We Wěteńcy žehlawku testuja
Přednoški fachowcow při wažnych rozsudach za gmejnu pomhaja
Njebjelčicy (JK/SN). Gmejnscy radźićeljo a wopytowarjo mějachu so wčera w Njebjelčicach we wobłuku posedźenja tamnišeje gmejnskeje rady na dlěšej přednoškaj nastajić. W prěnim předstaji Martin Sünder z Wysokeje šule Žitawa/Zhorjelc wuslědki studije, kak gmejnu njewotwisnje z energiju zastarać. Studija pokazuje na wjacore žórła wobnowjomnych energijow a kak so tute w gmejnje za produkciju miliny a ćopłoty zasadźić hodźa. Dospołna awtarkija pak so njehodźi za gmejnu docpěć, dokelž su problemy składowanja a transporta miliny hišće njerozrisane abo předrohe. Nadrobniše informacije k temje podadźa 13. měrca we 18.30 hodź. we wobłuku informaciskeho zarjadowanja na žurli Njebjelčanskeho gmejnskeho zarjada, k čemuž su wšitcy wobydlerjo a zajimcy prošeni.
Swjedźenski ćah budźe wjeršk
W lěće 2025 swjeća w Chrósćicach 800. róčnicu wosady a gmejny. Hižo nětko so na wulki podawk wusměrja. Wčera su na farje zajimcam tuchwilny staw přihotow předstajili.
Chrósćicy (SN/MWj). Z 800 dnjow trajacym countdownom zahaja w Chrósćicach 5. apryla, to je srjeda w martrownym tydźenju, oficialne přihoty na 800. róčnicu wosady a gmejny. Tón dźeń připrawja nad zachodom farskeho dwora a při gmejnskim zarjadnistwje wulki baner, kiž na jubilej skedźbnja. Na nim widźeć budźe tohorunja logo za jubilej. Tón staj farar Měrćin Deleńk a wjesnjanosta Marko Kliman (CDU) na wčerawšim informaciskim wječoru prěni raz zjawnosći prezentowałoj. Wonaj a dalši wobdźěleni wo tuchwilnym stawje přihotow swjedźenja informowachu.
Minjene dny su sobudźěłaćerjo přirodneje straže biosferoweho ...
Krótkopowěsće (03.03.23)
SŠT tež nosěr w sakskej stolicy
Drježdźany. Jednaćel Serbskeho šulskeho towarstwa (SŠT), Andreas Ošika, je dźensa dnjowu mać Sabinu Cyžowu w Drježdźanskej štwórći Nowe Město wopytał, zo by kooperaciju oficielnje zahajił. Wot 1. nalětnika je SŠT nošer serbskeje skupiny štyrjoch dźěći a podpěruje z tym towarstwo serbskich swójbow w sakskej stolicy „Stup dale“. Dalša serbska pěstowarska skupina je w nošerstwje města.
Kontrowersnje diskutowałoj
Drježdźany. Z temu, kelko wšelakich měnjenjow towaršnosć znjese, staj so wčera spisowaćelej Lukaš Ričel a Uwe Tellkamp rozestajiłoj. Na podiumowu diskusiju běštej „forum cyrkej našeje knjenje“ a sakska statna kenclija přeprosyłoj. Natočenje diskusije je na youtube online: .
Z tibetskim eksilom jednał
Kniharnja wobhladuje so jako zetkanišćo ludźi
Budyšin (CS/SN). „Kniha ma za křesćanstwo jara wulki wuznam“, rjekny Budyski financny měšćanosta dr. Robert Böhmer, jako wón předwčerawšim Křesćanskej kniharni na Mjasowych wikach k 25lětnemu wobstaću gratulowaše. Nic bjez přičiny je wjele swjatych z knihu w ruce zwobraznjenych. W času wot załoženja kniharnje hač do dźensnišeho je so wjele změniło, na přikład elektroniske medije. Zwostało pak je, zo chce wulki dźěl čitarjow woprawdźitu knihu w ruce měć. Böhmer tuž nawodnicy Katrin Otto a jeje čestnohamtskim sobuwojowarjam přeješe, zo bychu stajnje zajimowanych čitarjow měli.
