Lěs ekologisce přetworja
Budyšin (SN/JaW). Při Budyskim spjatym jězorje je Swobodny stat Sakska započał tamniši lěs ekologisce přetworjeć. Wo tym informuje dźensa krajny zarjad rěčnych zawěrow. Kaž ze zdźělenki wuchadźa, pušćeja za to tuchwilu na zapadnym pobrjohu jězora mjez Nowymi Małsecami a Petzbergom něhdźe 600 štomow, přewažnje topoły (Pappel). Dźěła maja hač do kónca februara trać.
Z přetworjenjom lěsa ma wěsty, stejnišću wotpowědny a na družiny bohaty lěs při spjatym jězorje nastać. Fachowcy wotstronjeja štomy tuž w etapach, zo njebychu lěsnu strukturu wobškodźili, kaž krajny zarjad rěčnych zawěrow pisa. Na tak nastawacych holinach móžachu so hižo dalše družiny lisćowcow, mjez druhim pólny klon (Feldahorn) a wjaz (Ulme), rozpřestrěć.
Njeswačanska přirodoškitna stacija přetworjenje lěsa fachowje přewodźa. W lětach 1968 do 1977 bu při Budyskim spjatym jězorje topołowy lěs připrawjeny. Mjeztym pak je zestarił a wětřik móhł štomy lochce spowaleć. Tohodla dyrbja zwostate topoły podrězać a wobstatk štomow womłodźić.
Krótkopowěsće (12.01.18)
Tójšto sej předewzali
Choćebuz. Župa Delnja Łužica a młodźinski aktiw stej tele dny lětuše zhromadne zarjadowanja planowali. Tak su na 55 wsach w Delnjej Łužicy zapusty a camprowanja předwidźane, a na 25 wsach chcedźa kokota łapać abo zabiwać. Wjeršk ma być 22. septembra „superkokot“ na Běłej Górje. Župje Delnja Łužica přisłuša dźewjeć wjetšich młodźinskich skupin z wjac hač 400 čłonami.
Přidružnicy prjedy do šule
Kamjenica. Njedostatka wučerjow na sakskich šulach dla chce kultusowy minister Christian Piwarz (CDU) 400 přidružnikow prjedy přistajić hač planowane. To piše dźenik Freie Presse. Zaměr naprawy je, zo ma spočatk noweho šulskeho lěta dosć wučerjow w rjadownjach skutkować. Mjeztym trěbna třiměsačna kwalifikacija přidružnikow je dalša přičina za doprědkasćehnjene přistajenja.
Gymnaziastki znowa w finalu
Pčołar – live a w filmje
Chrósćicy. Bjez pčołkow njeje mjedu, a tež žanoho sadu na štomach. Pilne pčołki pak trjebaja podpěru čłowjeka. Wo dźěle pčołarja w běhu lěta rozprawja ze swójskich nazhonjenjow Jan Šołta z Konjec jutře, pjatk, w 19.45 hodź w Chróšćanskej putniskej hospodźe. Zakład budźe zajimawy krótkofilm „Lěto pčołarja“, kotryž su před něšto časom Ralbičanscy šulerjo filmoweho kružka pod nawodom SAEK nawjerćeli. Pčołar Jan Šołta tež rady na prašenja wotmołwja. Sobotu w 16 hodź su zaso dźěći přeprošene na serbske dźěćace kino do hospody.
Stacije maja mjena swjatych
Kamjenc. Jednotliwe stacije Kamjenskeje chorownje maltezow swj. Jana maja nětko mjena škitnych swjatych. Tak je porodna stacije po swj. Margareće pomjenowana, paliatiwna stacija po swj. Rafaelu. Dalše stacije noša mjena swj. Lukaša, Bena, Borbory a Katyrny. Na te wašnje chorownja swój křesćanski charakter sylnišo zwuraznja, zdźěleja maltezojo w nowinskim wozjewjenju.
W muzeju nowolětka formować
Pohodowne zetkanje w znamjenju ekumeny
Hodownička katolskich Serbow tachantskeje wosady njedźelu po Nowym lěće steješe tež lětsa cyle w znamjenju ekumeny. Poměrnje bohaty běše hižo wopyt nyšpora w cyrkwi Našeje lubeje knjenje z prelatom Witom Sćapanom a superintendentom Janom Malinkom. Derje přihotowanu pobožnosć wobrubi kwartet młódšich wosadnych z někotrymi hodownymi pěsnjemi, mjeztym zo přewodźeše tachantski kantor Friedemann Böhme zhromadne kěrluše na pišćelach.
