Krótkopowěsće (10.12.24)
Nowa skupina PEN-centruma
Darmstadt. Dohromady 21 awtorkow a awtorow z Durinskeje, Berlina a Braniborskeje kaž tež ze Sakskeje a Sakso-Anhaltskeje je minjenu sobotu Skupina Lipsk mjenowanu nowu sekciju Němskeho PEN-centruma załožiło. Zaměr skupiny je mjez druhim, „dialog z kolegami z wuchodnych a južnych susodnych krajow aktiwizować“. Jako prěnjeho rěčnika wuzwolichu Benedikta Dyrlicha.
Zažny rabat za filmowy festiwal
Wulke Hendrichecy. Towarstwo Kunstbauerkino přijimuje hišće hač do kónca lěta namjety za program klětušeho Nysoweho filmoweho festiwala (NFF). Zdobom zarjadowarjo informuja, zo su wotnětka tak mjenowane Early-bird-tikety na předań, zmóžnjace zajimcam sej wšitke předstajenja za 40 eurow wobhladać. NFF wotměje so wot 20. do 25 meje.
„Hodowny pokoj“ w zarjedźe
Strowotniski centrum do wjesneho ambulatorija
Gmejna Wulka Dubrawa je mału polikliniku na kromje wsy na předań wupisała. Móžni zajimcy dyrbja jasne žadanja za přichodne wužiwanje twarjenja spjelnić.
Wulka Dubrawa (UM/SN). Lěkarske zastaranje je jedna z najwažnišich temow komunalneje politiki we wjesnej kónčinje. Wulkodubrawska gmejna zda so w tym nastupanju na prěni pohlad derje wuhotowana być. Wšako maja jeničce we hłownej wsy komuny dweju domjaceju lěkarjow, dweju zubneju lěkarjow a nimo toho fachoweho medicinarja. Byrnjež pak zdała so Wulka Dubrawa z lěkarskimi praksami lěpje zastarana być hač druhe komuny, móhło so to starobneje struktury dla spěšnje změnić.
Seniorojo škotuja
Budyšin. Posledni lětuši škotowy turněr serbskich seniorow wotměje so jutře, wutoru, w Budyskej rezidency seniorow. Tam zwěsća cyłkowneho dobyćerja lětušich měsačnych zetkanjow. Započatk budźe w 14 hodź. Prěni turněr 2025 wotměje so 28. januara w Lejnjanskim Kubicec hosćencu.
Serbski wječor w geoparku
Mały Kólsk. UNESCO-geopark Mužakowski zahork přeprošuje srjedu, 11. decembra w 17 hodź. na serbski filmowy a kulturny wječor. W historiskim ambienće Stareje cyhelnicy w Małym Kólsku (Klein Kölzig) předstaja serbske hodowne filmy kaž tež serbske pěsnje. Nimo toho podawaja organizatorojo regionalne jědźe a napoje. Dokelž je ličba wobdźělnikow wobmjezowana, proša wo přizjewjenje a to pod tel. čo. 035600 365607 abo z mejlku na . Wopytowarjo maja tež składnosć, sej aktualnu wuměłstwowu wustajeńcu w domje wobhladać.
Awtorka čita
Hač do połnocy spěwali
W Jaseńcy jědnaty raz beneficny koncert zarjadowali
Jaseńca (fk/SN). Na dwěsćě ludźi zeńdźe so sobotu wječor w Jaseńcy na hižo jědnaty beneficny koncert. Wuhotowałoj stej jón skupinje PoŠtyrjoch a Wólbernosće. Znaty muski kwartet zahaji wječor ze šibale přepisanym Adeste fideles: „Atesty za spěwanje njetrjebaće dźensa w Budarjec bróžni, nětko poskajće! (…) Tuž prošu šćedrje dajće, projekty podpěrajće na beneficnym wječorku we Jaseńcy!“ Mjeztym zo wotmě so zarjadowanje zašłych dźesać króć na Rynčec statoku, běštaj lětsa prěni króć Budarjec mandźelskaj Marija a Bernd hosćićelej. Hromadźe ze šwitu pomocnikow běštaj bróžnju a stan wulkotnje wupyšiłoj. W přitulnej atmosferje, ke kotrejž přinošowaše w derje wutepjenej rumnosći tež na sćěnu projicěrowany wohenčk w kaminje, zanjese muska spěwna štwórtka najprjedy wěnčk znatych adwentnych kěrlušow a spěwow. Spěwarjo zamóchu připosłucharjam z čućiwymi interpretacijemi měrnych pěsnjow prawu dohodownu naladu nakuzłać.
Policija (09.12.24)
Do nakupowanišća so zadobyli
Wulka Dubrawa. Njeznaći skućićeljo su so sobotu wječor z namocu do nakupowanišća na Thälmannowej we Wulkej Dubrawje zadobyli. Spakosćili pak ničo njejsu, dokelž zaskoči alarmowa připrawa, tak, zo dyrbjachu městnosć njeskutka nanajspěšnišo wopušćić. Wěcna škoda wučinja něhdźe 4 000 eurow. Kriminalna słužba Budyskeho policajskeho rewěra je slědy na městnje zawěsćiła a pad nětko přepytuje.
Adwentnička z dorostowym chórom
Budyšin (CRM/SN). Dorostowy chór 1. serbskeje kulturneje brigady běše sej předsydstwo župy „Jan Arnošt Smoler“ minjene dny na adwentničku do Serbskeho domu přeprosyło. Tak měješe popołdniše zarjadowanje na žurli za swjedźensce pokrytymi blidami dobry kulturny ramik.
