Wjac žonow w zamołwitosći
Njeswačanska gmejnska rada nowu legislaturu zahajiła
Njeswačidło (JK/SN). Mnozy wobydlerjo běchu na prěnje posedźenje noweje gmejnskeje rady gmejny Njeswačidło wčera wječor na žurlu tamnišeho wjesneho hosćenca přichwatali. Wjesnjanosta Gerd Schuster (CDU) bilancowaše zašłych pjeć lět dźěławosće gmejny a gmejnskeje rady. Něhdyša gmejnska rada bě 70 razow wuradźowała a wjace hač 250 naprawow wobzamknyła a rozsudow tworiła. Při tym su radźićeljo 2,3 miliony eurow wudawkow wobzamknyli. Tute su přewažnje do wobnowjenja dróhow inwestowali, ale tež za rjedźenje wopłóčkow a planowanje nowotwara pěstowarnje.
Jězba z widom na Sernjany
Krótkopowěsće (21.08.24)
Pjenjezy za dwórnišćo
Wojerecy. Dwórnišćo we Wojerecach ma so ponowić. Tohorunja chcedźa zamołwići ćělnje zbrašenym přistup wolóžić a wotpowědne lifty zatwarić. Swobodny stat naprawy financielnje podpěra. Sakski minister za wobchad Martin Dulig (SPD) je dźensa připołdnju spěchowansku zdźělenku we wobjimje 7,35 milionow eurow přepodał.
Tójšto namocy do wólbow
Drježdźany. Hižo wjace hač 900 přeńdźenjow zliči sakske nutřkowne ministerstwo w zwisku z komunalnymi, europskimi a krajnymi wólbami. Najwjace z nich, mjenujcy 815, běchu wobškodźenja wólbnych plakatow. Wosebje potrjechenej běštej při tym AfD a SPD. Dohromady zličichu tež 14 namócnych njeskutkow.
Žiwjenske wočakowanje stupa
Wiesbaden. Žiwjenske wočakowanje zaso stupa. Přerězne žiwjenske wočakowanje wučinješe w Němskej w lěće 2023 za žony 83,3 lěta a za muži 78,6 lět, zwjazkowy statistiski zarjad dźensa rozprawja. Za čas korony mjez lětom 2020 do 2022 je so žiwjenske wočakowanje pola muži kaž tež pola žonow wo 0,6 lět porno lětu 2019 znižiło. Niwow z lěta 2019 pak njeje hišće docpěty.
Roglič přewza čerwjeny trikot
Policija (21.08.24)
Warnowanje před wobšudnikami
Zhorjelc. Zhorjelska kriminalna policija warnuje před wopačnym online-shopom pod adresu www.fahrradhandel-kramer. de. Wot 29. julija su tam škodowani kolesa skazali, njejsu pak dotal ničo přijeli. Skućićeljo znjewužiwaja daty wobchoda „Fahrradhandel Kramer“.
Wubědźowanje zahajene
Budyšin. Přichodny tydźeń zahaja w Budyskim wokrjesu 12. wubědźowanje „Naša wjes ma přichod“. Na nim jury projekty a iniciatiwy hódnoći, kotrež wobdźělnicy zwoprawdźa. Na aktualnym wubědźowanju wobdźěla so šěsć městow a wsow Budyskeho wokrjesa. Su to Sulšecy, Němcy, Hauswalde, Konjecy-Šunow a Oberlichtenau. Najlěpšej wsy zastupujetej wokrjes klětu na krajnym wubědźowanju.
Spominaja rjekowku
Dobruša. Mariji Simonowej, kotraž je załožerka dźěła Čerwjeneho křiža w Sakskej, wěnuje zjawnosć tuchwilu wulku kedźbnosć. Tuž sobotu, 24. awgusta, w 16 hodź. wotkryje Rada žonow na wsy Sakska z.t. při jeje ródnym domje w Dobruši taflu k wopominanju na tam před 200 lětami narodźenu Serbowku. Tomu sćěhuje poswjećenje pomnika na Starym naměsće wsy. Njedźelu, 25. awgusta, čita so na kěrchowje Trinitatis w Drježdźanach w 14 hodź. z noweje biografije wo njej kaž tež z jeje dopomnjenkow. Zajimcy móža jeje row wopytać. Zarjadowani stej zjawnej.
