Krótkopowěsće (30.01.18)
Dalše myto za serbski film
Bochum. Film „Zmij (Der Drache)“ Angele Schuster je zašły tydźeń juryjowe myto wubědźowanja krótkofilmow „Linse“ 2018 Bochumskeje uniwersity dobył. Mjez druhim stej „wosobinske rozestajenje filmowče ze swojej zańdźenosću“ a „přeće, zachować kulturny pochad“, jurorow přeswědčiłoj, kaž we wopodstatnjenju rěka. Wojerowčanka Schuster zaběra so w filmje ze zachowanjom serbskosće. Zapřijate su tež serbske pasaže, kotrež rěči Celina Šołćic z delnich Sulšec.
Dobry wunošk z błyskanja
Wojerecy. Wjac hač 120 000 eurow je město Wojerecy loni z błyskanjom zasłužiło. Stacionarne błyskače wunjesechu 75 000 eurow, mobilne 46 000. Kaž Sächsische Zeitung rozprawja, běštej błyskačej na Drježdźanskej a Kulowskej dróze w Němcach najwunošnišej. Na Drježdźanskej su dohromady 1 125 přespěšnych šoferow błysknyli, na Kulowskej 1 529.
Planuja domizniski swjedźeń
Policija (29.01.18)
Wopiteho dwójce lepili
Budyšin. Hnydom dwójce je policija sobotu wječor w Budyšinje dospołnje wopiteho muža za wodźidłom awta lepiła. Při kontroli na Drježdźanskej dróze zwěsćichu pola 31lětneho 2,1 promil alkohola w kreji. Zastojnicy sej tuž jězbnu dowolnosć muža wobchowachu. Bórze na to so njepowučomny znowa do awta sydny a chcyše z nim wotjěć. Tónraz pak zastojnicy tež klučik awta sćazachu, zo bychu dalšej jězbje zadźěwali.
Prawje pomhać nawuknyć
Smjerdźaca. Kurs za prěnju pomoc při njezbožach z małymi dźěćimi w domjacnosći přewjedźe Serbske šulske towarstwo jutře, wutoru, wot 16 do 18.30 hodź. w Smjerdźečanskim swójbnym a kubłanskim srjedźišću LIPA. Wobdźělnicy zeznajomja so z najčasćišimi strachami a njezbožemi, kotrež dźěćom w prěnich lětach hroža. Wobdźělenje płaći 15 eurow.
Do jubilejneho lěta
Budyšin. Na 20. róčnicu załoženja zhladuje lětsa Budyske towarstwo wuchowarjow rěče. Prěnje zarjadowanje towarstwa w jubilejnym lěće wotměje so jutře, wutoru, w 19 hodź. w Budyskej Sprjewinej pensiji. Pod hesłom „Wobraz a słowo“ předstaja so dr. Sabine Kambach a gymnaziasća. Zastup je darmotny.
Ptačokwasny program
Myšecy/Haslow. Runja zašłym lětam su dźěći a kubłarki Myšečanskeje pěstowarnje „Při baćonjacym hnězdźe“ tež lětsa rjany pisany serbsko-němski ptačokwasny program nazwučowali. Srjedu, 31. januara, w 15.45 hodź. předstaja jón na Bizoldec žurli w Haslowje. Wšitcy starši, dźědojo, wowki a dalši zajimcy su na popołdnjo wutrobnje přeprošeni.
Z ingwerom warić
Słowjanska folklora zahoriła
Hórki (fap/SN). Młoda skupina Čłonstwo za integraciju ludoweje akordeonoweje kultury (Čilak) je po někotrych lětach přestawki zaso zabawny spěwny wječor słowjanskeje folklory na Smolic statoku w Hórkach wuhotowała. Wězo su kaž hižo prěni raz kotoł słódneje kobołkoweje poliwki nawarili. Wo wolijowany hłós postaraštej so dobre točene čěske piwo a wótra kapka słowakskeho palenca. Spodobna nalada běše tuž zaručena.
Pytaja nowe wužadanje
Gmejna Njebjelčicy chce so na inowatiwnym projekće wobdźělić
Njebjelčicy (JK/SN). Wopismo za dobyće wubědźowanja „Jadriwa wjes“ w kategoriji małe wsy njebě ani hišće tak prawje wuschnyte, da žno předstaji Njebjelčanski wjesnjanosta Tomaš Čornak (CDU) minjeny štwórtk gmejnskim radźićelam nowy pilotowy projekt, na kotrymž móhła so gmejna wobdźělić. W tym padźe jedna so wo akciju ratarsko-ekonomiskeho wotrjada Göttingenskeje uniwersity, kotruž spěchuje Zwjazk a kotraž je po cyłej Němskej wupisana. Wubědźowanje spěchuje wuwiće konceptow k dołhodobnemu wužiwanju krajinow ze socialno-hospodarskimi systemami. Njebjelčenjo móhli na te wašnje projekt „Njebjesa“ njedaloko Miłoćic bytostnje dale wuwić. Tu dźe tež wo nowe formy, ratarsku pódu wužiwać a přirodu škitać. To je za Njebjelčanow prawe wuchadźišćo. Tuž radźićeljo přihłosowachu, zo gmejna wotpowědnu próstwu Göttingenskej uniwersiće zapoda. Projekt ma so spočatk 2019 zahajić. Ze spočatnje wjace hač 400 zajimcow je 40 prěnje koło přetrało. Nětko móhli Njebjelčicy hišće wuspěšnje do wubědźowanja zapřimnyć.
