Hač do spočatka noweho šulskeho lěta ma kuchnja Ralbičanskeje ...
Přenajerjam ratarskeje pódy swoje dźěło rozłožili
Čorny Hodler (CS/SN). Kóždolětnje wuhotujetej Radworske agrarne drustwo a Wulkowjelkowski zawod za agrarne wudźěłki tak mjenowany přenajerski swjedźeń w Čornym Hodlerju. Na te wašnje mějachu přenajerjo ratarskeje pódy zawčerawšim składnosć so zetkać a při tym widźeć, kak ratarskej zawodaj płoniny wužiwatej a što na nich plahujetej. Tohodla wotměwachu so cyłe popołdnjo kołojězby nimo polow a łukow, hdźež wobdźělnikam jednotliwe kultury rozłožichu a na jich wosebitosće skedźbnichu. Pozastali pak su tež při Radworskim dejnym kombinaće. Jeho wosebitostka bjezdwěla je, zo tam robotery kruwy deja, štož su wopytowarjo z wulkim zajimom sćěhowali.
Folkrock na Kulowskim torhošću
Policija (10.07.17)
Hižo popołdnju wopity
Běła Woda. Chětro hłuboko do škleńcy hladał je sobotu muž w Běłej Wodźe. To pak jeho njewotdźerža z awtom jěć. Na parkowanišću před kupnicu Kaufland swědcy wobkedźbowachu, kak wón swoje wosobowe awto typa Mercedes chětro napadnje wodźi a zaparkuje. Jako šofer na to po parkowanišću chabłaše, zawołachu swědcy policiju. Wobsadka policajskeho awta muža hišće w bliskosći dosahny. Přewjedźeny test pola 40lětneho wunjese, zo měješe 2,24 promilow alkohola w kreji, a to krótko po 15 hodź. Na to přewodźachu jeho k wotebraću kreje. Jeho jězbnu dowolnosć kaž tež klučik awta sej zastojnicy hnydom wobchowachu.
Dróhotwar tu a tam
Delanscy z najlěpšim časom
Wohnjowi wobornicy zarjadniskeho zwjazka so wubědźowali
Róžant (aha/SN). Wo pućowanski pokal zarjadniskeho zwjazka Při Klóšterskej wodźe wubědźowachu so minjeny pjatk mustwa wosom wohnjowych woborow a dalše tři młodźinske wobory.
Nawoda Róžeńčanskich wobornikow Frank Pjech staraše so tónkróć wo dobry wotběh wubědźowanja, štož hłowny sudnik Stefan Brückner z Dubrjenka chwalobnje hódnoćeše. Nimo Pjecha podpěrachu jeho Pětr Kokla, Manfred Kral a protokolantka Mariana Šnablec.
Na wšitkich wubědźowanskich městnach zarjadniskeho zwjazka wužiwaja wodu z wulkeho suda, w kotrymž je 10 000 litrow. Jeničce w Smjerdźacej bjeru wodu z rěčki. Kóžde mustwo, wobstejace ze sydom kameradow, dyrbješe tři B-hadźicy a dwě C-hadźicy po dołhosći 95 metrow wukłasć. Na to mějachu wobornicy z pjeć metrow zdalenosće přez 50 milimetrow šěroku dźěrku wodu pryskać, zo bychu dźesaćlitrowske sudobjo pjelnili. Młodźinske cyłki so po trochu hinašim modusu wubědźuja. Z 31,34 sekundami bě Pěskečanski dorost šěsć sekundow spěšniši hač młodźinske zastupnistwo Ralbic/Róžanta.
89lětny z padakom skočił
Sportować móžeš zawěrno w kóždej starobje. Najlěpši dopokaz toho dožiwichu sobotu na Narćanskim lětanišću. We wysokej starobje sej zwažić z padakom skočić, to wužaduje sej najwjetši respekt.
