Prěni dartowy turněr w garaži
Hišće njeje ničo rozsudźene
Milinowej projektaj Rakečanskeje gmejny njeměr wubudźiłoj
Rakecy (JK/SN). Na nowemberskim posedźenju Rakečanskeje gmejnskeje rady stej dwě předewzaći swoje plany k nastajenju fotowoltaikowych připrawow předstajiłoj. Tehdy dźěše jeničce wo pozadk idejow a wo předstajenje móžnosćow. Při tym wobě firmje wobkrućištej, zo ma gmejna dosć chwile wo poskitku rozmyslować a zo njeje hišće ničo rozsudźene. To pak mnozy wobydlerjo, kotřiž wo projektomaj zhonichu, njewědźachu. Tuž gmejnskich radźićelow prošachu, naležnosć wuswětlić.
Na minjenym posedźenju gmejnskeje rady so wobydlerjo runje tak kaž radźićel Swen Helm (njestronscy wolerjo) w zwisku z předstajenjom projektow słowa jimachu. Najwjetša je starosć wobydlerjow w zwisku ze stejnišćom fotowoltaikoweje připrawy na ležownosći něhdyšeje Muny. Dokelž su wěste dźěle tuteje ležownosće wupokazane jako płoniny k zběranju dnowneje wody jako zakład za pitnu wodu, po měnjenju wjele wobydlerjow wěstota pitneje wody zawěsćena njeje.
Wuhotuja hodowny koncert
Chrósćicy. Tradicionalny hodowny koncert Chróšćanskeho cyrkwinskeho chóra wotměje so njedźelu, 5. januara, w 14 hodź. w Chróšćanskej cyrkwi. Mjez druhim jón dźěćacej šoli a dujerjo sobu wuhotuja. Wšitcy zajimcy su na hudźbne popołdnjo přeprošeni.
Bufallo Bill w srjedźišću
Budyšin. Cyle w znamjenju dźiwjeho zapada steji přichodne čitanje Budyskeje akademije póndźelu, 6. januara, we 18 hodź. w Budyskej statnej studijnej akademiji. Bywši marketingowy nawoda Radebeulskeho Karla Mayoweho muzeja a nětko w regionalnym managemenće Leaderoweho regiona skutkowacy André S. Köhler porěči wo tym, kak je w lěće 1906 William F. Cody jako Bufallo Bill ze swojim zabawjenskim předewzaćom w Budyšinje pozastał a tu blisko Sćijec dwójce wobydlerjow zawjeselił.
Nowy móst za kolesowarjow
Malešecy (UM/SN). Zarjadnistwo biosferoweho rezerwata Hornjołužiska hola a haty chce na kolesowanskej šćežce mjez Brězynu (gmejna Malešecy) a Lichanjom (gmejna Wulka Dubrawa) móst nad Sprjewju ponowić. Wotpowědny planowanski nadawk je nětko wupisało. Projekt finacuja z pomocu srědkow spěchowanskeho programa za wutwar syće kolesowanskich a pućowanskich šćežkow „WildNatour“.
Tuchwilny móst je dodźeržany a hižo narokam načasneho kolesowanskeho turizma njewotpowěduje. We wupisanskich podłožkach sej zarjadnistwo biosferoweho rezerwata žada, zo maja so w planowanjach za nowy móst tež aspekty naslědnosće kaž emisija wuhlikoweho dioksyda za zhotowjenje twaršćiznow abo móžnosće jich znowawužiwanja wobkedźbować. Dalšej narokaj na nowy móst stej: Wón dyrbi optisce njenapadny dźěl krajiny być a zwěrinje, na přikład wudram, dobre přeprěčenje zmóžnić. Tež wěsta funkcionalnosć mosta jako škit před wulkej wodu je we wupisanskich podłožkach definowana. Nimo toho ma móst tak konstruowany być, zo móža jón jenož pěškojo a kolesowarjo wužiwać.
Nětko wuńdu bjez přiražkow
Kulow (AK/SN). W lěće 2025 liči Kulowski zawod za wopłóčki z pozitiwnym wuslědkom něhdźe 54 000 eurow. Tole zdźěli komornik města Mathias Kockert na zašłym posedźenju měšćanskeje rady. Jeje čłonojo hospodarski plan zawoda jednohłósnje schwalichu. Předwidźane je mjenje wudawkow hač dochodow. Nimo toho chcedźa 114 000 eurow swojich kreditow wotpłaćić. Po wjele lětach komunalneje podpěry wuńdźe měšćanski zawod nětko bjez přiražkow. Hišće w lěće 2021 přida město 82 000 eurow, lěto na to bě to 22 000 eurow a w lěće 2023 na wšěch 75 000 eurow.
„Lěpšeho hospodarskeho połoženja dla móžemy někotre inwesticije zwoprawdźić“, Mathias Kockert rozłoži. Po tym zo su loni někotre klumpy ponowili, su nětko dodźeržane jězdźidła na rjedźe, kotrež dyrbja wuměnić. Dohromady je lětsa 80 000 eurow za inwesticije předwidźane. Mjez druhim dyrbja nowy kolesowy nakładowak wobstarać. Dźěl sumy nałožuja za porjedźenje kanaloweho systema.
Nic jenož jako hwězdni spěwarjo su tele dny třo kralojo w ...
Wosebita jězba wjele ludźi přiwabiła
Krótkopowěsće (02.01.25)
Getrud Wincarjowa zemrěła
Čorny Chołmc. Dołholětna wjesnjanostka a wjesna předstejićerka Čorneho Chołmca je minjenu njedźelu w starobje 84 lět zemrěła. W lěće 1991 bě wona krótki čas zapósłanča CDU w sakskim krajnym sejmje. W Čornym Chołmcu je wona wjele zeskutkowniła. Na jeje iniciatiwu je we wsy Krabatowy młyn nastał. W nowembrje lěta 2016 dósta wona za swój čestnohamtski angažement zasłužbny rjad Zwjazka.
Mike Hauschild nominowany
Budyšin. Swobodni wolerjo Budyskeho wokrjesneho zjednoćenstwa su swojeho kandidata za wólbny wokrjes 155/Budyšin 1 wolili. Čłon Budyskeje měšćanskeje rady, radźićel Budyskeje wokrjesneje rady a samostatny rjemjeslniski mišter Mike Hauschild budźe zaměry a hódnoty Swobodnych wolerjow we wólbnym boju wo sydło w zwjazkowym sejmje zastupować.
Dóstanu wjace mzdy
Policija (30.12.24)
Hody do jastwa
Wudwor. Přikaz zajeća zeskutkownili su zastojnicy Kamjenskeho policajskeho rewěra druhi hodowny swjaty dźeń we Wudworju. 56lětny muž měješe tam pjenježnu pokutu we wobjimje wjacorych stow eurow zapłaćić. Dokelž to njemóžeše, dowjezechu policisća jeho něhdźe w 19.30 hodź. do jastwa.
Rybu pokradnyli
Delni Wujězd. Z njewšědnym padustwom dyrbi so kriminalna słužba Běłowodźanskeho policajskeho rewěra zaběrać. W času wot štwórtka popołdnja hač do pjatka ranja su njeznaći w Delnim Wujězdźe w Hamorskej gmejnje z plahowanskeho basenka 150 kilogramow pstruhow pokradnyli. Po informacijach policije wučinja hódnota rubizny něhdźe tysac eurow.
Třo zranjeni po njezbožu
