Budyšin (SN). We wobłuku projekta „Mjeńšinowa politika a konfliktny potencial“ so tuchwilu wosom wučerkow, wučerjow a profesorkow z Moldawskeje, Georgiskeje a Ukrainy na studijnej jězbje w Sakskej wobdźěla. Nazymska wuprawa skići wobdźělnikam mjez druhim móžnosć, so ze serbskim ludom a jeho aktualnymi wužadanjemi roze­stajeć. W fokusu wuprawy steji rozestajenje z mjeńšinami w šulskej wučbje.

Po tym zo su prěnje dny w Lipsku pobyli a so tam mjez sobu zeznali, po­dachu so nětko do Budyšina. Prěnja stacija za nich bě Serbski dom. Referentka za kubłanske naležnosće pola Domowiny Katrin Suchec-Dźisławkowa wobdźělnikam wo Serbach w Hornjej, srjedźnej a Delnjej Łužicy přednošowaše. Tak je mjez druhim wo aktualnych wuwićach w politice abo na kulturnym polu rozprawjała. Tež Domowinu jako třěšny zwjazk Serbow je wona mjezynarodnym hosćom předstajiła a dohlad do dźěławosće Domowiny skićiła. Hosćo zajimowachu so mjez druhim za to, hač so w šuli eksplicitnje serbske stawizny wuča abo štó so wo wuwiće serbskich šulskich knihow stara.

Přednošk wo drasće za rejowanje

Choćebuz. Pod nadpismom „Drasta je za rejowanje“ je wědomostna sobudźěłaćerka Serbskeho instituta dr. Theresa Jacobsowa wčera wo serbskej drasće na rejach něhdy a dźensa přednošowała. Referatej w Choćebuskim Serbskim muzeju je něhdźe 30 zajimcow sćěhowało. Přednoškej slědowachu reje, kajkež skupina Serbska reja pod hesłom „Rejowański Dom Łužyca“ prawidłownje w Choćebuzu wuhotuje.

Nowu stražu přepodali

Njedźichow. W Njedźichowje su zamołwići wčera nowu wuchowansku stražu přepodali. Za něhdźe połdra miliona eurow je tam twarski kompleks ze třomi dźělemi nastał. Tam su móžnosće za přebywanje a wotpočowanje, běrowy a hala za jězdźidła. Projekt realizowało je 26 předewzaćow z regiona. Stražu nětko maltezojo wužiwaja.

„Swětła nad bunkerami“

Při kontroli do awta policije zrazył

Wojerecy. Zastojnicy policajskeho rewěra we Wojerecach su sobotu wječor na dróze k přemysłowej kónčinje transportne awto typa Mercedes kontrole dla zadźerželi. Jako Mercedes zadźerža, wotstajichu policisća swoje słužbne awto ze zaswěćenymi warnowanskimi swěcami za nim. Něšto časa po tym poda so jedyn ze zastojnikow do słužbneho awta, zo by dokumenty z personalijemi šofera Mercedesa přepruwował. Na dróze wotzady ­bližeše so dalše awto typa Audi. Z dotal njeznatych přičin pak 32lětny šofer swoje awto nimo parkowaceju awtow wodźił njeje, ale zrazy direktnje do awta policije a to tak sylnje, zo je do před nim stejaceho awta stłóči. Při tym so 27lětny w awće sedźacy policist lochce zrani. Cyłkowna wěcna škoda wučinja po dotalnych dopóznaćach 27 000 eurow. Audi su zastojnicy jako dopokaz zawěsćili. Policajska słužba za wobchadne njezboža je pad přewzała a přepytuje dale. Šofer Audija ma so nětko njewobhladniweho zranjenja ćěła dla před sudnistwom zamołwić.

Wojerecy. Město Wojerecy kaž tež měšćanska biblioteka Brigitty Reimann přeprosytej pjatk, 27. septembra, w 17 hodź. na zarjadowanje „Woprašej so měšćanosty“ do rumnosćow biblioteki. Tema tónraz rěka: Što přińdźe po 5G? Wyši mě­šćanosta Torsten Ruban-Zeh a fachowc prof. Frank Fitzek wjeselitaj so na prašenja a na žiwu rozmołwu. Zarjadowanje je darmotne.

Běh wo pokal zbóžneho Alojsa

Radwor. Towarstwo Cyrila a Metoda (TCM), Sportowa jednotka 1922 Radwor kaž tež tamniši młodźinski klub přeprošuja sportowcow wšěch starobnych skupin wot šěsć lět na běh wo pokal zbóžneho Alojsa do Radworja. Jón přewjedu štwórtk, 3. oktobra. Započatk je w 9 hodź. na sportnišću. Běharjo móža mjez distancami 500, 1 000, 1 500, 2 000, 4 000 a 6 000 metrow wolić. Zajimcy njech so online pod: přizjewja.