Poradźeny swjedźeń w hródźi
Policija (07.10.24)
Wobchadne njezbožo ze zranjenej
Debsecy. Na swojej jězbje z Debsec do směra Šiborćic (Nieder Seifersdorf) je sobotu 24lětna šoferka ze swojim awtom typa Škoda Fabia na zwjazkowej dróze 122 znjezbožiła. Jako chcyše nalěwo na zajězd na awtodróhu do směra Drježdźan wotbočić, je prawdźepodobnje na napřećiwnej jězdnej přichadźace awto typa Mitsubishi přewidźała. Tak zrazyštej wobě jězdźidle do so. Šoferka Škody kaž tež 58lětny šofer Mitsubishija so při tym zraniłoj njejstaj. 77lětnu sobujěducu w Mitsubishiju pak dyrbješe wuchowanska słužba do chorownje wotwjezć. Wěcna škoda wučinja něhdźe 10 000 eurow.
Přednoškaj wo wjedrje
Wojerecy. Wojerowska ludowa šula přeprošuje wšitkich zajimcow pjatk, 11. oktobra, do tamnišeho kina a to w 10 hodź. a 20 hodź. na filmowej přednoškaj mytowaneho filmowca přirody Robina Jähne pod titulom „Im Bann der Blitze – Natur im Gewitter“. Mjez jimacymi filmowymi scenami rozprawja wón wo swojich hońtwach za wichorami, fascinowacych dožiwjenjach ze zwěrjatami a dalšich wjedrowych fenomenach. Zastup je darmotny. Wobmjezowaneje ličby městnow dla pak organizatorojo wo přizjewjenje proša a to telefonisce pod 03571 20937200 abo z mejlku na: .
Powědacy fotowy album
Budyšin. W Budyskej Serbskej kulturnej informaciji (SKI) poskićuje motiwatorka za serbsku rěč projekta ZARI Marija Šołćic srjedu, 9. oktobra, wot 10 do 12 hodź. prózdninsku dźěłarničku pod hesłom „Zhotowju sej swój powědacy fotowy album“. Wobdźělenje je bjezpłatne. Zajimowani njech přinjesu fotowy album, USB-stick a jeli to chcedźa paslenski material za wudebjenje albuma sobu. SKI prosy wo přizjewjenje nanajpozdźišo dźeń do termina w SKI pod tel. čo. 3591 550111 abo z mejlku na: .
Swjedźeń z wjace regionalnosću
Lětsa prěni raz běchu Wojerowčenjo minjeny pjatk na nowy nazymski swjedźeń, Reje na domchowanku, w žurli VISAVIS přeprošeni. Cil zarjadowarjow běše mjez druhim, jón sylnišo z regionalnej kulturu zwjazać.
Wojerecy (KD/SN). Transformacija oktoberskeho swjedźenja na swjedźeń domchowanki z regionalnej hudźbu, rejemi, narodnej drastu kaž tež z regionalnym rjemjesłom je so zarjadowarjam Marketingowemu towarstwu Wojerecy, Łužiskej hali a Towarstwu za pěstowanje regionalneje kultury w srjedźnej Łužicy derje poradźiła. Swjedźeń zesylnja zakótwjenje dwurěčneje kultury we Wojerecach a je přidatny rejowanski poskitk, wšako je ličba podobnych zarjadowanjow w měsće dotal mała.
Mnohich hosći witałoj staj w regionje dawno derje znataj Wolfgang Kraus jako Krabat a Hans-Jürgen Schröter jako pisar Krabata z chlěbom a selu. Před krasnje z płodami wupyšenej słomjanej krónu domchowanki, kotruž běchu wjesnjenjo w Čornym Chołmcu stworili, staj wobaj tež swjedźenski sud piwa natočiłoj.
Połne syće a wjele hosći
Na Radworskej kupje lětsa pjećdźesaty raz rybjacy swjedźeń woswjećili
Radwor (SN/VaŽ). Hižo wot lěta 1974 sem pěstuje Zjednoćenstwo kupoweho hata Radwor z. t. hatarstwo w regionje kaž tež tradicionalne zarjadowanja. Zawčerawšim swjećachu pjećdźesaty raz rybjacy swjedźeń. Towarstwo nawjeduje mjeztym hižo 16 lět Claudija Steglichowa.
Nazymske wiki lětsa z kirbsami
Zakituja lěs přećiwo brunicy
Demonstracije pola Rownoho za zemju, wodu a škit klimy
Rowno (SN/mb). Blisko Wochožanskeje wuhloweje jamy pola Rownoho su so ludźo wčera znowa na protestnu manifestaciju zešli. Ze zdźělenki zarjadowarja wuchadźa: Wobaraja so hrožacemu wuswojenju lěsa w priwatnym wobsydstwje za to, zo by LEAG swoju jamu rozšěrił. Tutym planam koncerna LEAG su wobdźělnicy demonstracije symbolisce čerwjenu kartku pokazali a wobraz w interneće pod www.kein-tagebau.de wozjewili. Na nim widźiš něhdźe połsta ludźi. Składnostnje sonděrowanja politikarjow CDU, BSW a SPD w Drježdźanach wo nowej koaliciji po wólbach sakskeho krajneho sejma sej demonstranća wot přichodneho knježerstwa w Sakskej žadaja: Njech słuži powšitkownemu derjeměću a nic hospodarskemu zajimej koncerna.
Krótkopowěsće (07.10.24)
Njezbožo na mišterstwje
Běła Woda. Na Brězowskim jězorje běše minjeny kónc tydźenja swětowe mišterstwo spěšnych čołmow. Při tym pak dóńdźe k njezbožu, dokelž staj dwaj čołmaj do so zrazyłoj. Pilot z Madźarskej bě wjacore mjeńšiny pod wodu a wuchowanscy pomocnicy jeho reaniměrowachu. Ćežko zranjeneho dowjezechu do Wojerowskeho klinikuma. Tamny wodźer čołma bě 59lětny z Italskeje.
Jubilejne wiki přewjedli
Wjazońca. Nimale 80 hornčerjow z Němskeje, Čěskeje a Pólskeje je so minjeny kónc tydźenja na 35. hornčerskich wikach we Wjazońcy wobdźěliło. Nimo wikow přewjeduja tam tež program, při čimž zhonja wopytowarjo tójšto wokoło keramiki. Tež hornčerjo z wokoliny, kaž z Halštrowa, Hózka abo Porchowa je přehladka we Wjazońcy wažny termin.
Najwjetša lodohokejowa arena
Policija (04.10.24)
Přesćěhańca z njerjanym wukóncom
Łuty. Při wobchadnej kontroli na Złokomorowskej dróze we Łutach chcyše tamniša policija wčera wodźerja na kwad-mobilu zadźeržeć. Wón pak ignorowaše signal za zadźerženje policije a ćekny na B96 do směra Łuty-wjes. Zastojnicy policije ćěkaceho přesćěhowachu. Při tym zhubi 32lětny němski staćan kontrolu nad swojim kwad-mobilom a zajědźe do kerčiny a so lochce zrani. Jako zastojnicy muža kontrolowachu, zwěsćichu, zo jězbnu dowolnosć njewobsedźi. Nimo toho testowachu jeho na drogi. Test reagowaše pozitiwnje na cannabis, amfetamin a opiat. Dale zwěsćichu zastojnicy, zo kwad-šofer po prawje ani wobsydnik jězdźidła njeje. Policajski rewěr Kamjenc pad nětko wjacorych deliktow dla přepytuje.
