domowiny porěči wo młodźinskim dźěle.
Zastupjerjo Budyskeho Rotary-kluba z jeho prezidentku Isu Bryccynej ...
Krótkopowěsće (13.06.23)
Nowa dramaturgowka SLA
Budyšin. Rejzka Krügerowa naslěduje wot hrajneje doby 2023/2024 so na wuměnk rozžohnowacu Jěwu-Marju Čornakec jako dramaturgowka Serbskeho ludoweho ansambla. Dotalne zastojnstwo projektoweje managerki Domowiny za Hornju Łužicu chce Krügerowa přiwšěm dale wukonjeć, w dramaturgiji skutkuje tuž jako dźělnočasowje přistajena.
Nowe městno za wěrowanja
Wochozy. Stawniske wěrowanja su nětko tež we Wochožanskim parku błudźenkow móžne. Tomu je Hamorska gmejnska rada wčera přihłosowała. Kaž wjesnjanosta Hendryk Balko wobkrući, maja stajnje zaso wotpowědne naprašowanja. W parku błudźenkow hodźi so po wěrowanju tohorunja swjećić. Dotal běchu wěrowanja jenož w Hamorskej radnicy a při Bjerwałdskim jězoru móžne.
Žadaja sej „status wuměłca“
Dołha tradicija bohužel nimo
Cyły brjuch spina – koliki pola konja
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (8)
Hrózbne to předstawy a wulki to strach, je-li rěč wo tym, zo ma kóń koliku. Po starym serbskim rěkaše to, zo konja kulka rěza. Tola što kolika je, na čim ju spóznaješ a kotre přičiny ju zawinuja, ma dźensniši přinošk bliže rozjasnić.
Powšitkownje je kolika z jara sylnymi bolosćemi a njenormalnej peristaltiku (=pohibowy muster) črjewow zwjazana.
Policija (12.06.23)
Najskerje traktora dla so paliło
Jědlow. K wjacorym wohenjam su sobotu popołdnju wohnjowu woboru a policiju podłu statneje dróhi S 94 wołali. Mjez Jědlowom (Gödlau) a Krěpjecami, blisko Žuric kaž tež při kružnym wobchadźe w Ramnowje je so dohromady na štyrjoch městnach sucha trawa paliła. Zasadźeni wobornicy z Pančic-Kukowa, Biskopic, Ramnowa, Halštrowa a Rušicy jednotliwe wohenje spěšnje zhašachu, tak zo žana wjetša škoda njenasta. Runočasnje dochadźachu wjacore informacije, zo bě na mjenowanym wotrězku dróhi historiski traktor typa Lanz „škrički pluwajo“ po puću. Wohnjowa wobora a policija wuchadźatej z toho, zo bě stara mašina na wohenjach wina. To pak na Kamjenskim policajskim rewěrje nětko dokładnje přepruwuja.
Ležownostny dawk zwyšili
Hospodarski plan skića jenož wobmjezowane móžnosće
Njebjelčicy (JK/SN). Pod tučasnymi napjatymi hospodarskimi wobstejnosćemi njebě zawěrno lochko nastajić w Njebjelčanskej gmejnje lětuši hospodarski plan. Jón su gmejnscy radźićeljo na swojim zašłym posedźenju schwalili. To bě wuspěch wulkich napinanjow a solidneho planowanja. Kaž wjesnjanosta André Bulank (njestronjan) wuzběhny, koncentruja so lětsa w gmejnje předewšěm na winowatostne nadawki, byrnjež tež druhe wažne naležnosće na komunalnym blidźe měli.
Za wurunany lětuši hospodarski plan bě trěbne, zo zwyša ležownostny dawk B za wobtwarjene płoniny. Dotal ležeše sadźba za tute pod sakskim přerězkom, kiž wučinja 427,5. Za snadne stopnjowanje dochodow gmejny su sadźbu na nětko 430 zběhnyli. Do toho bě tuta wot lěta 2018 pola 420 zapołožena.
Na slědach swojich stawiznow byli
Swoju blišu domiznu móžeš sej na cyle nowe wašnje wotkryć, hdyž raz z hinašimi wočemi na nju hladaš a sej spytaš předstajić, kak je tu před tysac lětami wupadać móhło. Předwčerawšim je to kolesowanska jězba zmóžniła.
Horni Wujězd (MWj/SN). We wobłuku wustajeńcy „Čej’ da sy?“ Budyskeho Serbskeho muzeja je so sobotu prěnja ze štyrjoch wjedźenych kolesowanskich jězbow podłu Klóšterskeje wody wotměła. Pod wěcywustojnym nawodom Tadeja Šimana je so 15 wobdźělnikow na něhdźe 25 kilometrow dołhu čaru podłu južneho dźěla Klóšterskeje wody a Satkule na puć podało. Starobne skupiny zajimcow z Radworja, Chrósćic, Dobrošic, Pančic-Kukowa, Wotrowa a wot druhdźe sahachu wot wuměnkarja nad 75 lětami hač k dźěsćomaj na kolesu swojeju maćerjow.
Spěwna skupina Přezpólni je sobotu wječor na ...
Krótkopowěsće (12.06.23)
Kuraže dla so dźakowali
Choćebuz. Dwaj zastupjerjej zwjazkoweho ministerstwa za kubłanje staj so tele dny z čłonami zjednoćenstwa „Šula za wjace demokratije“ z Delnjeje Łužicy zetkałoj. Pódla běštaj tež wučerjej z Bórkowow, kotrajž staj w anonymnym lisće na prawicarske wuprajenja šulerjow kubłanišća skedźbnjałoj. Ministerstwo so jimaj za ciwilnu kuražu dźakowaše. Mjeztym je dale a wjace tajkich padow znatych.
Na stoty jubilej skedźbnili
Delni Wujězd. Na stoty jubilej poswjećenja chorhoje serbskeho towarstwa Zahrodka 10. juni 1923 je tuchwilny cyłk sobotu w Instagramje skedźbnił. Kaž předsyda Frank Knobloch našemu wječornikej rjekny, chcedźa hišće ze zarjadowanjom na tónle jubilej spominać. Čitarjo Instagrama mjez druhim zhonja, zo běše Jan Lajnert, wučer a basnik z Rakec, narěč napisał a ju tež přednjesł. Original chorhoje je w Serbskim muzeju.
Zadarmo z ćahom po Francoskej
