Tež hdyž temperatury tuchwilu runje zymske njejsu, su ptački ...
Serbske hody dźěćom wosrjedź Wojerec znazornili
Wojerecy (SN/mb). Kak su ludźo před sto lětami we Wojerecach hody swjećili? Wotmołwu na to je wčera županka Gabriela Linakowa něhdźe połsta zajimcam, mjez nimi bě wjele dźěći, w měšćanskej Brigitty Reimannowej knihowni rozłožiła. A to w ramiku „žiweje adwentneje protyčki“, kiž je w starym měsće hižo wjele lět z tradiciju. Lětsa je wona zaso tež w nowym měsće po puću. Składnostnje durčkow 18. decembra stej Linakowa a filmowča Angela Šusterowa ludźi ze serbskimi hodami do doby kombinata Čorneje Pumpy a natwara noweho města zeznajomiłoj. Najprjedy witaše Linakowa wopytowarjow w swojej maćeršćinje: „Lube dźěći, lubi starši, lube wowki a dźědojo, lubi přihladowarjo!“ Zarjadowanje sćěhowachu tež čłonojo serbskeje přirady města.
Drohotny pokład za generacije
Budyšin (CS/SN). Budysku wohnjowu woboru su w lěće 1780 załožili. Wona je tuž najstarša wohnjowa wobora Němskeje. Wuslědźił je to hobby-stawiznar Heinz Ebersbach. Wjele lět je wón stawizny Budyskeje wohnjoweje wobory přeslědźił. Wuslědk nětko předleži. We wobłuku posedźenja Budyskeje měšćanskeje rady přepoda 91lětny wčera zhotowjenu chroniku wyšemu měšćanosće Karstenej Vogtej (CDU) a nawodźe powołanskeje wohnjoweje wobory Markusej Berganderej. Posledni mjenowany je slědźerja při jeho rešeršach přewodźał. Ale tež sobudźěłaćerjo archiwneho zwjazka a měšćanskeje biblioteki kaž tež Muzeja Budyšina su Heinza Ebersbacha podpěrowali. Chronika je drohotny pokład za přichodne generacije.
Krótkopowěsće (19.12.24)
Jednanja wobkrućili
Zhorjelc. Kaž z rešeršow sćelaka MDR Investigativ wuchadźa, mějićel Zhorjelskeje twornje Alstom hižo měsacy z brónjenskim koncernom KNDS jedna. Tole je Alstom nětko samo wobkrućił. Detaile hišće žane znate njejsu. Po informacijach MDR pak chcedźa tam mjez druhim dźěle za pancer typa Boxer zhotowić.
Dalši móst zawrjeny
Großenhain. Po pruwowanju mosta B101 na juhu Großenhaina we wokrjesu Mišno, je twar wotnětka za wobchad zawrjeny. Nětko tam krótkodobnje spotorhanje mosta přihotuja, zdźěli krajny zarjad za dróhotwar. Z toho potrjechene su šoferojo jězdźidłow a zwisk Němskeje železnicy mjez Drježdźanami a Berlinom. Po tym, zo je so Drježdźanski Caroliny móst sypnył, fachowcy w Swobodnym staće mosty přepruwuja.
„Ludowědne“ kachle wuchowali
Slepjanski musical w Kamjenicy
Wotewru 20. durčka
Policija (18.12.24)
Porsche 90 km/h přespěšnje jěł
Wochozy. Policija je póndźelu popołdnju we Wochozach wodźerja Porsche lepiła, kotryž měješe přewšo nuzne. Na zwjazkowej dróze B 156, hdźež směš 70 km/h spěšnje po puću być, su 528 jězdźidłow kontrolowali. 111 šoferow bě přespěšnych. Z nich ma 41 warnowanski pjenjez zapłaćić, na 70 wodźerjow čaka pokuta. Najspěšniši bě Porsche z němskim čisłom. Jeho wodźerja lepichu ze 160 km/h. Katalog pokutnych pjenjez předwidźi za to dwaj dypkaj w Flensburgu, 700 eurow pokuty a tři měsacy trajacy zakaz jězdźenja.
