Swójske srědki pobrachowali
Ze smějacym a płakacym wóčkom gmejna na zašłe lěto zhladuje
Njebjelčicy (JK/SN). Na spočatku noweho lěta zhladuja mnohe komuny na minjene lěto, zo bychu swoju dźěławosć bilancowali a sej zakład za dźěło w nowym lěće stworili. Tak čini to tež Njebjelčanski wjesnjanosta André Bulank (njestronjan). Při wšitkich ćežach, kotrež Njebjelčanska gmejna wosebje na financnym polu ma, móže so dźěło lěta 2024 widźeć dać. Jara wažne za gmejnu bě, nastajić hospodarski plan. To pak bě kaž hižo w předchadźacym lěće jenož z wosebitymi dochodami z přemysłoweho dawka móžno. Zakład za porjadnu dźěławosć gmejnskeje rady a gmejnskeho zarjadnistwa su načasne hłowne wustawki, kotrež su hnydom na spočatku lěta wobzamknyli, runje tak kaž nowy jednanski porjad, płaćacy wot awgusta. Zo su jedyn z pjeć kreditow zapłaćić móhli, bě za gmejnski budget jara spomóžne.
Žadyn přichod za móst pola Zdźěrje
Zdźěr (UM/SN). Dny mosta na kromje Zdźěrje pola Wulkeje Dubrawy su ličene. Kaž wjesnjanosta Hardy Glausch (njestronjan) na naprašowanje zdźěli, na městnje dodźeržaneho žadyn nowy móst njenatwarja. Město toho chcedźa wužłobinu, w kotrejž bě něhdy železniska čara z Wulkeje Dubrawy do směra na Wóspork, nasypać. Wotpowědne wobzamknjenje je gmejnska rada hižo srjedź 2024 schwaliła. Tole je so mjez wšitkimi móžnymi wariantami jako najlěpša wujewiła. Přiwšěm ma tele předewzaće něhdźe 448 000 eurow płaćić. „Próstwy wo spěchowanske srědki su zapodate, smy w fazy planowanja“, tak Wulkodubrawski wjesnjanosta.
Přeprěčenje něhdyšeje železniskeje čary je wažny dypk w regionalnej syći kolesowanskich šćežkow. Mjez druhim wjedźe tule Sprjewiny kolesowanski puć. Na hornjej kromje ma nasyp asfaltowu krónu dóstać. Deleka měli jón tež zwěrjata po małym tunlu přeprěčić móc.
Njewšědny napohlad skićeše so tele dny přistajenym serbskich ...
Krótkopowěsće (14.01.25)
Wuttke so na wuměnk podała
Budyšin. Po nimale třoch lětdźesatkach je direktorka Budyskeje studijneje akademije prof. dr. Barbara Wuttke kubłanišćo wopušćiła a so na zasłuženy wuměnk podała. Wot lěta 2013 je wona akademiju nawjedowała a hladajo na kubłanišćo wažne rozsudy tworiła. Wot spočatka tutoho lěta je akademija Wysoka šula, štož je Wuttke aktiwnje přewodźała.
Awće masiwnje wobškodźili
Bóšicy/Hora. W běhu zeńdźenja oldtimerow na Horje su dotal njeznaći skućićeljo na parkowanišću blisko wjesneho hata sobotu wječor lak dweju jězdźidłow masiwnje wobškodźili. Wěcna škoda wučinja něhdźe 20 000 eurow. Kriminalna słužba Budyskeho policajskeho rewěra je přepytowanja zahajiła.
Wustajeńca Božich narodkow
Camprowarjo zaso na wsach po puću
Rowno (JoS/SN). Nad srjedźnej Łužicu je so sobotu rano mócnje sněhowało. W Rownom pak chcychu swójby na tradicionalne wašnje camprować. Hladajo na připowědźene wjedro je na předwječoru hišće krizowa skupina wuradźowała. Camprowanje wotprajić pak žana opcija njebě. We wsy su dotal při kóždym wjedrje camprowali, tež w sněze, zamołwići swój rozsud zakitowachu. Tež wobmyslenja zo móhło so mjenje ludźi wobdźělić, běchu njewoprawnjene.
Zwjeselace bě, zo je wjele dźěći sobu camprowało a so originelnje předrasćiło. Tak je šikwana micka runje tak sobu šła kaž lodohokejowy hrajer. Wjele časa su wobdźělnicy za dźěło na kostimach nałožowali. Najćoplišo zdrasćenaj drje běštaj sněhowej mužej, kotrymajž bě sněh po wšěm zdaću wšojedne. Wusłuženy rolator běchu na mobilnu baru přetwarili, wšako wšitkim darićelam na jich statoku słódnu kapku poskića.
