Razna debata w měšćanskej radźe
Raznu debatu su na wčerawšim posedźenju Budyskeje měšćanskeje rady naprašowanja radźićelow wubudźili. Předewšěm je šło wo wječork kiž je za 9. februar w tudyšej „Krónje“ planowany. Krótkodobnje dyrbješe zarjadowanje do baloweje žurle „K němskemu dubej“ we Wjazońcy přeńć.
Budyšin (CS/SN). Předmjet debaty bě zarjadowanje na temu „Krizy a jich šansy“ z Ernstom Wolffom, dr. Hansom Joachimom Maazom a moderatorom Alexom Quintom. Měšćanski radźićel Sieghard Albert (AfD) so za přičinu přepołoženja wobhoni. Wyši měšćanosta Karsten Vogt (CDU) jemu wotmołwi, zo běchu drje jednanja z Budyskej bydlenjotwarskej towaršnosću (BWG), mějićelku „Króny“, zrěčenje z přizjewjenjom pak njebu docpěte. Mějachu chutne pokiwy, zo móhło k mylenjam dóńć. Nimo toho hrozy městu strata imaga. Vogt skedźbni na jednanski porjad „Króny“. Tam rěka, zo měšćanska hala za politiske zarjadowanja njewobmjezowana k dispoziciji njeje. Jednaćelka BWG Kirsten Schönherr je w naležnosći pisomne kontrowersy dóstała. Su zwěsćili, zo njeby móžno było, za planowane zarjadowanje wěstotu zaručić.
Krótkopowěsće (09.02.23)
Zwada wo domčki na štomach
Budyšin/Ottendorf-Okrilla. Krajnoradny zarjad Budyšin chce „bórze“ we Łužničanskej holi „kontrolu za přepruwowanje přewjesć“, hač su wobsadźerjo lěsa z protestnym campom přećiwo wudobywanju šćerka „jim nadate zawjazki spjelnili“. Po informacijach prawiznika aktiwistow wočakuja hamtski wopyt 15. februara. Woni so zawjazkej spjećuja, domčki na štomach wottwarić.
Druha uniwersita w Choćebuzu
Choćebuz. Město Choćebuz dóstanje po rešeršach „Lausitzer Rundschau“ druhu uniwersitu – wysoku šulu za wukubłanje medicinarjow. 2026/27 ma prěnje studijne lěto być. Dotalna komunalna Carla Thiemowa chorownja budźe z uniwersitnej kliniku. Wo naćisku wědomostneho ministerstwa za prěnje statne kubłanišćo za lěkarjow w Braniborskej chce knježerstwo w měrcu rozsudźić.
Češa pomhaja w Turkowskej
Załožba w zajimje wnučkow
Z nazhonjenjow z „naslědnosću“ w Njebjelčicach konkluzije ćahnyć
Njebjelčicy (SN/mb). „Wnučkokmanosć“ je mjeztym tajke modowe słowo, kotrež jednych fascinuje a druhich wotstorkuje. Štož za tym tči, je prastara wěrnosć domoródneho ratarstwa: Dyrbiš swoju pódu tak wobhospodarjeć, zo změja hišće dźěći a wnučki na našej zemi swój wužitk. Hladajo na lěs je wyši hórniski stotnik Hans Carl von Carlowitz hižo w 18. lětstotku princip naslědnosće sformulował. W najnowšich regionalnych stawiznach je gmejna Njebjelčicy při tutej tematice „pioněrsku rólu“ zabrała, měni dr. Theresa Jacobsowa, ko-předsydka załožby w fazy załoženja z mjenom „wnučkokmanosć“. Tohodla chcedźa na wotpowědne lokalne nazhonjenja z třoch lětdźesatkow doby něhdyšeho wjesnjanosty Tomaša Čornaka nawjazać. Čornak je dalši předsyda, třeći na čole je Tomaš Nowak, kiž so hižo dołho za zachowanje mnohotnosće wužitnych rostlin angažuje.
„Wutrobička směj so“
Minjenu njedźelu popołdnju zetkachu so na sto ludźi na Krawčikec žurli w Chrósćicach, zo bychu sej komediju lajskeje dźiwadłoweje skupiny Konjecy-Šunow wobhladali. „Mužojo nimaja so lochko“ rěkaše lóštna inscenacija, kotruž je dźesać lajskich hrajerjow z telko lóštom a temperamentom přihladowarjam zahrało. Hižo tema „Bur pyta žonu“ a telko rjanych a sprawnych žorćikow wuwabichu wulke wjeselo, a tak knježeštej na žurli jara dobra nalada a stajne smjeće.
