Kedźbu swinjaceje mrětwy dla

Zhorjelc. Krajnoradny zarjad w Zhorjelcu namołwja wšitkich pućowacych, žane zwěrjeće wudźěłki z Čěskeje a Pólskeje do Němskeje njepřiwjezć. Přičina je mrětwa, kotraž je tam mjez dźiwimi swinjemi wudyriła. Fachowcy maja mjeztym wulki strach, zo so chorosć přez čłowjeka do Němskeje předobudźe a domjace swinje nadpadnje.

Uniwersity hroža ze stawkom

Praha. Čěske statne wysoke šule bědźa so hižo dlěši čas ze špatnym financowanjom. Po dorěčenju rektorow kaž tež šulskich dźěłarnistwow žadaja sej uniwersity za budget lěta 2018 přidatne 170 milionow eurow. Jeli knježerstwo namołwu njewusłyši, přewjedu nazymu protestne akcije. W najhóršim padźe zymski semester scyła njezahaja.

Ptački njenańdu picy dosć

Bad Elster. Ptački maja lětsa wočiwidnje přiběrajcy problemy, dorost porjadnje zastarać. Do stacije za hladanje ptakow a jěžow w Bad Elsteru woža dźeń a wjace wuhłódnjenych młodźatow, kaž wottam zdźěleja. Samo młodźata robustnych družin kaž rapakow a srokow su zdrjene. Prawdźepodobnje ptački dosć insektow njenańdu.

Sprjejcy (JoS/SN). Twarske dźěła na na­sypje podłu Sprjewicy w Sprjejcach tež tele dny zaměrnje postupuja. Samo na nuzowy pad bě krajne zarjadnistwo rěčnych zawěrow přihotowane. Při mosće přez Sprjewicu su brjóh podłu twarnišća z pěskowymi měchami skrućili. Byrnjež k nuzowemu padej kaž kónc junija z powodźenjom njedóšło, běchu wěstotne naprawy trěbne. „To bě situacija, na kotruž dyrbimy stajnje přihotowani być“, praji zamołwita za projekt Cathleen Steinert.

Haćenja při měrjenišću pegela su hižo dospołnje hotowe, nětkole koncentruja so dźěłaćerjo na wotrězk hornjeho dźěla rěki hač k mostej we wsy. Twarske dźěła su w dalokej měrje zakónčene, jeničce zwjeršna woršta pjeršće a trawa hišće pobrachujetej. Za to wužiwaja pjeršć, kotruž­ běchu do zahajenja twarskich naprawow­ zrumowali. Z bagrom ju na prawe městno dowjezu, zrunaja a płoninu hnydom z trawu zasyja. Meter po metru dźe doprědka. „Na wjeršku připrawimy potom hišće šćežku za škit nasypa­“, Cathleen Steinert wuswětla. „Tón je tež w zmysle wobydlerjow a zmóž­nja w nuzowym padźe zasa­dźenskim jězdźidłam najkrótši přijězd.“

Přednošk ministra přepołožić

Drježdźany. TU w Drježdźanach chce wustup zwjazkoweho justicneho ministra Heika Maasa (SPD) přichodnu póndźelu přepołožić. Poprawom chcyše Maas w słyšenskim šulskim centrumje wo šćuwańcy w interneće přednošować. Před Drježdźanskej uniwersitu pak chcetej AfD a Pegida přećiwo Maasej demonstrować. Runočasnje wotměja so na TU pruwowanja.

Za wyšu mzdu stawkowali

Lipsk. Sobudźěłaćerjo drobneho wikowanja Sakskeje a Durinskeje su dźensa znowa stawkowali. W Drježdźanach złožichu přistajeni předewzaćow Obi, H&M, Esprit, Kaufland a Ikea dźěło, zo bychu swoje žadanje za šěsćprocentowskim zwyšenjom mzdow potwjerdźili. Dźěłodawarjo poskićeja dotal 2,5 procentow.

Kóždy štwórty jaty wuknje

Drježdźany. Kóždy štwórty zasudźeny skućićel wužiwa čas w jastwje za kubłanje a kwalifikowanje. Po informacijach sakskeho justicneho ministerstwa bě w juniju 782 z cyłkownje 2 919 jatych w šulskim abo powołanskim wukubłanju. Tendenca pak woteběra. Kaž minister Sebastian Gemko (CDU) zdźěli, je kubłanski niwow jatych dźeń a snadniši.

Paduši pola frizera

Budyšin. Po wšěm zdaću měrja so pa­duši w Budyšinje přiběrajcy na frizerske wobchody. W juniju a juliju dóńdźe dotal k šěsć tajkim zadobywanjam, při kotrychž je zdźěla tójšto wěcneje škody nastało. Najbóle drastiski pad sta so minjeny kónc tydźenja při tachantskej cyrkwi. Z tamnišeho frizerskeho wobchoda pokradnychu njeznaći wjacore nožicy, tabletowy kompjuter marki Asus kaž tež pjenjezy z kasy. Mějićelka wobliči škodu na 2 500 eurow. Nimo toho nasta wěcna škoda na durjach a woknach.