Krótkopowěsće (02.02.18)
Dalše koło na dobro wsow
Drježdźany. Třeću namołwu „Witalne wjesne jadra a městne srjedźišća we wjesnym rumje“ je sakske ministerstwo za wobswět a ratarstwo dźensa startowało. Z programom podpěruja projekty, wusměrjene na wuwiće wsow, a wudospołnjeja prócowanja we wobłuku regionalneho wuwića Leader. Za lěto 2018 přewostaja Sakska 15 milionow eurow spěchowanskich srědkow.
Nowa železniska karta
Budyšin. Aktualizowana kompaktna karta „Železnicy w Sakskej“ dawa přehlad wo wšěch železniskich čarach w swobodnym staće kaž tež informacije wo tarifach a móžnosće, kontakt nawjazać. Ćišćenku poskićeja wotnětka we wšěch wobchadnych zwjazkach Sakskeje, w ćahach a serwisowych zarjadnišćach, zdźěli dźensa Zaměrowy wobchadny zwjazk Hornja Łužica-Delnja Šleska ZVON.
Hódančko pječa rozłušćene
Wotewru wosebitu wustajeńcu
Stróža. Po zymskej přestawce je wot dźensnišeho Stróžanski wopytowarski informaciski centrum biosferoweho rezerwata Hornjołužiska hola a haty Dom tysac hatow zaso přistupny. Hižo jutře, pjatk, w 17 hodź. wotewru jednu z lětušich třoch wosebitych wustajeńcow. W njej su widźeć mólby a paslenki, nastate loni we wobłuku dźěćaceho a młodźinskeho wubědźowanja Domowinskich župow Budyšin, Kamjenc a Wojerecy pod hesłom „Krabat 2.0“. We wobłuku wotewrjenja porěči biograf a genealoga Hans-Jürgen Schröter z Kulowa wo žiwjenju Johanna von Schadowitza (1624– 1704), kiž je jako Krabat do łužiskich stawiznow zašoł.
Zhromadnje štomiki spalić
Chrósćicy. Swój wusłuženy hodowny štomik móža Chróšćenjo njedźelu, 4. februara, jednorje a přijomnje wotbyć. Wohnjowa wobora wšitkich wobydlerjow přeproša, wot 16 hodź. při wohnjowobornej gratowni zhromadnje hodowne štomiki spalić. Wo ćělne derjeměće je postarane. Organizatorojo nadźijeja so bohateho wopyta.
W kwasnej drasće na žurlu ćahnyli
Sněhakowanske lěhwo wuspěšne
29 šulerjow 7. lětnika Worklečanskeje wyšeje šule „Michał Hórnik“ přebywaše tele dny w sněhakowanskim lěhwje w čěskim Bedřichovje. Nimo sportoweho wučerja Křesćana Bejmaka, šulskeho nawody Křesćana Korjeńka a jeho syna Měrka staraštaj so tež čěskaj wučerjej wo šulerjow. Wonaj nawučištaj jich na čućiwe a žortne wašnje sněhakowanje. Šulska socialna dźěłaćerka Rěčneho centruma WITAJ Franciska Zopic młodostnych tohorunja do Čěskeje přewodźeše.
Wjace wužiwarjow zapisanych
Biblioteki z elektroniskim wupožčowanjom bilancuja lěto 2017
Kamjenc (SN/MWj). Štóž měni, zo budu biblioteki medialneje změny dla bórze njetrjebawše, móhł so přez wopyt jednoho ze 14 zarjadnišćow, kotrež w hornjołužiskim zwjazku „Onleihe“ hromadźe dźěłaja, wo napřećiwku přeswědčić dać. Mjeztym pjeć lět wobstejacy zwjazk wobydlerjam w Budyšinje, Biskopicach, Habrachćicach, Zhorjelcu, Wojerecach, Kamjencu, Lubiju, Niskej, Ottendorfje-Okrilli, Radebergu, Radebeulu, Rózborku, Běłej Wodźe a Žitawje zmóžnja, biblioteku mobilnje wodnjo a w nocy „wopytać“. Loni bu tónle poskitk 17 235 razow wužiwany, bilancuje nawodnica Kamjenskeje měšćanskeje biblioteki Marion Kutter. Na te wašnje su 89 485 medijow elektronisce wupožčili, štož je nimale 20 000 wjace hač lěto do toho. Wjace hač tysac nowych wužiwarjow je so w lěće 2017 za online-wupožčowanje zapisało. Najwoblubowaniše běchu kriminalne romany Sebastiana Fitzeka a Karin Slaughter kaž tež žonjace romany Lucindy Riley a Charlotty Link.
