Šula přechodnje w hrodźe

Freitag, 22. März 2024 geschrieben von:

Jednohłósnje za wukwartěrowanje wyšeje šule do knježeho domu

Worklecy (SN/AN). Wjesnjanosta gmejny Worklecy Clemens Poldrack witaše wčera wječor na wuradźowanje gmejnskeje rady w tamnišej wyšej šuli nimo radźićelow mjez druhim hosći z komornistwa a personalneho zarjada zarjadniskeho zwjazka Při Klóšterskej wodźe Katrin ­Kernowu, Andreju Lukašowu a Gabrielu Mikelowu kaž tež zastupjerku ratarskeho kubła Worklecy Valletta GmbH Elviru Schoffcynu. Přewjele dypkow drje na dnjowym porjedźe njesteješe. Hłowne ćežišćo tworješe pak rozsud wo zaměstnjenju wyšeje šule za čas přetwara, kotryž ma so najzašo w nazymje započinać. „Po kalkulaciji financielnje najznjesli­wiša opcija za gmejnu je přesydlenje do knježeho domu“, rozjima Clemens Poldrack, na čož radźićeljo jednohłósnje tomu přizwolichu. „Fachowe rumnosće a sportownju móhli šulerjo a šulerki tež za čas přetwara šule dale wužiwać. Planowane su někotre přetwarjenske naprawy, kotrež chce Valletta GmbH po zaměstnjenju šule dale wužiwać, kaž na přikład sanitarne naprawy w prěnim poschodźe.

Kolesowarjow a pućowarjow zastarać

Freitag, 22. März 2024 geschrieben von:

Róžant (JK/SN). Po teritoriju gmejny ­Ralbicy-Róžant wjedźe sydom kolesowarskich šćežkow kaž tež jedna pućowanska. Z tym je gmejna samo na sebi derje do syće hornjołužiskich kolesowanskich a pućowanskich šćežkow zapřijata. Na wčerawšim posedźenju gmejnskeje rady gmejny Ralbicy-Róžant předstaji sobudźěłaćerka Rakečanskeho regionalneho běrowa Hornjołužiskeje hole a hatow (OHTL) Claudia Steglichowa aktualny koncept kolesowanskich a pućowanskich šćežkow za region Hornjołužiskeje hole a hatow.

Towarstwo Kólesko je wčera w Slepjanskej cyrkwi swoju nowu drastowu knihu předstajiło. Je to třeći dźěl rjada knihow ­„Gładźarnica“, kotryž zaběra so ze Slepjanskej burskej drastu. Nowa kniha wěnuje so kwasej a jeho wosebitym drastam. Předstajenje awtorki knihi Elviry Hantšo (2. wotlěwa) a lawdatorki dr. Justyny Michniuk (3. wotlěwa) wobrubjachu spěwarjo towarstwa „Kólesko“. Foto: Gerald Schön

Krótkopowěsće (22.03.24)

Freitag, 22. März 2024 geschrieben von:

Mjeńšinowa rada so zešła

Berlin. W nowych rumnosćach Mjeńšinoweho sekretariata na Jendźelskej dróze w štwórći Charlottenburg je so wčera Mjeńšinowa rada domoródnych mjeńšin Němskeje schadźowała, kaž předsyda Domowiny Dawid Statnik na naprašowanje informowaše. Woni su Romanijej Rose gratulowali, kiž bu na dalše štyri lěta jako předsyda Centralneje rady Sintow a Romow woleny.

Wólbna komisija zaručena

Choćebuz. Za sobudźěło we wólbnej komisiji za wólby noweje Rady za naležnosće Serbow Braniborskeje je so sydom wosobow přizjewiło. To je telko, kelkož smě gremijej maksimalnje přisłušeć, informowachu na posedźenju předsydstwa župy Delnja Łužica wčera w Choćebuzu. Zwjazkowe předsydstwo Domowiny chce wólbnu komisiju 12. apryla zasadźić.

Liča dale ze škodami

Zajědojćenje přez proteiny

Donnerstag, 21. März 2024 geschrieben von:

Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (28)

Před lětami běch jónu mjez hajkom a rěpikowym polom po puću. Běše ćopłe nalětnje ranje po zymnej nocy, a rěpik hižo pilnje rosćeše. To wuhladach na polu zwěrjo, kotrež so dźiwnje hibaše a tež njetwochny, jako na nje zawołach. W rěpiku ležeše sornik na jednej stronje a pohibowaše swoje nohi bjez koordinacije doprědka a dozady. Zadk a zadnjej noze běchu brunje zalěpjene. Jako zamołwiteho hońtwjerja zazwonich, wón bórze přijědźe a měnješe, zo je to zajědojćenje přez proteiny.

Tež pola domjacych žuwakow (Wiederkäuer) móže so wony fenomen w nalěću pokazać. Tohodla radźi tež kóždy nazhonity plahowar kruwow, kozow abo wowcow, skót w tym času pomału na čerstwu zeleń „zwučić“.

