Łužiske speciality wosebje wabili
Jednaćel Tobias Kockert je sobotu mnohich hosći na swjedźeń domchowanki witał, kotryž zawod Krabatowy mlokowy swět mjeztym hižo dwanaty raz składnostnje Kulowskeje kermuše na swojim dworje wuhotuje.
Koćina (aha/SN). Njeličomne parkowace awta ze wšěch kónčin Sakskeje a Braniborskeje su přeradźili, zo běchu mnozy rjane wjedro wužili a sej do Koćiny dojěli. Kulowski farar Gabriš Nawka žohnowaše płody ratarskeho dźěła a zhromadnje so wšitcy „Strowa sy, Marija“ tež serbsce pomodlichu. Marta Zahrodnikec zahra dopołdnja na swojich dudach tež wjacore serbske pěsnje. Z tym njeje jenož serbskich wopytowarjow zahoriła.
Zabawny, powučny a słódny
Poskitk na nazymskim swjedźenju w Małym Holešowje wjele ludźi přiwabił
Mały Holešow (CS/SN). Loni so nazymski swjedźeń na rybarskim dworje w Małym Holešowje wotměł njeje, dokelž objekt na moderny centrum za kubłanje wo wobswěće přetwarjowachu. Nětko je twarjenje, kotrež wulkotnje z krajinu hornjołužiskeje hole a hatow harmoněruje, hotowe. Na nazymskim swjedźenju wčera dožiwi móhłrjec swoje njeoficialne wotewrjenje – oficialnje poswjeći so přichodny pjatk. Nětko, w nazymskich prózdninach, witaja tam hižo prěnje skupiny šulerjow, kotrež přenocuja. Hač do 15 šulerjow a kubłarjow ma tu nóclěh.
Krótkopowěsće (14.10.24)
Ptačka lěta wuzwolili
Stuttgart. Šwišk (Hausrotschwanz) je „Ptak lěta 2025“. Kaž kampanju organizowacy Přirodoškitny zwjazk Němskeje NABU zdźěla, bu swójbje wroblow přisłušace zwěrjo we wobłuku digitalneho wothłosowanja z něhdźe třećinu wotumow wuzwolene. Wosebitosć družiny je, zo je so na nimale wšitke wobstejnosće wobswěta přiměriła a tuž jako wohrožena njepłaći.
Kandidat za krajne wubědźowanje
Lubin. Sydlišćo Witanojce-Bukowka (Wittmansdorf-Bückchen), dźěl gmejny Markojska Góla, zastupuje wokrjes Dubja-Błóta w přichodnym kole wubědźowanja „Naša wjes ma přichod“ na krajnej runinje. Jury chwali předewšěm „wulki čestnohamtski angažement“ wobydlerjow a „čiłe towarstwowe žiwjenje“. Najznaćiši přikład w tym zwisku je we wólnym času wutworjene wohnjowoborne zwučowanišćo, kotrež wužiwaja kameradojo cyłeho regiona.
Financy za „prěnju damu“?
Policija (11.10.24)
Ciwilna kuraža we Wjazońcy
Wjazońca. Hnydom dwójce bu 84lětna srjedu popołdnju we Wjazońcy z woporom skućićela. Jako při busowym zastanišću při hłownej dróze čakaše, wutorhny jej dotal njeznaty muž, kotryž w bliskosći přebywaše, tošku z ruki, wotsali so a přeborka ju. Pozdaću pak ničo „wužitneho“ njenamaka. Tak so nawróći a wohrožowaše seniorku z nožom. Někotři swědkojo přichwatachu žonje na pomoc a skućićel ćekny. Třo chrobli mužojo pak jeho přesćěhowachu, popadnychu ćěkaceho a informowachu policiju. Zastojnicy 43lětneho zajachu. W tesće na drogi namakachu amfetamin. Winy padustwa a pospyta rubjenstwa dla předstajichu skućićela štwórtk jatbowemu sudnikej.
Připołdniše zaćmiće w Běłej Wodźe
Wětrnik we Łuze ma susoda
Historiski tykowany dom z Lišeje Hory na nowym městnje přepodali
Łuh (UM/SN). Před něšto časom su historiski tykowany dom kata z Lišeje Hory do bjezposrědneho susodstwa wětrnika při puću mjez Łuhom a Chasowom přenjesli. Twarske dźěła na nim su nětko zakónčene. Na arealu kołowokoło wětrnika pak je hišće wjace nastało.
