22lětny so před ćah stupił

Biskopicy. 22lětny Libyčan je so wčera w nocy w Biskopicach před čakacy ćah na kolije stupił a jemu tak znjemóžnił dypkownje wotjěć. Dokelž bě młodostny na bordowym nuzniku kurił, jemu personal ćaha dalejězbu zakaza. Tak je so na ćěridłowym wozu kruće dźeržał. Kaž so wukopa, steješe njeskutka podhladny pod wliwom wopojenskich srědkow. Krótko do přichada policije wopojeny pasažěra při wulězenju wotpohladnje storči a na njeho pluny. Zastojnicy Habrachčanskeje zwjazkoweje policajskeje inspekcije jeho a dalšeju Libyčanow, kotrajž měještaj cuzu móšeń a papjery při sebi, nachwilnje sobu wzachu. Jim hrozy chłostanje nuzowanja, padustwa a zranjenja ćěła dla.

Nakładne awto do přirowa zajěło

Łužnica. Na B 97 blisko Łužnicy je wčera dopołdnja nakładne awto do přirowa zajěło, dokelž bě šofer kontrolu nad wodźidłom zhubił. LKW so na to zwróći a tony ćežke róle płata so z njeho kulachu.

Budyšin (SN). Wot dźensnišeho płaća we wobchadnym zwjazku Hornje Łobjo (VVO) nowe płaćizny. Pola jednotliwych jězdźenkow a dnjowych kartkow so ničo njezměni. Přerěznje pak stupaja płaćizny wo 1,9 procentow. Přičina su kóšty za material a personal, štož njehodźi so z płaćiznami ćěriwa wurunać.

Socialne poradźowanje

Wjazońca (SN). Zapósłanc Lěwicy w Sakskim krajnym sejmje a wokrjesneho sejmika, prawiznik Hajko Kozel, přeproša na darmotne socialne poradźowanje. Zhromadnje z prawiznikom Gregorom Janikom, kiž je w socialnym prawje wosebje wobhonjeny, móže wón pomhać při rozrisanju problemow, kotrež so husto w socialnych prašenjach jewja, kaž na přikład nastupajo Hartz IV. Poradźowanje je jutře, 2. awgusta, wot 15 hodź. do 17 hodź. w Domje młodźiny na Lěsnistwowym puću 5 we Wjazońcy.

Smjerdźečanska wohnjowa wobora 60lětne wobstaće swjećiła

Smjerdźaca (aha/SN). Po tym zo bu Łazk do Smjerdźaceje zagmejnowany, bydleše tam něhdźe 260 ludźi. A po zakonju dyrbjachu gmejny z wjac hač 200 wobydlerjemi dobrowólnu wohnjowu woboru měć. Tak je k tomu dóšło, zo w Smjerdźacej 1957 tajku załožichu. Lěto po tym natwarichu gratownju, kaž ju dźensa hišće maja. Minjeny kónc tydźenja zhladowachu kameradojo na swoje 60lětne wobstaće z třidnjowskim swjedźenjom.

Prěni nawoda wobory bě Pawoł Kušk a po nim steješe štyri lětdźesatki Pětr Rachel na čole woborneho cyłka. Mjeztym stara so wo wotpowědne wukubłanje a staj­nu zasadźensku hotowosć kameradow Norbert Róbl, kiž bě tež z wotběhom a wothłosom na jubilejny swjedźeń přewšo spokojom.

Kaž w dowolowym času z wašnjom, tež lětsa na tymle městnje stajnje wutoru a štwórtk wosebitu seriju wozjewjamy. W njej předstajamy wosobiny, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.

Na wulkim štyristronskim statoku w Habrachćicach, hdźež zaběraja so z bunjacym kofejom, nańdźeš wobšěrnu přehladku zdźěla antikwariskich kofejowych mašinow. Mjez něhdźe 120 tam wustajanymi modelemi je najstarši dwěsćě lět. Jenož mało ludźi so tam rozhladowacych pak wě, zo je hódnu přehladku přewostajił jako trajnu požčonku Miłočan Fred Walter. Dźensa 51lětny chodźeše hač do 1982 w Pančicach-Kukowje do šule a nawukny w Kamjenskim hosćencu „Stern“ powołanje kucharja. Po přewróće bě kuchar a pinčnik pola Němskeje železnicy, posłužowacy pućowacych w jědźnych wozach na čarach Němskeje, ale tež w ćahach do Wiena, Parisa a druhdźe.