K jutram sej darik zhotowili

Donnerstag, 21. März 2024 geschrieben von:
Šulerjo a šulerki Kulowskeje Krabatoweje šule zaběraja so tele dny intensiwnje z wóskowanjom jejkow. Pod nawodom něhdyšeje wučerki Gizele Šołćineje rozestajeja so dźěći z motiwami a móžnymi mustrami. Na wubranych přikładach poda knjeni Šoł­ćina informacije k jednotliwym elementam a k symetriji. Wězo smědźa so šulerjo ­potom tež sami w dwójnej hodźinje wuspytać a sej tak indiwidualny darik k jutram zhotowić. Wóskowanje jejkow liči k dołhej tradiciji na Kulowskej zakładnej šuli a pod­šmórnje tak žiwosć serbskeje kultury a zwjazanosć z njej. Foto: Sabina Salowscyna

Hłowna dróha bórze zawrjena

Donnerstag, 21. März 2024 geschrieben von:

S 108 we Łazu po jutrach we wjacorych wotrězkach saněruja

Łaz (AK/SN). Sakski krajny zarjad za dróhotwar a wobchad (LASUV) chce statnu dróhu S 108 we Łazu a dale hač k wot­bóčce do Běłeho Chołmca hač do 2026 w třoch hłownych wotrězkach saněrować. Zahajić chcedźa projekt lětsa wot kupnicy Penny hač ke kromje wsy do Běłeho Chołmca. 2025 slěduje wotrězk wot kromy wsy ze směra Delnjeho Wujězda hač ke kupnicy a 2026 dalši wobłuk wot kromy wsy hač k wotbóčce do Běłeho Chołmca. „Zhromadna twarska naprawa je nuznje trěbna. Jako krajny zarjad přewozmjemy dróhotwar. Wotwodźowanje dešćikoweje wody, pitna woda a nadróžne wobswětlenje su nadawk gmejny“, rjekny zamołwity twarski nawoda Oliver Knick wutoru na informaciskim zarja­dowanju za wobydlerjow. Něhdźe sto ­zajimcow je do hosćenca „Stare dwór­nišćo“ přišło.

Policija (21.03.24)

Donnerstag, 21. März 2024 geschrieben von:

Drjewo zapalili

Nowa Wjeska. Njeznaći su wutoru składowanišćo drjewa na Hrańčanskej dróze w Nowej Wjesce zapalili. Woheń składowane drjewo kaž tež składowanišćo same zniči. Horcota wohenja wobškodźeše nimo toho wokna a durje bliskeho domskeho. Wohnjowi wobornicy wokolnych wsow woheń zhašachu. Wěcnu škodu trochuja na někak 10 000 eurow. Kriminalna posłužba pad nětko přepytuje. Wo motiwach skućićelow nětko hišće ničo prajić njemóža.

Šulerjo nowe pukloty podpěrali

Donnerstag, 21. März 2024 geschrieben von:

Wojerecy (SiR/SN). Na Wojerowskej dźěćacej a młodźinskej farmje, kotraž je w nošerstwje Křesćansko-socialneho kubłanskeho skutka, móžeše njedawno 20 nuklow do nowych puklotow přećahnyć. Mjez nimi je wot wotemrěća wohrožena Mišnjanska družina. „Smy sej modernu a wjetšu připrawu hižo dołho přeli“, praji nawoda farmy Klaus Helbig. Do projekta inwestowachu štyricyfrowu sumu pjenjez. Při tym pomhachu mnozy partnerojo, mjez druhim Łužiski center, drogerijowa kupnica „dm“ a Wuchodosakska lutowarnja.

Šulerjo Foucaultoweho gymnazija podpěrachu předewzaće z akciju „Genialnje socialnje“. Je to sakska najwjetša młodźinska solidaritna akcija, při kotrejž so šulerjo na najwšelakorišich polach angažuja a zasłužene pjenjezy za socialne projekty přewostaja. „Běchmy we wšelakich zarjadnišćach a firmach a smy tam sobu dźěłali. Dźěl nadźěłanych pjenjez, dokładnje 700 eurow, přepodachmy farmje“, powěda 15lětna Lea. Wona je na akciskim dnju w hladanskej słužbje dźěłała. Za angažowanu pomoc wšitkich wobdźělenych je Klaus Helbig jara dźakowny.

Před Serbskim domom w Budyšinje su sobudźěłaćerjo Budyskeje wobdźělenskeje a wobhospodarjenskeje towaršnosće (BBB) dźensa muster ze serbskim motiwom zwosadźeli. Tole činja kóždolětnje tradicionalnje do jutrow. Lětuša kreacija złožuje so we hłownym na dwě serbskej lipowej łopješce. Město hotuje so tuchwilu na jutry z tójšto serbskimi wjerškami. Foto: SN/Bojan Benić

Serbska debata

Neuheiten LND