Žony w měsće zhromadźić
Zajimowe zjednoćenstwo ma plan a chce so bórze prezentować
Wojerecy (SiR/SN). Nowa skupina wjesnych žonow móhła so přichodnje we Wojerecach załožić. Tole planuje Roswitha Petschick, kotraž je za to zajimowe zjednoćenstwo do žiwjenja zwołała. Jeje zaměr je, zo móhli so žony z města a wokoliny wobstajnje zetkawać a při tym swójske projekty zwoprawdźić. Mjez druhim móhli wone zhromadnje z kołwrótom wobchadźeć nawuknyć, paslić, hornčerić, zeleninu plahować, žnjowe wěncy paslić a wězo bjesadować. „Nowa skupina Wojerowskich wjesnych žonow ma žiwa być wot swojich čłonow a jich idejow a přećow. To woznamjenja, zo so žony w zhromadnosći zetkawaja, zo pak runočasnje syć mjezsobneje pomocy wutworja. Žony móhli zhromadnje wuknyć a swoju wědu walčkować“, Roswitha Petschick rozłoži.
Policija (27.02.23)
Do štoma zrazył
Lěskej. Zo je so kónc tydźenja zyma do Łužicy nawróćiła, bě 23lětnemu mužej po wšěm zdaću wšojedne. Wón bě wčera rano na zasněženym puću mjez Wysokej a Lěskej ze swojim Audijom A 7 po puću. Dokelž bě awto z lětnymi wobručemi wuhotowane, započa so wone suwać a zrazy do štoma. Zranił so nichtó njeje, dale jěć pak młody muž njemóžeše. Škoda wučinja nimale 40 000 eurow.
Seniorojo zaso škotuja
Kozarcy. Přichodny škotowy turněr serbskich seniorow wotměje so wutoru, 28. februara, w Kozarčanskim hosćencu. Započatk je w 14 hodź. Na njón su tež nowačcy wutrobnje witani, kaž hłowny organizator Měrćin Nowak zdźěli. Dalši turněr přewjedu kónc měrca w Šunowskim hosćencu.
Poetiski punk na huslach
Budyšin. We wobłuku rjadu Kamjentneho domu „Koncert w foyeru“ zahudźi Paul Geigerzähler wutoru, 28. februara, w Budyšinje. Do koncerta rozmołwja so wón zjawnje ze žurnalistom Christianom Schäferom. Zarjadowanje započnje so w 20 hodź., zastup je darmotny.
Na kofej w třoch
Budyšin. „Naslědnje žiwy być něhdy a dźensa“ rěka hesło přichodneho zarjadowanja w rjedźe „Kofej w třoch“ srjedu, 1. měrca, w 15 hodź. w Budyskim Serbskim muzeju. Při kofeju a tykancu porěča sobudźěłaćerjo muzeja wo tym, kak su ludźo něhdy naslědnje žiwi byli. Zarjadowanje wotměje so prěni raz zhromadnje z Budyskej wotnožku Sakskeje centrale za přetrjebowarjow. Jeje sobudźěłaćerjo informuja wo móžnosćach naslědneho žiwjenja w dźensnišim času.
Porěči wo hrodźišćach
Třoch nowačkow do wsy witali
Ćisk (JT/SN). Wjace hač sto muži z Ćiska zhromadźi so sobotu na wjesnej žurli na tradicionalne póstne piwo. Wjesny předstejićer Jens Zahrodnik zhladowaše na podawki zašłeho lěta. Předewšěm wuzběhny wón wjesny swjedźeń w septembru. Tón běchu z podpěru wšitkich wobydlerjow wsy a zhromadnje z hosćimi z čěskeje partnerskeje gmejny Přikazy swjećili. Dale rozłoži Zahrodnik hłowne předewzaća za 2023 a muži prošeše, so w přihotach na najwšelakoriše podawki w bohatej ličbje gratu přimać. Najwuznamniša drje budźe 775. róčnica prěnjeho naspomnjenja Ćiska. Ale tež towarstwa we wsy nadźijeja so aktiwneje pomocy.