Swoju hornjołužisku premjeru je ptačokwasny program SLA „Po ...
Krótkopowěsće (29.01.18)
Serbja na wikach zastupjeni
Berlin/Drježdźany. Smjerdźečanska rejwanska skupina je pjatk a sobotu na Zelenym tydźenju w Berlinje wurězki ze swojeho aktualneho programa předstajiła. Prěni króć hudźiła je na wikach wčera dujerska kapała Horjany. Tež na pućowanskich wikach kónc tydźenja w Drježdźanach běchu Serbja prezentni. Nimo města Budyšina poskićeše tam pčołar Jan Šołta z Konjec swoje wudźěłki.
Přichod wosady rozjimać
Choćebuz. Dźěłowa skupina Serbska namša a předsydstwo towarstwa Serbska rěč w cyrkwi chcetej přichod serbskeje wosady na wosebitym zetkanju w aprylu w Korjenju rozjimać. Njedawno stej předewzaća lěta 2018 tematizowałoj. 17. junija chcedźa pólsko-serbske kemše w Žarojwe k 300lětnemu wudaću serbskorěčneho katechizma wuhotować.
Přetwarja łubju dwórnišća
Spěwaja w hospodźe
Chrósćicy. Spěwny wječor wotměje so jutře, sobotu, w Chróšćanskej putniskej hospodźe. Wot 19.45 hodź. budźe tam z hosćom muska skupina Přezpólni. Njezměja jenož akordeon za přewod sobu, ale tež dosć spěwnikow za publikum, a chcedźa z nimi zhromadnje spěwać. Wšitcy zajimcy su wutrobnje přeprošeni – wšojedne, hač chcedźa swoje hłosy mócnje sobu klinčeć dać abo jenož trochu sobu zynčeć, hač staroznate ludowe pěsnje hajić abo woteznate štučki sej zaso přiswojić. W kóždym padźe je wo hudźbnu towaršliwosć postarane.
Kak drjewo po wichoru rumować
Stróža. Informaciske zarjadowanje za mějićelow lěsa přewjedźe zarjadnistwo biosferoweho rezerwata Hornjołužiska hola a haty hromadźe z wokrjesnymaj lěsniskimaj zarjadomaj Budyšin a Zhorjelc štwórtk, 1. februara, w 19 hodź. w Stróžanskim Domje tysac hatow. W srjedźišću steji rumowanje lěsow po škodach wichora „Friederike“. Wokomiknje dźě je přeco hišće jara strašne, bjez wotpowědnych znajomosćow w lěsu drjewo rumować chcyć. Při tym móhło k ćežkim njezbožam dóńć.
Porěča wo spěchowanju
Policija (26.01.18)
Wupad miliny wužić chcyłoj
Mały Wjelkow. Cyle překlepani drje zdachu so być njeznaći, kotřiž chcychu so hižo minjeny pjatk, 19. januara, wječor do kupnicy při hłownym puću w Małym Wjelkowje zadobyć. W tym času tam mjenujcy runje žanu milinu njemějachu, tak zo spytachu zachodne durje z ruku wočinić. To pak so jim njeporadźi, a tak dyrbjachu z prózdnymaj rukomaj woteńć. Policija pyta nětko swědkow, kotřiž su wony dźeń w času wot 20.50 do 21.30 hodź. wosoby abo jězdźidła před kupnicu wobkedźbowali. Štóž je něšto widźał, njech přizjewi so pod telefonowym čisłom 03591/ 35 60.
při twarnišću
Spočatk měrca přestawka nimo
Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.
Po dobrych wosom měsacach twarskeho časa maš w Pančicach-Kukowje zaćišć, zo je so wjes chcyjo nochcyjo na twarnišćo noweho mosta nad Klóšterskej wodu zwučiła. Tankownja na kromje wsy je swoje wotewrjenske časy přiměriła, dejnerowy wobchod z wulkimi plakatami zwonka wsy na so skedźbnja a dale wo přižiwjenje wojuje, mějićelka kwětkoweho wobchoda je swoju předawarnju nachwilnje zawrěła a dźěła w tym času we Wudworskim zahrodnistwje.