Pod nawodom wučerki Jutith Škodźineje zaspěwa dorostowy chór Serbskeho gymnazija Budyšin z čerstwymi młodymi hłosami a z wotpowědnym klawěrnym přewodom pisanu sep serbskich kaž tež druhich předhodownych pěsnjow. Tak stwori so ze spěwami kaž „Z běłym sněhom“, „Přadła je Marja kudźałku“ a „Bratřiko, stań“ dobra duch a dušu wokřewjaca nalada. A je wočiwidne, zo kubła so tu na gymnaziju sobu dobry hudźbny dorost. Županka Leńka Thomasowa so gymnazialnemu cyłkej tuž z wutrobnymi słowami a słódnym darikom swjateho Mikławša podźakowa.
Krótkopowěsće (09.12.24)
Woheń w milinarni wudyrił
Hamor. W Hamorskej milinarni je so zawčerawšim rano paliło. Po informacijach energijoweho koncerna LEAG bě woheń krótko po połnocy wudyrił. Potrjechena bě připrawa, kotraž zawod z brunicu zastaruje. W zwisku z wohenjom dyrbjachu zamołwići dwaj blokaj milinarnje wotšaltować. Zastaranje z ćopłotu města Běłeje Wody je dale zaručene.
Serbja w SPD koaliciju chwalili
Drježdźany. Krajne dźěłowe koło „Serbja“ sakskeje SPD je z koaliciskim zrěčenjom CDU/SPD spokojom, wšako su jich žadanja kaž reformu Serbskeho zakonja wobkedźbowali. Kaž ko-rěčnik koła Měrćin Krawc připowědźi, chcedźa nětko na konkretnym zwoprawdźenju postajenja sobu skutkować, za ma serbowanje požadarja w přichodźe plusdypk na wupisanjach w zjawnej słužbje być.
Němčina jako hamtska rěč?
Přednošuje wo Sawdi-Arabskej
Chrósćicach. We wobłuku 13. kulturneje zymy putniskeje hospody Chrósćicy přednošuje tam jutře, sobotu, wot 19.45 hodź. Beno Bělk wo Sawdi-Arabskej. Hač do 2019 bě Sawdi-Arabska za wukrajnych wopytowarjow kruće zawrjeny kraj. Po koronje tam hakle w lońšej nazymje zaso prěni cuzy do kraja přijědźechu. Beno Bělk je tam lětsa w januaru měsac dołho po cyłym kraju jěł. Wosebje jeho zajimowaše, kak so žonam w kraju wjedźe. Dale je wopytał Medinu a Mekku – za muslimow swjatej měsće, za njewěriwych pak wostanjetej zawrjenej. Kak je so jemu poradźiło měsće tola wopytać a što je tam dožiwił, budźe dźěl rozprawy. Hižo w 16 hodź. pokazuja za najmjeńšich dźěćace kino.
Wječork na nowym městnje
Energijowe zastaranje přichoda
Kulow (AK/SN). W swojim projekće „ZellSys“ zestajeja wědomostnicy Drježdźanskeje Techniskeje uniwersity (TU) tuchwilu studiju, w kotrejž přepruwuja móžnosće a šansy změny energijoweho zastaranja w Kulowje na t. mj. celularne energijowe systemy. Fokusěruja so při tym na wobnowjomne energije we wobłukach ćopłota, milina a płun.
Do projekta słuša zestajenje energijoweho atlasa hladajo na potrjebu ćopłoty a miliny wobydlerjow. Hač do měrca 2025 maja wuslědki předležeć. „W lěće 2023 smy w tutym zwisku prěnje wobydlerske naprašowanje přewjedli“, pisaja wědomostnicy TU w zdźělence. Hač do 6. decembra naprašuja so druhi raz. „Centralna tema za nas je, zo nazhonjenja z regiona derje ze scenarijemi přichoda zwjazamy“, wědomostnicy wuzběhnu. Woni proša wobydlerjow wo čiłe wobdźělenje na tuchwilnym druhim naprašowanju.
Lěto wulce wužadace było
Spočatk 2025 zahaja horcu fazu přetwara Worklečanskeje šule
Worklecy (JK/SN). Wolóženi, ale nic cyle spokojom su Worklečanscy gmejnscy radźićeljo srjedu swoje lětuše poslednje posedźenje zmištrowali. Lětsa mějachu dosć wužadanjow, wosebje dla přetwara wobeju šulow a z tym zwisowacych organizatoriskich a financnych prašenjow. Z pomocu mnohich podpěraćelow a fachowcow pak wšo derje zmištrowachu, tež hdyž zwostanje jěry přisłód, kaž wjesnjanosta Clemens Poldrack (njestronjan) zwurazni. „Smy našim wobydlerjam wjele přicpěli a woni to nažel w swojich móšničkach pytnu. Tola nam ničo druhe njezwosta, jeli mamy nadawk so konsolidować.“ Poldrack pak tež mnoho dobrotow naspomni, kaž nowe hrajkanišća we Worklecach, Smječkecach, Nowej Wjesce a Wudworju. Na Worklečanskej kupje je rjane zetkanišćo nastało, na kotrež móža Worklečenjo hordźi być. We Wudworju je wjesna zhromadnosć natwariła rjany dožiwjenski areal z hrajkanišćom a móžnosću zetkawanja. Mjenowany areal „Wudworska kobłarnja“ je w hrubym dotwarjeny a so klětu nalěto z dodatnymi dźěłami wudospołni.