Wo putniskim puću
Policija (01.02.18)
Pječenka fuk
Wodowe Hendrichecy. Płašć a sportowa toboła zhubiłoj stej so wutoru we Wodowych Hendrichecach, jako so njeznaći do jednoswójbneho domu zadobychu. Při tej składnosći pohladachu paduši tež do mróžaka swójby. W nim namakachu zamróženej plecy sorny a jej sobu wzachu. Dohromady načinichu něhdźe 200 eurow škody.
Skućićela zajeli
Łaz. 40lětneho muža su policisća zawčerawšim rano we Łazowskim bydlenju jeho žiwjenskeje towarški zajeli. Wón je podhladny, zo bě loni w oktobru znatu zbił a swědkam njeskutka ze smjerću hrozył. Sudnik Budyskeho hamtskeho sudnistwa je nětko přikazał muža zajeć. 40lětneho dowjezechu wčera w běhu dnja do jastwa.
Zawod a sydlišćo zaso jednota
Hórnikecy jako wjes a tamniša bywša briketownja słušeštej něhdy wusko hromadźe. To ma so přichodnje we wjesnym wobrazu zaso sylnišo wotbłyšćować.
Wojerecy (AK/SN). Za Wojerowski měšćanski dźěl Hórnikecy z jeho 680 wobydlerjemi předleži nětko naćisk přichodneho měšćanskotwarskeho wuwića. Čłonojo měšćanskeje rady su na swojim zašłym posedźenju dokumentej přihłosowali. Tak sćěhowachu radźićeljo jednohłósne poručenja Hórnikečanskeje wjesneje rady a techniskeho wuběrka města Wojerec. „Rozsud měšćanskeje rady je wažny měznik. Mam to za jara pozitiwne“, podšmórny Otto-Heinz Lehmann, wot lěta 2009 wjesny předstejićer. Hač do lěta 2030 chcedźa ze saněrowanjom a nowotwarami wjesny wobraz polěpšić. Dalokož je to wobydlerjam přicpěwajomne, maja so historiske twarjenja na kóždy pad zachować.
Na Konječansku kapałku je so wčera zaso jeje zwón nawróćił. Po ...
Wuwiwaja program za přichod
Kak měło sprjewine město za pjatnaće do dwaceći lět wupadać, je wobsah noweho směrodajneho programa, kotryž chcedźa w Budyšinje zdźěłać. W nim změja tež Serbja swoje městno.
Budyšin (CK/SN). Budyšin je stolica Serbow. Serbska přirada měšćanskeje rady wo tym kontrowersnje diskutuje. Ale towarstwa, kotrež maja jenož mało abo nimaja scyła ničo ze Serbami činić, začuwaja runje to jako jara wažne. Je to jedne z ćežišćow za dalše wuwiće města Budyšina. Prěnje mysle za „Směrodajny program 2030+“ je Markus Gießler wčera měšćanskim radźićelam předstajił. Dokument ma wizije woznamjenjeć a podawa tak ramik za konkretne naprawy w integrowanym měšćanskowuwićowym koncepće. Bjez tajkeho programa žane wuhlady na spěchowanje njejsu, rjekny referent Budyskeho wyšeho měšćanosty.
