Gundermannowe pěsnje zdobywaja sej Europu
Wojerecy (KD/SN). Minjeny kónc tydźenja su na wosebite wašnje we Wojerecach před 20 lětami zemrěteho ludoweho pěsnjerja Gerharda Gundermanna wopominali. Hižo dlěši čas přełožuje nižozemski spěwytwórc Johan Meijer kruchi Wojerowskeho rockoweho poeta a bagrownika w brunicowej jamje, „Gundija“ Gundermanna, do swojeje maćeršćiny. Nětko je diskusiju pod hesłom „Gundermannowe pěsnje w Europje“ sobu organizował a tohorunja dźěłarničku k přełožowanju jeho twórbow za europskich hudźbnikow a přełožowarjow. Tak su Gundermannowe pěsnje w Ranju (Großräschen) do cyłkownje jědnaće rěčow přenjesli, mjez druhim do delnjoserbšćiny, čěšćiny, šwedšćiny a jendźelšćiny.
Wubědźowanje LND za dźěći
Budyšin (SN). Składnostnje planowaneho wudaća noweje antologije „Hura, prózdniny!“ namołwja Ludowe nakładnistwo Domowina wšitke serbske dźěći – šulerjow, skupinki abo rjadowniske cyłki wot 2. do 4. lětnika – do kreatiwneho dźěła. Wobdźělnicy njech zapodadźa nakładnistwu hač do 7. septembra swoje ideje na temu „Hura, prózdniny!“, a to na přikład jako widejo, spěw, skeč, powědančko, baseń abo wobrazowu stawiznu w serbskej rěči. Tři najoriginelniše přinoški budu we wobłuku programa 24. literarneje kermuše njedźelu, 30. septembra, w Radworju předstajene. Dobyćerjam wubědźowanja kiwaja nimo toho awtorske čitanja po jich přeću a wěcne myta. W srjedźišću lětušeje kermuše za cyłu swójbu steji nowa antologija za dźěći „Hura, prózdniny!“. Čitanka, kotraž wopřijima powědančka mjez druhim Dorotheje Šołćineje, Štefana Paški, Andreje Chěžcyneje, Annamarije Hadankec a Jurja Kocha, ma nazymu we wjazanej formje kaž tež jako słuchokniha wuńć.
Najrjeńši čas lěta so bliži, tuž njeměło dźěćom na lóštnych idejach falować. LND wjeseli so nad kóždym přinoškom.
Klasika před kulisu twjerdźizny
Witaja kulturne inwesticije
Sakske statne ministerswo za wědomosć a wuměłstwo (SMWK) je připowědźiło, kulturnym rumam 40 milionow eurow přidatnje přewostajić. 28 milionow eurow je myslenych za wyše mzdy.
Drježdźany (SN/bn). Zwjazk orchestrow Němskeje (DOV) wita planowane zwyšenje statnych přiražkow za komunalne dźiwadła a orchestry Sakskeje. „Najebać po wšej Němskej jónkrótny zakoń wo kulturnych rumach je Swobodny stat Sakska dotal tón kraj z najwjace orchestrami a dźiwadłami w nuzowym połoženju“, rěka w zdźělence jednaćela DOV Geralda Mertensa. „Wuměłski personal, jewišćowi technikarjo a sobudźěłaćerjo zarjadnistwow su so lěta dołho dźěla swojeje mzdy wzdali, zo bychu institucije a dźěłowe městna zachowali. Je derje, zo krajne knježerstwo to nětko skónčnje změni. Nadźijamy so, zo tež komunalni nošerjo wudawki za sylnjenje kulturneje infrastruktury zwyša.“ Potom móhli dźěłaćerjo kulturnych institucijow mzdy kaž w starych zwjazkowych krajach dóstać. „Nimale 30 lět po přewróće měło to samozrozumliwe być.“
Nimo Lubija je Kamjenc jeničke hornjołužiske město, kotrež so ...
Wo knihach a kniharni (22.06.18)
Prózdniny steja před durjemi, čas wodychnjenja a wočerstwjenja, čas pućowanja a nadźijomnje tež čas čitanja. W LND je dypkownje k spočatkej prózdnin nowa kniha za čitarjow wot 14 lět wušła: „Łójerjo sonow“ rěka fantastiska stawizna z pjera Jěwy-Marje Čornakec. Awtorka je sej tak tež sama són wo swójskej knize za dorosćacych čitarjow spjelniła. Štóž jeje tworjenje sćěhuje, wě, zo je rozestajenje z dóńtom čłowjeka, z jeho duchom a dušu tema, kotraž ju zaběra a so w jeje tworićelskim dźěle wotbłyšćuje. W nowej stawiznje chce Čornakec předewšěm čitarjow narěčeć, kotřiž maja žiwjenje před sobu, a jim nastorki k rozmyslowanju wo tym dać, kak wowliwujomny čłowjek je a kotre wuskutki jeho jednanje ma. Za to je sej napjatu stawiznu wumysliła. Figurje Krabata a Čorneho młynka, kotrejž spisowaćelku wot dźěćacych lět přewodźatej a fascinujetej, zbudźa wona na přewšo wušikne wašnje k nowemu žiwjenju.
Hišće hač do jutřišeje soboty, 23. junija, pokazuja we ...
Wot pismika ke knize
Na dnju wotewrjenych duri wo dźěle w serbskim nakładnistwje zhonili
Lětuša 60. róčnica załoženja Ludoweho nakładnistwa Domowina bě ćežišćo dnja wotewrjenych duri 9. junija. W schodźišću wisachu fotografije, kotrež chronologisce za LND wusahowace wosobiny – mjez druhim běchu to spisowaćel Jurij Brězan, basnik a něhdyši šefredaktor časopisa Płomjo Beno Budar abo lektorka a wudawaćelka Ingrid Juršikowa – minjenych šěsć lětdźesatkow pokazachu. Někotremužkuli wopytowarjej bě nimo toho nowosć, zo je skupina Czerwone Gitary 1981 redakciju tehdyšeho dźenika Nowa doba wopytała. Wabjenske plakaty za publikacije nakładnistwa wotbłyšćowachu wobšěrny spektrum knihow, kotrež su w LND wušli.