Policija (11.01.18)
Wobšudźić spytali
Běła Woda. Dohromady dźewjeć razow su njeznaći w Běłej Wodźe a we wokolinje spytali, wobydlerjam z trikom nahladne sumy pjenjez wulišćić. Tak prošachu woni na přikład jako „wnučkojo“ telefonisce wo 15 000 eurow. Na zbožo so trik w žanym padźe šlachćił njeje.
Młodostny so wobarał
Wojerecy. Jako policija zawčerawšim wječor na Wojerowskim Łužiskim naměsće skupinu ludźi kontrolowaše, bě tam tohorunja 15lětny młodostny, za kotrymž hižo pytachu, dokelž bě doma ćeknył. Tón pak so tak mócnje wobaraše, a dyrbjachu jemu ruce sputać, zo móhli jeho staršimaj přepodać. Kajke tele zasowidźenje skónčnje bě, bohužel znate njeje.
Spěšny internet za wšěch
Gmejna Trjebin nadźija so stoprocentneho spěchowanja
Trjebin (AK/SN). Wutwar spěšneho interneta za cyłu komunu je dale wulki zaměr gmejny Trjebin. Cyłkownje płaći projekt něhdźe 386 000 eurow. Gmejnscy radźićeljo su na swojim wčerawšim posedźenju jednohłósnje wobzamkli, za to 38 000 eurow swójskich srědkow do hospodarskeho plana zapisać. Financować móža to dźakowano přidatnym dochodam z přemysłoweho dawka 2017. „Běchmy ze 175 000 eurami dochodow planowali, dóstali smy hač do kónca lěta 315 000 eurow“, rozłoži komornica Carmen Petrick zwjeselace wuwiće srjedźołužiskeje komuny.
Transportej wojerskich tankow na awtodróze A 4 je policija ...
Město Choćebuz so wobdźěli
Choćebuz (SN/at). Choćebuz towaršnostnu mnohotnosć wjele lětdźesatkow praktikuje. Z hordosću skedźbni wyši měšćanosta Holger Kelch (CDU) wčera na nowolětnym přijeću komuny na to, zo „smy najwjetše město kraja Braniborskeje“. Wotpowědnje je Delnjoserbski dźěćacy a młodźinski ansambl pod nawodom Geralda Schöna zarjadowanje kulturnje sobu wobrubił.
W tym zwisku připowědźi wyši měšćanosta Kelch wobdźělenje Choćebuza na krajnym wubědźowanju „Rěči přichilena komuna“. „To je derje a wažne, dokelž je UNESCO delnjoserbšćinu jako ,definitiwnje wohroženu‘ zastopnjowała.“ Ze swojim wobdźělenjom wopokazuje komuna wšitkim serbskim wobydlerjam, towarstwam a institucijam w Choćebuzu swój respekt a waži sej prócowanja wo zachowanje delnjoserbšćiny.
Wjesnym přiradam a towarstwam Kelch poruči, swoje požadanje za wubědźowanje zapodać direktnje krajnemu sejmej w Podstupimje abo hač do 5. februara społnomócnjenej města za serbske naležnosće. Za zmysłapołne wón ma, wšitke podłožki w radnicy zjeć.
Krótkopowěsće (11.01.18)
Prezentacija modernizowana
Wojerecy. Město Wojerecy je swoju internetnu stronu znowa wuhotowało. Wobsahowje njeje so ničo změniło, optisce pak je wona modernizowana. Zdobom pokazuje město na swoje serbske korjenje, je tež přinoški wo Serbach zapřijało, serbskorěčne pasaže pak žane njenańdźeš. Z přestajenjom je zdobom dalša strona přistupna, kotraž staja 750lětne wobstaće města do srjedźišća.
Zrěčenje podpisałoj
Budyšin. Nawoda Powołanskošulskeho centruma za hospodarstwo a techniku Budyšin Uwe Richter a direktorka tudyšeje statneje studijneje akademije prof. dr. Barbara Wuttke staj kooperaciske zrěčenje podpisałoj. Wusměrjene je wone na praksu bliske a kwalitatiwnje wysoke kubłanje, zo hodźała so potrjeba fachowych mocow zawěsćić. Wobsah dojednanja su zhromadne projekty.
Riziko powodźenjow přiběra