Potom bě wulki wokomik za třoch Ćišćanskich nowačkow. Běchu to Christian Adermann, Jan Peter a Steffen Zschech. Jim přepoda Jens Zahrodnik wopismo, piwowy karan a brošurku z najwažnišimi ličbami a faktami wo Ćisku. Dale rozłoži wón třom mužam winowatosće we wjesnej zhromadnosći. Nimo mjezsobneje pomocy w nuzowych situacijach je předewšěm dobry poměr k susodam přewšo wažny a radźomny.
W Chróšćanskej cyrkwi dźěłaćerjo tuchwilu róšty twarja. Po ...
Situacija podobna
Přinošk za hladanje móhł wot julija stupać
Berlin (dpa/SN). Stupacych kóštow w hladanju dla maja přidatne wolóženja za hladanja potrěbnych, ale tež wyše přinoški přińć. Zo bychu financnu stabilitu hladanskeho zawěsćenja a předwidźanych přiměrjenjow wukonow zawěsćili, móhł přinošk k 1. julijej „moderatnje wo 0,35 procentowych dypkow“ stupać, kaž z naćiska zwjazkoweho ministerstwa za strowotnistwo wuchadźa. Tón powěsćerni dpa předleži. Do toho su redakciska syć Němska (RND) a dalše medije wo tym rozprawjeli. Zo bychu hladanja potrěbnych doma wolóžili, je po naćisku wotpohladane, hladanski pjenjez wot 1. januara 2024 wo pjeć procentow zwyšić. Tež wolóžace přiražki za hladanja potrěbnych w hladarnjach maja přiběrać.
Minister Karl Lauterbach (SPD) je hižo signalizował, zo su wyše hladanske přinoški trěbne, chcedźa-li polěpšenja financować. Tuchwilu přinošk za zakonske hladanske zawěsćenje 3,05 procentow bruttomzdy wučinja, za ludźi bjez dźěći 3,4 procentow. SPD, FDP a Zeleni běchu tež w koaliciskim zrěčenju připowědźili, zo chcedźa hladanski přinošk „moderatnje“ zwyšić.
Wěriwi spominachu minjeny pjatk we wosadnym domje cyrkwje swjateje ...
Krótkopowěsće (27.02.23)
Serbsce po hrodźe wodźił
Wojerecy. Prěnje serbskorěčne wodźenje po Wojerowskim hrodźe, dźensnišim měšćanskim muzeju, hdźež běštej hač do 1972 běrow a magacin serbskeho muzeja zaměstnjenej, je so njedźelu pod nawodom Wernera Sroki wotměło. Skupina dźewjeć ludźi, mjez nimi županka Gabriela Linakowa, sćěhowaše hodźinu dołho wuwjedźenja wo stawiznach domu a wustajeńcach muzeja.
Narodne krajiny přirody
Drježdźany. W nowej brošurje „Jónkrótne. Narodne krajiny přirody w Sakskej“ předstaji sakske wobswětowe ministerstwo narodny park Saksku Šwicu, biosferowy rezerwat Hornjołužisku holu a haty, kónčinu dźiwizny Kinsporsku holu kaž tež přirodowe parki Dübensku holu, Rudne horiny/Bohotsku a Žitawske horiny z jich biologiskej mnohotnosću.
Češa wobrónjuja Ukrainu
Policija (24.02.23)
Njeznaći w bydlenju pobyli
Łuh. Njeprošeny wopyt mějachu předwčerawšim w prěnjej połojcy dnja mějićeljo jednoswójbneho domu we Łuze w Njeswačanskej gmejnje. Skućićeljo přepytachu wšitke stwy, wočinjachu w nich kamory a je za hódnotnymi wěcami přepytachu. Hač su něšto pokradnyli, njeje dotal znate. Wěcnu škodu trochuje policija na něhdźe 50 eurow. Kriminalni technikarjo na městnje slědy zawěsćichu.