Wječor cyle wosebiteho razu
Mały Kólsk (JoS/SN). Nancy Sauer, direktorka Europskeho zwjazka za teritorialnu kooperaciju (EVTZ) w Geoparku Mužakowski zahork, njebě swojim hosćom přewjele slubiła, jako praji: „To budźe dźensa wječor cyle wosebiteho razu.“ A woprawdźe – na kóncu zarjadowanja, kotrež běše EVTZ zhromadnje ze Załožbu za serbski lud, Serbskim kulturnym centrumom (SKC) w Slepom a Serbsko-němskej filmowej syću Łužycafilm organizowali, běchu wopytowarjo zahorjeni. Tema wječora w Starej Cyhelnicy w Małym Kólsku (Klein Kölzig) běše serbske dźěćatko/dźěćetko.
Wječor zahajištej w Slepjanskej narodnej drasće Marita Kavelmann a Doreen Rösler z hodownymi pěsnjemi a kěrlušemi, kotrež w Slepjanskej narěči kaž tež němsce zanjeseštej. W tamnišej wosadźe stej wonej derje znatej spěwarce. Regionalna rěčnica Domowiny Diana Maticowa běše zestawu fotow Michaela Zecha wo narodnych drastach z fotoweje wustajeńcy w SKC sobu přinjesła. Wjeršk wječora wšak běchu potom serbske filmy, do kotrychž zawjedźe projektowa koordinatorka filmoweje syće Angela Šusterowa.
Město dawkowe sadźby zniži
Kulow (AK/SN). W nowym lěće płaća w Kulowje nowe sadźby za ležownostny dawk. Tole su měšćanscy radźićeljo na swojim posedźenju w decembru jednohłósnje wobzamknyli. Tak reagowachu woni na tak mjenowanu neutralitu dochodow, kotruž zakonjedawar w zwisku z reformu ležownostneho dawka předpisa. Sadźba za ležownostny dawk A, potajkim za płoniny ratarstwa a lěsnistwa, zniži so wot 335 na 280 procentow. Za ležownostny dawk B wo wobtwarjenju a njewobtwarjenju ležownosće, płaći wot noweho lěta sadźba 410 procentow město dotal 420 procentow. Sadźba za přemysłowy dawk so z 370 procentami njezměni.
Pokład žada sej wudawki
Hród a park Njeswačansku gmejnu dźeń a bóle poćežujetej
Njeswačidło (JK/SN). Zo ma Njeswačanska gmejna wulke starosće z tamnišim parkom a hrodom, ničo noweho njeje. Zachowanje a hladanje wobeju drohoćinkow žada sej wjele wudawkow, kotrež dyrbja we wobłuku swojich dobrowólnych nadawkow zwjesć. A wudawkow za to njeje runje mało. Hižo dlěši čas žadaja sej čłonojo gmejnskeje rady přehlad wo dochodach a wudawkach hrodu a parka.
Na minjenym posedźenju gmejnskeje rady radźićelam bilanca hrodu a parka předležeše. Pod smužku steješe wulka čerwjena ličba. Měnjenja a namjety za rozrisanje problema su rozdźělne. Někotři chcedźa dochody zwyšić, druzy wudawki pomjeńšić. Dalši chcedźa hród a park do rukow statneje institucije wotedać, kotraž sakske hrody a parki wobhospodarja. Tutu poslednju móžnosć wjesnjanosta Gerd Schuster (CDU) a někotři radźićeljo raznje wotpokazuja, dokelž stej hród a park njedźělomnje z wjesku a gmejnu zwjazanej. Hač statna institucija při tuchwilnej napjatej situaciji tež w Sakskej scyła wo to rodźi, njeje jasne.