Čitanje wo dožiwjenjach wowki
Diskusije bywaja wótriše
Radźićelki a radźićeljo noweho wokrjesneho sejmika su so wčera prěni raz schadźowali. Dwě nowej stronje sej swój puć do sejmika namakaštaj: BSW a Swobodni Saksojo.
„Best of“ zazběh pokročowanja „Wjesołeje póndźele“
Budyšin (SN/bn). Po „wulkim naprašowanju“ wotmě so wčera na Budyskim Hłownym torhošću „lětnja edicija“ akcije „Happy Monday Bautzen – Wjesoła póndźela Budyšin“ jako tak mjenowany best of dohromady dźewjeć kulturnych zarjadowanjow. Přinoški běchu nalěto cyłkownje něhdźe 3 000 wopytowarjow na wjacore naměsta sprjewineho města přiwabili. Moderatorojo Katja Gerhardi, Tim Heilmann, Madleńka Šołćic a Julian Nyča mjenowachu něhdźe třiapołhodźinski program „jónkrótnu wosebitu akciju“, připowědźichu pak zdobom pokročowanje. W tym zwisku wuzběhnychu, zo přizwolichu projektej we wobłuku wubědźowanja Němskeje załožby za angažement a čestne zastojnstwo „Machen 2024“ znajmjeńša 5 000 eurow.
K jubilejej wubědźowanja přewjedli
Wohnjowa wobora z Łupoje pola Radworja zhladuje lětsa na 100lětne wobstaće. Minjeny kónc tydźenja su wobornicy jubilej z hosćimi a wubědźowanjemi hódnje woswjećili.
Łupoj (SN/BŠe). Wohnjowa wobora je za žiwjenje we wjesnych kónčinach njeparujomna. Předewšěm čestnohamtscy wobornicy tam wěstotu zasadźenja zaručeja. We Łupoji pola Radworja je tomu 100 lět, zo bu wohnjowa wobora tam załožena. Tohodla su wustajeńcu wo stawiznach wobory w tamnišej gratowni zestajeli. Minjeny kónc tydźenja witachu we Łupoji mjenujcy wjele hosći, kotrež chcychu jubilej z wjesnjanami woswjećili. Pjatk wječor přichwatachu zastupjerjo wohnjowych woborow z wokoliny a čłonam z Łupoje gratulowachu. Tež komunalni politikarjo běchu składnosć wužili, so wobornikam za jich čestnohamtsku pomoc dźakować.
Kontrowersa Klětnoho dla
Diskusija wo rozšěrjenju biosferoweho rezerwata
Hamor (AK/SN). Po kontrowersnej diskusiji je so wjetšina čłonow Hamorskeje měšćanskeje rady přećiwo rozšěrjenju biosferoweho rezerwata UNESCO Hornjołužiska hola a haty na wjes Klětno z parkom rozsudźiła. Wokolina porno tomu do rezerwata słuša. Dźewjeć radźićelow je namjet wotpokazało, šesćo su jemu přihłosowali a třo su so hłosa wzdali. Próstwa gmejnskeho radźićela Thomasa Stenzela z Klětnoho na spočatku posedźenja, temu na přichodne zeńdźenje přestorčić a znowa wobjednać, nańdźe pola sydom Hamorskich radźićelow přihłosowanje, wosmjo so tomu spřećiwjachu a dwaj so hłosa wzdaštaj.
Krótkopowěsće (20.08.24)
Dźěłarnička zahajena
Miłoćicy. Při Miłočanskej skale bu wčera mjeztym hižo 18. mjezynarodna rězbarska dźěłarnička zahajena. Dohromady dźewjeć wobdźělnikow mjez druhim z Němskeje, Kolumbiskeje, Demokratiskeje republiki Kongo a Turkowskeje chce w přichodnymaj tydźenjomaj twórby ze zornowaca, drjewa a metala zhotowić. Wudźěłki prezentuja 1. septembra na swjedźenju za swójby, zajimcy smědźa tež cyły proces nastawanja wuměłcam přez ramjo hladajo sćěhować.
Myto předewzaćelej
Budyšin. Faza nominowanja wuspěšneho Hornjołužiskeho myta za předewzaćelow je zahajena. Mjeztym 29. raz pyta Marketingowa towaršnosć Hornja Łužica-Delnja Šleska w nadawku Budyskeho a Zhorjelskeho wokrjesa wusahowaceho předewzaćela. Požadanja měli akterojo hač do 17. septembra zapodać. Na internetnej stronje www.ol-up.de je wotpowědny formular podaty.
„Hrádek“ ponowjeny