Narć (AK/SN). Karl-Heinz Noack je žiwy po zasadźe, zo njeje sport prašenje staroby, ale naležnosć hłowy. 89lětny běhar na dołhe čary z Wojerec bě sobotu mjez wobdźělnikami kóždolětneho tandemoweho skakanja na lětanišću w Narću. Wćipnota na lětanje jeho pohonjowaše. Jeho mandźelska Sigrid, syn Frank, wnučcy a prawnučcy běchu runje tak napjeći.
Skok z padakom bě swójba Karlej-Heinzej Noackej k 89. narodninam dariła. Wón bě sobotu mjez prěnimi, kotřiž so na tandemowy skok zwažichu. Jörg Blaeßius a Marko Koark jemu wšitko trěbne rozjasništaj. Wěstota steji při tajkim skoku wězo na prěnim městnje. Lajski skakar je před brjuchom nazhoniteho skakarja přiwjazany, tak zo móže tón wšitko kontrolować. Skónčnje zběhnje so lětadło typa Antonow 2 hač do wysokosće 2 600 metrow.
W Korzymskim wustajenišću Im Friese su kónc tydźenja prěni raz ...
Wotwěraja so chudšim swójbam
Wot dźensnišeho do 16. julija wotměwa so w Smochčanskim Domje biskopa Bena swójbny tydźeń „kultura zesylnja“. Tak chcedźa tež chudšim swójbam přiležnosć skićić, zo swoje swójbne žiwjenje a zhromadnosć zesylnja.
Smochćicy (SN/mwe). „W našim domje wusměrjamy so ze zarjadowanjemi přeco zaso tež na tych, kotrymž so tak derje njeńdźe, kotrež su so na přikład samopomocnym skupinam přizamknyli a so pola nas prawidłownje zetkawaja. To je nam runje tak wažne kaž hospodarskosć. Wona dźě je tež na čłowjesko-socialny narok wusměrjena“, wuzběhnje rektor Smochčanskeho Domu biskopa Bena dr. Peter-Paul Straube. 10. septembra swjeći katolska kubłanska městnosć a schadźowanski dom biskopstwa Drježdźany-Mišno 25lětne wobstaće.
„Za nas bě to dobre połlěto“, dr. Straube prěnje šěsć měsacow lěta 2017 wopisuje. Tak móžachu porno dobje wot julija do decembra 2016 z nimale 12 000 přenocowanjemi dźesaćprocentowske stopnjowanje registrować. K tomu słušeja mnohe dnjowe a wječorne zarjadowanja, tež serbske. Předewšěm dowolnicy w Smochčanskim domje rady přebywaja.
Z dopóznaćow za přichod wuknyć
Budyšin (SN/MiR). Před domskim na Bohatej hasy 29 w Budyšinje skedźbnjeja kopolaki na dóńt něhdy tam bydlaceje swójby Grossmann. Dźensa je tomu dźesać lět, zo bě iniciator akcije „kopolaki“ Gunter Demnig z Kölna tam štyri tajke dopominanske kamjenje zapołožił. Tak je dopołdnja wjace hač 70 zajimcow zhromadnje z Budyskim wyšim měšćanostu Alexanderom Ahrensom (SPD) a čłonami akciskeho kruha „Zetkanje ze židowstwom“ na něhdyšich židowskich wobydlerjow města spominało. „Chcemy so na zašłosć dopominać a z dopóznaćow za přichod wuknyć“, rjekny předsyda kruha dr. Peter-Paul Straube. „Sym sej wěsty, zo njeje so Němska hišće dosć rozestajała ze zaničowanjom židow a z kulturu tworjacymi. Přeprošam tuž k tomu, europsku zhromadnosć šěrić a rozdźěle narodow potwjerdźić“, rjekny Alexander Ahrens. Sobudźěłaćerka Budyskeho Serbskeho instituta Annalena Schmidt zwurazni: „Smy žiwi w času, w kotrymž so prawicarskopopulistiske a prawicarske myslenje šěri. Spominanje je dźensa tuž ćim wažniše.“
