Budyšin. Štóž ma zajim za rěčny kurs čěšćiny wot 18. julija hač do 15. awgusta 2024 w Praze abo wot 11. awgusta hač do 2. septembra 2024 w Čěskich Budějovicach, njech w Rěčnym centrumje WITAJ hač do 15. měrca swoje přizjewjenske podłožki woteda (Póstowe naměsto 2, 02625 Budyšin, e-mail ). Wotpowědny formular a dalše informacije su na internetnej stronje přistupne.
Awtorka čita swoje basnje
Budyšin. „innen bröckelt die unerhörte schicht“ rěka nowa zběrka basnjow, kotruž je Měrana Cušcyna zestajiła. Z pomocu Kulturneje załožby Swobodneho stata Sakskeje staj ju Jayne-Ann Igel a Jan Kuhlbrodt w Lipšćanskim Poetenladen wudałoj. Zběrku předstaji awtorka štwórtk, 1. februara, w 19 hodź. w Budyskej Smolerjec kniharni.
Hólc wjewjerčku wuchował
Mužakow. Zo móžeš so w nimale kóždej naležnosći na policiju wobroćić, je póndźelu po wšěm zdaću hólc w Mužakowje wědźał a tak najskerje wjewjerčce žiwjenje wuchował. Hólčec wobydlerskemu policistej zdźěli, zo je w měšćanskim parku wjewjerčka zranjena, a jeho k njej wjedźeše. Policist zranjenja spózna a informowaše Załožbu hrabje Pücklera. Jeje sobudźěłaćerjo dowjezechu štyrinohateho pacienta do Běłowodźanskeho zwěrjenca, hdźež so dale wo njeho starachu.
Budyšin (UM/SN). Štóž je bywši dom za požadarjow azyla w tak mjenowanym Budyskim Greenparku při Flincowej posledni raz před něhdźe lětom widźał, drje kompleks z třoch bydlenskich domow lědma zaso spóznawa. Tehdy prezentowachu so domy jenož takrjec jako skelety bjez wonkownych sćěnow. Dźensa wuhlada wopytowar barbnje wuhotowane twarjenja z wulkimi woknami. Wopyt wšak tak jednorje scyła móžny njeje, znajmjeńša nic bjez přizjewjenja. Wšako jedna so wo priwatnu ležownosć a bywši Greenpark słuži dźensa cyle hinašemu zaměrej.
Budyšin (CS/SN). Na njedawnym posedźenju dźěłoweho kruha za serbske naležnosće města Budyšin běše tež wuhódnoćenje lońšich Wjacławskich wikow tema zetkanja. W tutym zwisku přemyslowachu čłonki a čłonojo kruha tež wo tym, što móhli lětsa lěpje činić.
Wustup Radworskeje swjateje Borbory 4. decembra bě so jara derje přiwzał, rozprawja Götz Müller, kotryž je wiki krótkodobnje sobu organizował. Hinak hač Bože dźěćatko, kotrež bě hewak serbske akcenty sadźało, bě Boborka proaktiwnje z wopytowarjemi do kontakta přišła a to je derje tak. Tež adwentne spěwanje, organizowane wot towarstwa Škit, bě wuspěch, byrnjež pod techniskimi brachami chětro ćerpjeło. Sobustaw towarstwa Robert Krawc pak přilubi, zo chcedźa program tež lětsa zaso přewjesć. Dźěłowa skupina Wjacławske wiki bě so tež po wšelakich hodownych wikach rozhladowała. Někotre z nich přepodadźa wobhospodarjenje wikow na priwatnych koncesionarow. Tole pak za Budyšin žana opcija njeje, wšako hroža imensne podróšenja.
Pytaja nowe ideje za staru šulu
Wojerecy. „Šula při planetariju“ we Wojerecach ma so na městno wutworić, kotrež inowaciju, kubłanje a zhromadnosć spěchuje. K zdobywanju idejow přewjedźe projekt „NewCityConcepts“ interaktiwnu planowansku dźěłarničku. Jeje hłowny zaměr je, ideje za dalewužiwanje areala a twarjenjow namakać, konkretizować a wizualizować.
Po zwadźe baru zapalił
Liberec. Wopytowar je wčera w nocy w Liberecu po zwadźe z posłužowarku baru zapalił. To zdźěli čěska nowina MF Dnes. 15 ludźi so zrani, sydom z nich ćežko. Jich dowjezechu wuchowanske jednotki z helikopterom do bliskich chorownjow. Skućićel ćekny. Kriminalna policija za nim podhlada wohrožowanja zjawnosće dla slědźi a prosy swědkow wo dalše pokiwy.
Protyku wojakow spalili
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (37).
Budyšin. „innen bröckelt die unerhörte schicht“ rěka nowa zběrka basnjow, kotruž je Měrana Cušcyna zestajiła. Z pomocu Kulturneje załožby Swobodneho stata Sakskeje staj ju Jayne-Ann Igel a Jan Kuhlbrodt w Lipšćanskim Poetenladen wudałoj. Zběrku předstaji awtorka štwórtk, 1. februara, w 19 hodź. w Budyskej Smolerjec kniharni.
Wobchod zaso wočinjeny
Pančicy-Kukow. Po wobnowjenju klóšterskeho wobchoda w klóštrje Marijinej hwězdźe w Pančicach-Kukowje je wobchod nětko zaso wočinjeny a kupcow wot póndźele do pjatka stajnje wot 10 do 16.30 hodź. přeprošuje. W februaru je wobchod sobotu zawrjeny. Štwórtk, 1. februara, w 15 hodź. změja tam domyswjećenje. K tomu su wšitcy zajimcy wutrobnje přeprošeni. Po tym poskićuja kofej a tykanc.
Wojerecy (AK/SN). Klinikum łužiskeje jězoriny we Wojerecach móže bórze moderny ambulantny operaciski wobłuk wužiwać a tak pacientow njekomplikowanišo zastarować. Po sydom měsacach twarskeho časa je wobłuk dotwarjeny. Za to wudachu něhdźe 500 000 eurow. Zapłaćili su sumu z pawšalnych připokazanjow we wobjimje 1,7 milionow eurow, kotrež kóžde lěto wot Swobodneho stata Sakskeje dóstawaja. Přichodnje budu tak operacije rukow, kolenow a tak mjenowane špihelowanje brjucha móžne. Dźěłać budu tu mjez druhim team za operacije a dalši za anesteziju kaž tež sobudźěłaćerce za přijimowanje pacientow a za zarjadniske wotběhi. „9. februara damy přewětrjensku připrawu doskónčnje pruwować. Tomu přizamknu so testowe dny“, jednaćelka klinikuma Juliana Kirfe minjeny pjatk rozłoži. „Srjedź februara móžemy prěni raz operować.“