Pytaja kreatiwne projekty za wobydlerski etat
Budyšin (SN/MWj). Wobydlerjo sprjewineho města maja nětko zaso móžnosć z mjeńšimi předewzaćemi swoje město porjeńšić. Tole zmóžnja wobydlerski etat, kiž kóždolětnje pjenjezy přewostaji, zo móhli so mjeńše naprawy zwoprawdźić. W tymle lěće steji dohromady 20 000 eurow k dispoziciji. Budyski wyši měšćanosta Karsten Vogt (CDU) so na prawje wjele próstwow wjeseli. Kaž wón w nowinskim wozjewjenju zdźěli, skića 20 000 eurow tójšto kreatiwnych móžnosćow we wobłuku wobydlerskeho etata. „Hižo małe ideje móža wulke wuskutki měć a zhromadnosć wobydlerjow w měsće zesylnić.“
Zo bychu w lěće 2025 dosć časa za zwoprawdźenje jednotliwych projektow měli, měli wobydlerjow swoje namjety hač do 31. januara zapodać. Na internetnej stronje pod nadeńdu zajimcy wuměnjenja za zapodaće próstwow a tež wotpowědny formular.
Radźićeljo wuradźuja
Pančicy-Kukow. Přichodna zjawna zhromadźizna zarjadniskeho zwjazka Při Klóšterskej wodźe wotměje so jutře, 14. januara, w 19 hodź. w sydarni zarjadniskeho zwjazka w Pančicach-Kukowje. Na dnjowym porjedźe stejitej mjez druhim hospodarski plan 2025 a přistup k zaměrowemu zwjazkej Komunalne předźěłanje informacijow Sakska.
Přihotuja wustajeńcu
Radwor. Spěchowanski kruh za serbsku ludowu kulturu a Dwórnišćo inkluzije Radwor přihotujetej tuchwilu wuměłsku wustajeńcu. Pod hesłom „Dwórnišćo pisanosće“ wotewru pjatk, 17. januara, w 17 hodź. přehladku na něhdyšim dwórnišću w Radworju. Wot 16 hodź. su zajimcy na kofej přeprošeni. Po tym je składnosć sej ekspoziciju wobhladać. Twórby dorostowych kaž tež nazhonitych lajskich wuměłcow z cyłeje Łužicy pokazuja widy na Radwor, kiž su w lěću 2023 na kónctydźenskej dźěłarničce pod nawodom Maje Nagloweje we wsy nastali.
Zetkaja so na nowym městnje
Dotwar gratownje so dlije
Dnowneje platy dla molerjo z dźěłom pokročować njemóža
Dźěwin (AK/SN). Dotwar noweje wohnjowoborneje gratownje w Brězowce w Dźěwinskej gmejnje so wo něšto tydźenjow dlije. Prěni předwidźany termin kónc lěta 2024 njejsu dodźeržeć móhli. Tole zdźěli twarski nawoda Slepjanskeho zarjadniskeho zjednoćenstwa Steffen Seidlich na zašłym posedźenju Dźěwinskeje gmejnskeje rady.
„Někotre dźěła njejsu hišće zakónčene“, Seidlich rjekny a naliči nutřkowne wuhotowanje, kładźenje kachlicow, elektriku a molerske dźěła. Problemy maja z lěwej dnownej platu z betona. Wona jenož pomału schnyje a je hišće přewłóžna. Tohodla molerjo w tym dźělu twarjenja hišće dźěłać njemóža. Zhromadnje z planowanskim běrowom a gmejnu chce twarski nawoda rozrisanje namakać. Tež wonkowny areal hišće dočinjeny njeje. Kromy, terasa a přechod k Dwórnišćowej dróze drje su hotowe, někotre městna pak maja so hišće wuplestrować. „Nadźijamy so, zo najwjace dźěłow hač do kónca januara wotzamknjemy. Wosebje problem włóžneje dnowneje platy dyrbimy rozrisać“, tak Seidlich.
Dwójnikaj předstajitaj dwójnikow
Dorostowej talentaj Anton a Richard Fuchs z Łutow předstajitaj w filmje jimacu stawiznu dwójnikow Johannesa a Philippa Mickenberger, kotrajž staj přez swój widejowy kanal znataj.
Wojerecy (SiR/SN). Druhdy móžeš dwójnikow Antona a Richarda Fuchsa ryzy optisce derje rozeznawać. Tuchwilu pak je to najskerje trochu ćešo. To móhło na tym zaležeć, zo staj bratraj z Łutow w zašłosći husćišo hromadźe byłoj a so intensiwnišo wudospołnjałoj. Powołansce bratraj po rozdźělnymaj pućomaj kročitaj. Anton je kulturny wědomostnik a dźěła w Krabatowym młynje jako kulturny manager. Richard je wukubłany musicalowy dźiwadźelnik a spěwny pedagoga. Mnozy znaja jeju z Čornochołmčanskich Krabatowych swjedźenskich hrow, kotrež so nětko jako Krabatowa saga dale wjedu.
