Přetwar kubłanišća wohroženy
Gmejna Ralbicy-Róžant chce Michaela Kretschmera na slubjenje dopominać
Nowoslicy (JK/SN). Poslednje lětuše posedźenje gmejnskeje rady Ralbicy-Róžant wotmě so wčera wječor w towaršnostnym domje w Nowoslicach. Radźićeljo chcychu komunalne lěto ze zhromadnej wječerju a bjesadu zakónčić.
Seniorojo hodowničku woswjećili
Srjedu popołdnju je so wjace hač 70 seniorow w Grofic galeriji w Němcach na swoju lětušu hodowničku zešło. Carsten Schmidt, zastupowacy gmejnski předstejićel, wšitkich wutrobnje powita a podźakowa so za aktiwne sobudźěło we wubědźowanju wo titul „Najrjeńša gmejna w Sakskej“. Wón prošeše wo dalšu podpěru klětu hladajo na samsne wubědźowanje wjeskow na zwjazkowej runinje. Hordźe naspomni tež aktiwnu wjesnu młodźinu a zdźěli, zo su jědnaće nowych čłonow do młodźiny přiwzali. Tež předsyda wjesneho kluba Bernd Grofa dźakowaše so přitomnym a prošeše wo pomoc w přihotach na 50. wjesny festiwal. Wón přepoda senioram 200 eurow za hodowničku. Dźěći wjesneje pěstowarnje „Pumpot“ čakachu hižo w rjanych kostimach a zaspěwachu hodowne pěsnje. Po tym zahrachu stawizničku wo Čerwjenawce. Ze sylnym přikleskom so jim rentnarjo podźakowachu. Někotre pilne žony rozdźělichu potom kofej a wšitcy zhromadnje dachu sej wosušk, kotryž je Krabatowy mlokowy swět (MKH) z Koćiny sponsorował, słodźeć.
Bjezposrědnje před swojim zawodom w Ochranowje přeprošuje ...
Krótkopowěsće (13.12.24)
Čitansku turneju přewjedli
Budyšin. Dźěćacy časopis Płomjo je wčera čitansku turneju na třoch šulach přewjedł. W pjatych a šestych lětnikach wyšeju šulow we Worklecach a Kulowje kaž tež na Budyskim Serbskim gymnaziju awtor Měrćin Wjenk z powědkow čitaše. Nimo toho Jadwiga Dyrlichowa z Rěčneho centruma WITAJ dźěło lektorki předstaji, a redaktor Płomjenja Pětr Šołta so z šulerjemi wo pisanju a čitanju rozmołwješe.
Móst wostanje dale zawrjeny
Bad Schandau. Město Drježdźany je wčera na wuprajenje měšćanosty za twarstwo Stephana Kühna reagowało. Wón je potwjerdźił, zo móže so móst w Bad Schandauje bórze zaso wužiwać. Kaž nětko rěka, drje so tole jenož na łódźe poćahuje a nic na wobchad. Hdy móhli zaso jězdźidła po mosće jěć, dale jasne njeje.
Wabja z tuńšim ćěriwom
Policija (12.12.24)
Jězdźer w chorobnym stole znjezbožił
Zhorjelc. Při Naměsće Demiana w Zhorjelcu je wutoru připołdnju wosobowe awto do jězdźerja w elektriskim chorobnym stole zrazyło. 82lětny chcyše dróhu za parkowacym transportnym awtom přeprěčić. Po zdaću činješe to bjez toho, zo bě na wobchad dźiwał. Ze směra Teichstraße přichadźacy 35lětny šofer awta marki Mitsubishi seniora w chorobnym stole přepozdźe wuhlada a do njeho zrazy. Mediciniska wuchowanska słužba spěšnje na městno přichwata a ćežko zranjeneho do chorownje dowjeze. Wěcna škoda wučinja něhdźe 3 000 eurow. Policija prosy swědkow njezboža wo dalše informacije. Pokiwy podajće policajskej wobchadnej inspekciji pod tel. čo. 03591 3670 abo kóždemu druhemu policajskemu rewěrej.
Dźěćatko seniorow wopytało
W nowej gratowni paduši pobyli
Slědźa za „prawej“ starobu wjeski
Lutobč (SN/VaŽ). Póndźelu wotmě so w Lutobčan wjesnym klubje podijowa diskusija, na kotruž běše dohromady 20 zajimcow přichwatało. Tema zarjadowanja běše woprawdźita staroba susodneje wjeski Měrkowa, kotraž je lětsa 500. róčnicu swojeho prěnjeho naspomnjenja woswjećiła. Historiski zakład za to je Kniha wjesnych mjenow Hornjeje Łužicy wot E. Eichlera a H. Walthera z lěta 1975, w kotrejž so wjes w lěće 1524 jako „Merkhe, Merko“ naspomni.
Škotowy turněr zakónčili
Budyšin. W Budyskej rezidency seniorow su serbscy škotowarjo-seniorojo wutoru swój lětuši 12. turněr zakónčili. Dohromady 28 škotowarjow a jedna škotowarka běchu na poslednje zarjadowanje přichwatali. Cyłkowny dobyćer turněra je Manfred Hörauf z 3 045 dypkami před Eberhardom Kroschkom z 2 981 a Wolfgangom Kühnom z 2 934 dypkami. Před mytowanjom su so škotowarjo organizatoram turněra Soni Krječmarjowej, Siegfriedej Rawej und Wolfgangej Kühnej z małym prezentom podźakowali.
Adwentny koncert we Łazu
Łaz. W ewangelskej cyrkwi we Łazu wuhotuje wokalny ansambl Amici della musica sobotu, 14. decembra, we 18 hodź. adwentny koncert. Hižo 23 lět eksistowacy chór pod wuměłskim nawodom Kerstin Lieder ma jara mnohostronski repertoire spřihotowany: Wot madrigale starych mištrow, wobdźěłanych ludowych abo modernych spěwow hač k naročnej chórowej literaturje dźensnišeho časa. Wšitcy přećeljo kultury a hudźby su wutrobnje na koncert witani. Zastup je darmotny. Pjenježny dar je witany.
Z dawkami so dołho bědźili
Radwor (SN/MkWj). Dawki su a wostanu w gmejnach wulki problem. Tole je kóždy zwěsćił, kiž je wčerawše posedźenje Radworskeje gmejnskeje rady sćěhował. Konkretnje je to ležownostny dawk. Po wusudźe Zwjazkoweho wustawoweho sudnistwa maja z nowym lětom 2025 tež nowy ležownostny dawk płaćić. Hižo dlěši čas jewi so tutón problem tuž tež w Radworju.
Po zakonju wšak maja cyłkowne dawkowe dochody gmejnow přirunujo z minjenymi lětami někak jenak wulke wostać. Gmejnam přizwola přiwšěm swójske rjadowanje. Runje to je tež w Radworju problem. Na kóncu diskutowachu wo sumach, kotrež wotpowěduja kašćikej piwa wob lěto. Na jednym boku wustupowaše Radworska gmejnska komornica Melanie Mihanowa. Ta hišće raz na to pokaza, zo dyrbi gmejna swoje wudawki w prěnim rjedźe z dawkowych dochodow financować. Na druhim boku stejachu radźićeljo, kotřiž su tež zastupnicy swojich wolerjow. Tutym nochcedźa wysoke dawki napołožić. Někotři namjetowachu přestorčenje rozsuda wo ležownostnym dawku na klětu.