Awtor čita w Budyšinje
Budyšin. Drježdźanski awtor Jens Wonneberger čita w Budyskej měšćanskej bibliotece na Hrodowej 12 ze swojeho romana „Pension Seeparadies“ a to wutoru, 15. oktobra, w 19 hodź. Ze swojim wěstym poetiskim stilom a psychologiskim wóčkom zamóže awtor tež w tutej twórbje čitarja jimać. Z bibliotekskim wupokazom płaći zastup 4 eurow, bjez wupokaza 6 eurow. Zamołwići proša wo telefoniske přizjewjenje pod čo. 03591 534827.
Přistojne zadźerženje nawuknyć
Wojerecy. Srjedu, 16. oktobra, wot 10 do 13.30 hodź. poskićuje Wojerowska ludowa šula wosebitu dźěłarničku za dźěći, kotraž zaběra so z regulemi a normami praweho a přistojneho zadźerženja za blidom. Mjez druhim je tež zhromadne warjenje menija w třoch chodach kaž tež kryće a dekorěrowanje swjedźenskeho blida planowane. Na kóncu spožči so młodym wopytowarjam „prawy“ certifikat. Přeprošene su dźěći w starobje wot 8 do 13 lět. Přinošk za wobdźělenje je 5 eurow.
Dźěći w muzeju „wobkuzłał“
We wobłuku Krabatoweho tydźenja zaběra so Serbski muzej w nazymskich prózdninach ze serbskej bajowej postawu Krabata a historiskej wosobinu Janka Šajatovića.
Budyšin (SN/lmc). Hač wodźenje po wustajeńcy za dorosćenych abo pisany a wotměnjawy program za šulske a pěstowarske dźěći – wostudu pasć w tutych prózdninach nichtó njetrjeba. Serbski muzej je 7. oktobra kaž tež wčera zajimowane dźěći na wosebity prózdninski poskitk přeprosył.
Krótkopowěsće (11.10.24)
AfD nałožk germanizuje
Drjowk. Rozhorjenosć w Delnich Serbach zbudźiło je twjerdźenje wotpósłanca AfD w měšćanskej radźe Drjowka, zo je Janske jěchanje w Kozlem originalny němski nałožk. Wo tym rozprawja Nowy Casnik w aktualnym wudaću. Při tym so AfDnik na knihi z 1930tych lět złožuje, hdyž su nacionalsocialisća serbske korjenje Łužicy z pseudowědomostnymi wopodstatnjenjemi zaprěwali.
Dobra šansa zawodam
Drježdźany. Drježdźanska rjemjeslniska komora namołwja pěstowarnje na wuchodźe Sakskeje so na cyłoněmskim wubědźowanju „Małej ručce, wulki přichod“ wobdźělić. K tomu wopytuja dźěći rjemjeslniski zawod a swoje nazhonjenja na wulkim plakaće zwobraznjeja. Za rjemjeslniske zawody je to dobra šansa, dźěćom praktiske dźěło spřistupnić.
Lěty klětu šmórnjene
„Dresscode: Serbski!“
Choćebuz. Dohromady štyri dźěłarnički pod hesłom „Dresscode: Serbski!“ poskićuje Serbski muzej w Choćebuzu a to sobotu, 12. oktobra, wot 14 do 18 hodź. Zajimowani zaběraja so ze serbskej modu za muži a žony. Nazorniše informacije namakaće pod: www.eveeno.com/dresscode-serbski-anmeldung. Pod tutej adresu je zdobom přizjewjenje móžne. Tež předsyda Domowiny Dawid Statnik zarjadowanje wopyta.
Wustajeńca „eksotow“
Kulow. Zjednoćenstwo plahowarjow eksotiskich ptačkow z Njedźichowa přeprošuje zajimcow na wustajeńcu ptačkow a to sobotu kaž tež njedźelu, 12. a 13. oktobra, wot 10 do 17 hodź. do Stareho dwórnišća w Kulowje. W něhdźe 30 woljerach a witrinach prezentuja 30 družin eksotiskich ptačkow z najwšelakorišich kónčin zemje. Někotre z nich su tež na předań. Nastupajo plahowanje a dźerženje ptačkow čłonojo zjednoćenstwa rady poradźuja. Za dźěći su molowanske a paslenske poskitki přihotowane.
Nazymski koncert w Slepom