W tutym kołwrótnym času, hdźež najlěpje medije nječitaš abo njehladaš, bě to rjana a tež wažna wotměna, so jónu zaso tak prawje smjeć. Za to wupraju w mjenje zawěsće wšěch w publikumje zapłać Bóh za poradźene předstajenje. Sće wulkotnje hrali!
A za tych, kotřiž dyrbjachu přepjelnjeneje žurle dla bohužel domoj hić: Maće hišće móžnosć, sej wjesołu komediju dwójce wobhladać, a to 26. februara w Haslowje abo njedźelu, 5. měrca, w Kubicec hosćencu w Lejnje – stajnje w 16 hodź.
Hrajerjam přeju dale tajki elan a dobry publikum. Weronika Bulankowa
Přechod po rozpušćenju přewodźeć
Město Wojerecy chce prawnisce wěsty likwidaciski proces sportoweho zwjazka Łužiska jězorina zaručić. Za to społnomócnjeny je wyši měšćanosta Torsten Ruban-Zeh.
Wojerecy (AK/SN). Město Wojerecy chce po rozpušćenju sportoweho zwjazka Łužiska jězorina prawnisce jasne a wěste rozrisanje namakać. Jednohłósnje schwali měšćanska rada wutoru wotpowědne zasadowe wobzamknjenje. Wona społnomócni wyšeho měšćanostu Torstena Ruban-Zeha (SPD), jednanja ze sportowym zwjazkom w běhu likwidaciskeho procesa wjesć. Jednanja zapřijeja wšitke trěbne wozjewjenja a prawniske naležnosće kaž tež wotpowědne zrěčenja w zwisku z rozpušćenjom. Nimo toho dyrbi wyši měšćanosta měšćansku radu prawidłownje, dypkownje a wobšěrnje wo stawje likwidaciskeho procesa informować.
Policija (08.02.23)
Najwjac w Budyšinje demonstrowało
Na wšelakich demonstracijach póndźelu wječor je so w Budyskim a Zhorjelskim wokrjesu nimale 2 690 wosobow wobdźěliło, policija wčera zdźěli. Najwjace běchu w Budyšinje (900), Zhorjelcu (420), Žitawje (330), Kamjencu (180) a Lubiju (120). Tematisce měrjachu so hromadźenja přewažnje přećiwo aktualnym politiskim rozsudam, zdźěla bu wójna w Ukrainje naspomnjena.
W Lutobčanskim předewzaću Femtech-Landtechnik wobstaruja hladanske ...
Socialne hospodarstwo?
Krótkopowěsće (08.02.23)
Zakładna šula městno njeskutka
Drježdźany. Ličba prawicarsce motiwowanych chłostanskich skutkow na sakskich šulach je loni přiběrała. To wujewi wotmołwa kultusoweho ministerstwa na małe naprašowanje zapósłanče Kerstin Köditz (Lěwica). Po tym je policija w lěće 2022 dohromady 73 wotpowědnych padow registrowała, 2021 bě jich 53. Köditz ma za perfidne, zo bě w 13 padach zakładna šula městno njeskutka.
Přihot hłowneje zhromadźizny
Budyšin. Prezidij Domowiny prosy župy a čłonske towarstwa, swojich delegatow za hłownu zhromadźiznu hač do 26. februara pomjenować a mjena zarjadej sposrědkować. Čłonojo Domowiny měli namjety za wobzamknjenja hłowneje zhromadźizny hač do 1. apryla zapodać. Po tym so jenož z wopodstatnjenjom chwatnosće najpozdźišo na spočatku hłowneje zhromadźizny přiwozmu.
Premjerny wječork z Łušćanskim
Hońtwjerske prawo změnić
Wjelki a bobry zawinuja w Zhorjelskim wokrjesu dale a wjetše škody
Zhorjelc (AK/SN). Wobě družinje zwěrjatow stej kruće škitanej. Potajkim njesmědźa so po Zwjazkowym přirodoškitnym zakonju honić. Bobr a wjelk pak zawinujetaj ratarjam, lěsnikam, hońtwjerjam a komunam w Zhorjelskim wokrjesu dźeń a wjace ćežow. „Trjebamy změnu hońtwjerskeho prawa. Škit bobra a wjelka dyrbi so w zmysle přirodoškita přepruwować“, wuzběhny krajny rada Stephan Meyer (CDU) tele dny w Zhorjelcu.