Mjez gratulantami běštaj Matthias Weber a Markus Koch, jednaćel a prokurist Křesćanskeje kniharnje tzwr w Dillenburgu. Tam su wosebite kniharnje 1980 do žiwjenja zwołali. Mjeztym eksistuje tajkich po wšej Němskej 29. Z nich je Budyska najwuchodniša. Jako wosebitosć Matthias Weber wuzběhny, zo su 1998 při załoženju Budyskeje kniharnje přeprošenje tež serbsce w Serbskich Nowinach wozjewili. Eksemplar tehdyšeje nowiny měješe Weber samo sobu.
Policija (02.03.23)
Na třistronskim statoku so paliło
Kołwaz. K hašenju wołachu wohnjowych wobornikow předwčerawšim wječor do Kołwaza (Kohlwesa) pola Bukec. Woheń bě po wšěm zdaću w garaži třistronskeho statoka wudyrił. Płomjenja rozpřestrěchu so na prózdnu hródź a na prózdny dźěl bydlenskeho domu. Něhdźe 70 kameradow zadźěwaše, zo so woheń na dalši bydlenski dom rozpřestrěje. Zranił so nichtó njeje, w garaži pak so wjacore jězdźidła skóncowachu. Po prěnim trochowanju nasta něhdźe 150 000 eurow škody. Policija přepytuje pad podhlada zapalerstwa dla.
Sonja Krječmarjowa nawjeduje
Kozarcy. Po škotowym turněrje serbskich seniorow předwčerawšim w Kozarcach nětko Sonja Krječmarjowa cyłkowne hódnoćenje nawjeduje. To zdźěli hłowny organizatoriski nawoda Měrćin Nowak. Turněr w Kozarcach dobył je Herman Woko z 3 189 dypkami před Eberhardom Kroschkom (2 788) a Wolfgangom Kühnom (2 680). Sonja Krječmarjowa je štwórte městno wobsadźiła. Přichodny turněr wotměje so kónc měrca w Šunowje.
Wěnuja so Janej Haješej
Łaz. Na serbski wječor přeprošuje spěchowanske towarstwo Domu Zejlerja a Smolerja jutře, pjatk, we 18 hodź. do Łaza. Tam chcedźa so wěnować Łazowskemu Serbej a překupcej Janej Haješej (1873– 1960). Na jeho iniciatiwu nasta 1911 serbske towarstwo za Łaz a wokolinu. Dale je wón 1912 Domowinu sobu załožił. Wot 1921 do 1937 a wot 1945 do 1948 bě wón župan Wojerowskeje župy. Z přednoškom w němskej rěči, fotami a hudźbnym wobrubjenjom chcedźa na Haješa k jeho 150. narodninam spominać.
Sportownja ma wosebitosće
Šulerjo budu nowu halu hakle pozdźišo wužiwać móc
Bart (WL/SN). Posledni dźeń februara dóstachu wobydlerjo Barta swoju nowu sportowu halu z jednym hrajnišćom přepodatu. Mjeztym, zo Budyski krajny rada Udo Wićaz, Malešanski wjesnjanosta Matthias Seidel, (wobaj CDU) planowar Thomas Schmidt a sportowy wučer Dirk Beckert symboliski banćik přetřihachu, so zapósłanc Sakskeho krajneho sejma Marko Šiman (CDU) a předsyda Bartskeho sportoweho towarstwa Frank Nowak hižo raz w hali pospytaštaj a sej bul přihrawaštaj. Wšitcy měnjachu, zo je so 3,7 milionow eurow drohi twar derje poradźił.
Wot fundamenta hač pod třěchu wuznamjenja so nowa sportownja přez někotre wosebitosće, kotrež swojeho runjeća pytaja. Geologiskich wobstejnosćow dla steji twar na 41 stołpach. Wjerch z wocloweho betona je dalša wosebitosć. Zo móhli woclowe nošaki do hotoweho hrubeho twara zasadźić, běchu měrne ruce a milimeterska dokładnosć prašane. Kaž planowar rjekny, běštej to wužadani, z kotrymiž so twarscy dźěłaćerjo hewak wšědny dźeń zaběrać njetrjebaja.
