Hornja Łužica w dobje bronzy
Wodowa straža při Olbje ma přichod
Profesionelna wuchowanska pomoc při kupanskim jězoru Olba w Zuborničce je na dalšich 20 lět zaručena. To je Budyski wokrjesny sejmik na swojim poslednim posedźenju zaručił.
Zubornička (UM/SN). Budyski wokrjes je wotnajer objekta wodowej straže při Olbje w Zuborničce. Wotnajenske zrěčenje z Malešanskej gmejnu pak chileše so ke kóncej. Spočatk oktobra, na druhim posedźenju wokrjesneho sejmika, su wokrjesni radźićeljo wobzamknyli, zo podlěši Budyski wokrjes wotnajenske zrěčenje za staciju wodowej straže wo 20 lět. „Wobě stronje stej sej wo tym přezjednej“, rěka w předłoze wobzamknjenja.
Hrajkanišćo sej natwarili
W lěsu pola Smjerdźaceje so šulerjo z wuměłstwom Landart zaběrali
Smjerdźaca (SN/lmc). Landart je wosebita forma wuměłstwa, w kotrejž dźěła wuměłc bjezwuwzaćnje z přirodnymi materialijemi kaž na přikład z łopjenami, hałžkami, kamjenjemi, pjeršću, wodu, mochom abo drjewom. Wědoma interakcija z bjezposrědnym wobswětom steji tu w srjedźišću. Landart pak je tež wuraz a dopokaz za to, kak móžeš z mało a jednorymi srědkami tworićelsce wurjadne wuměłstwo stworić. Dohromady 16 dźěći prěnjeho do štwórteho lětnika je so we wosebitym prózdninskim poskitku na tute wašnje wuměłsce wuspytało, kotryž je Serbske šulske towarstwo (SŠT) w kooperaciji z Rěčnym centrumom WITAJ wot póndźele do srjedy organizowało.
Krótkopowěsće (18.10.24)
Juri Šěrak njeboh
Lejno. Jurij Šěrak je njeboh. Wusahowacy serbšćinar zemrě wčera w starobje 89 lět. Powołansce skutkowaše jako redaktor a stilizator Noweje doby a Serbskich Nowin, jako wuměnkar wukonješe mjez druhim lektorat za tydźenik Katolski Posoł a zestaji rjad rěčnych pokiwow. Serbski rozhłós dźakuje so jemu za „lektorizowanje njeličomnych pěsnjow“, kotrež je sćelak produkował.
Wusud wobkrućeny
Karlsruhe. Zwjazkowe sudnistwo je wusud Zhorjelskeho krajneho sudnistwa přećiwo zapalerjej barokneje cyrkwje we Wulkich Rědorjecach wopodstatniło: Dźewjeć lět jatby ćežkeho zapalerstwa dla. Po měnjenju zakitowarja wobskorženeho běše sej policija z njesprawnymi metodami wuznaće wunuzowała. Tohodla běše rewiziju přećiwo wusudej krajneho sudnistwa zapołožił.
Digitalna konferenca muzejow
Mlokowy swět zeznać
Koćina. Ludowa šula Wojerecy přeprošuje pjatk, 18 oktobra, na zhromadny wopyt Krabatoweho mlokoweho swěta w Koćinje. Nimo nowostkow z ratarskeho zawoda zhoni wopytowar tež to abo tamne wo Krabaće a wo historiskej wosobje Johanna Schadowitza. Po zhromadnym wobjedźe a woptawanju słódnych produktow z mlokoweho swěta dožiwi zajimc na wodźenju po zawodźe mjez druhim, kak z mloka twarožk nastanje. Zetkanje je w 10 hodź při zachodźe dwórskeho wobchoda w Koćinje čo. 2. Popłatk za wobdźělenje a wobjed wučinja 30 eurow.
Molujo so z krajinu zaběrać
Lěšće. Na hrodźe w Lěšćach (Hornow) na Šulskej 33, chce so molerka a wuměłska terapeutka Andrea Neitzel ze wšitkimi zajimowanymi na slědy Maxa Raby w dźěłarničce pod hesłom „Krajina“ podać. Mjez druhim znazorni wona zhotowjenje tempera-barby z jeja a pigmentow. Zarjadowanje wotměje so sobotu, 19. oktobra, wot 10 do 17 hodź. Popłatk za wobdźělenje, wobjed a dźěłowy material wučinja 50 eurow.
Sinfoniski koncert w Budyšinje
Policija (17.10.24)
Kokoše a nukla pokradnyli
Wojerecy. Dotal njeznaći skućićeljo su na ležownosći při Kamjentnej dróze we Wojerecach w poslednich tydźenjach dohromady šěsć kokošow kaž tež nukl pokradnyli. Wobsedźerjo su domjace zwěrjata wonka na zahrodźe w swobodźe dźerželi, tak zo su je paduši bjez wulkich zaraćenjow prosće zapopadnyć a „sobu wzać“ móhli. Cyłkowna škoda wučinja něhdźe 160 eurow. Kriminalna słužba Wojerowskeho policajskeho rewěra skućićelstwo přepytuje.
Dalše nakupowanišćo za Rakecy trěbne?
Rakecy (BB/SN). Trjebaja Rakecy woprawdźe hišće dalše wulke nakupowanišćo? Srjedź meje je wjesnjanosta Swen Nowotny (CDU) gmejnsku radu wo tym informował, zo chce inwestor runje tajki centrum natwarić. Tehdy wopisowaše to jako „hobersku šansu za Rakecy“. Někotři radźićeljo pak tak přeswědčeni njeběchu. Nimale jednohłósnje su so tehdy na to dojednali, zo měło towarstwo z Hamburga wikowanski koncept nastajić.
Drohotne swědki časa přepodała
Ewakuowanje hišće raz wuhódnoća
Chelno (SN/MkWj). Tójšto stólcow přistajić dyrbjachu wčera w domje wjesneje zhromadnosće w Chelnje. Radworska gmejnska rada bě připowědźiła, zo chce swoje posedźenje w oktobru w tutym domje přewjesć. Mnohim Chelnjanam bě tole z přičinu, so na posedźenju jako hósć wobdźělić. Nic naposledk mějachu tójšto prašenjow, kotrež chcychu při tej składnosći hnydom stajić.
Staru gratownju wjesneje wohnjoweje wobory běchu před něšto lětami přetwarili a za to spěchowanske srědki Zwjazka za wuwiće wjesnych kónčin dóstali. Hdźež steještej něhdy jězdźidle wohnjoweje wobory, je nastała rumnosć za schadźowanja a wuradźowanja ze sanitarnymi připrawami. Garaža wohnjoweje wobory je porno tomu dospołnje nowa. Wobě twarjeni stej mjez sobu zwjazanej. Nowa je tež rumnosć za předrasćenje dohromady 20 wohnjowych wobornikow.
Dźeń a wjac wina z Łužicy
Kołowokoło Łužiskeje jězoriny tuchwilu na dwanaće hektarach wino rosće
Budyšin (SN/lmc). Po cyłej Němskej plahuja w 13 tak mjenowanych wěstych plahowanišćach na něhdźe 103 000 hektarach wino. Z toho namakamy něhdźe 32 hektarow w Braniborskej a nimale 500 hektarow w Sakskej. Wěste družiny smědźa so po zakonju jenož w tychle kónčinach produkować. Tež, hdyž Łužica oficielna plahowanska kónčina wina njeje, nastawa runje w tutej kónčinje dźeń a wjace mjeńšich winowych kubłow. Na tutych winicarjo – hač jako hobby abo profesionelnje – swoje dobre kapki plahuja.
