Přidatne serbske napisy na pućnikach wokoło Budyšina wjetšinje zawěsće prawje nadpadnyli njejsu, za to pak jich wotstronjenje. Nalěpki bě „Iniciatiwa za dospołnu dwurěčnosć w zjawnym rumje“ wobsta­rała a – to dyrbimy dospołnosće dla tež rjec – bjez dowolnosće připrawiła. Swój cil, zo su taflički w serbskim sydlenskim rumje generelnje dwurěčne, drje iniciatiwa dotal docpěła njeje, ale wočakńmy. Derje so dopominam na čerwjene nalěpki „A serbsce“ na jendorěčnych němskich tafličkach abo na cyły nalěpk na wjesnej tafli w Chrósćicach kaž tež na diskusije wo nich. Tehdy kaž dźensa je prašenje, hač je trjeba pućniki přelěpjować. Měnjenja běchu a su dale rozdźělne. Přiwšěm pak pokazuje iniciatiwa na njedostatk a wukonja tež ćišć na zamołwitych, płaćiwe zakonje dodźeržeć. Njech sej kóždy swoje měnjenje twori. Wosobisnce měnju: Ideje ći młodźi maja! Janek Wowčer

Wokrjes Budyšin je minjeny tydźeń wjacore serbske napisy na pućnikach wotstronić dał a připowědźi policiji wobškodźenje wěcow přizjewić.

Budyšin (SN/JaW). Na wjacorych wobchadnych taflach we a wokoło Budyšina, předewšěm při zapadnej tangenće, jewjachu so njedawno přidatne serbske napisy. Po wšěm zdaću njeznaći pak běchu je minjene dny zaso wotstronili, kaž wuchadźa z nowinskeje zdźělenki „Iniciatiwy za dospołnu dwurěčnosć w zjawnym rumje“, kotraž chce anonymna wostać.

Rěčny camp

Jarješk. W krajnym młodźinskim domje w Jarješku wotměwa so tón tydźeń rěčny camp Choćebuskeje wotnožki Rěčneho centruma WITAJ. Hač do pjatka přebywa w nim 13 dźěći wosom do 14 lět, kotřiž w šuli delnjoserbsku rěč wuknu. Nimo ekskursijow a pućowanjow zaběraja so prózdninarjo intensiwnje z delnjoserbskej rěču.

Dźěławych informowali

Freiberg. Přistajenych insolwentneho twarca solarnych modulow Solarworld w Freibergu su dźensa wo móžnym wu­tworjenju transferneje towaršnosće informowali. Ta by nastała, by-li k zrěčenju z nowym zajimcom dóšło, rjadowar insolwency zdźěli. Kónc tydźenja bu znate, zo ma w Freibergu jenož 283 z něhdy wjace hač tysac dźěławych wostać. Wšitcy druzy du do transferneje towaršnosće.

Zapalerstwo było

Ostrava. Woheń, kotryž je w Třincu-Gutech do dna zničił swojoraznu drjewjanu cyrkej ze 16. lětstotka (hlej SN pjatk 2. str.), bu z wotmysłom zamiškrjeny. Policija je třoch młodostnych jako skućićelow zwěsćiła, z kotrychž je sudnistwo dweju jako hłowneju winikow dało zajeć. Jimaj hrozy 15 lět jastwa. Motiw njejstaj wonaj móhłoj mjenować.

Bjerjer zastajencow w jastwje

Zhorjelc. Wutoru wječor je 32lětny we Wuskidźi najprjedy dwě dźěsći a po tym jeju 27lětnu mać jako zastajencow wzał. SEK muža přemó a jeho nachwilnje zaja (SN rozprawjachu). Přepytowanski sudnik Zhorjelskeho hamtskeho sudnistwa je wčera rano přećiwo wobskorženemu na próstwu Zhorjelskeho statneho rěčnistwa zajeće branja zastajencow a wotpohladneho zranjenja ćěła dla přikazał. Skućićelej hrozy pjeć do 15 lět jastwa.

Wobornicy kóčku wuchowali

Biskopicy. Dźensa dopołdnja je woby­dler na Lessingowej w Biskopicach měšćansku wohnjowu woboru wo pomoc prosył. Dokelž sedźeše kóčka hižo hodźiny dołho na chětro nahłej třěše a muž njemóžeše ju tež z ani jeničkej hrajku dele zwabić, njewědźeše sej wón žaneje rady a woleše hawarijowe čisło wobory. Na kóncu wšak móžeštaj wobsedźer kóčki a jeho žona swojeho lubuška cyle zbožownaj zaso do ruki wzać.

Nachribjetnik a wačok fuk