Nabožne njeměry so na serbsku ludnosć wuskutkowali
Budyšin (CS/SN). Ludźo zawěsće z toho wuchadźeja, zo su nabožne rozestajenja wokoło Bukec a wokolinje we 18. a 19. lětstotku skerje njewuznamna tema. Tola stawiznarka dr. Lubina Malinkowa je wčera w Budyskim archiwowym zwjazku přednošowała a dopokazała, zo tomu scyła tak njeje. Serbja w tutej wosadźe mjenujcy nabožnu swojoraznosć wuwichu a k nonkonformizmej chilachu. Potajkim orientowachu so woni na struktury, zwonka wot cyrkwje připóznatych, štož hłuboko sahacy proces modernizowanja serbstwa wuwabi.
Friedrich Schorlemmer
Wón słušeše k najraznišim kritikarjam režima NDR. Nazymu 1989 bě jedna z najprominentnišich wosobinow měrniweje rewolucije. 80lětny Wittenbergski teologa Friedrich Schorlemmer je minjenu njedźelu zemrěł. Zwjazkowy prezident Frank-Walter Steimeier je Schorlemmera jako zmužiteho wojowarja za swobodu a demokratiju, muža słowa, swědomja a wěry wuzběhnył.
Znajmjeńša dwójce je so Schorlemmer do stawiznow zapisał. Na masowej demonstraciji 4. nowembra 1989 na Berlinskim Alexanderowym naměsće namołwješe ludźi, so namocy wzdać. Lěta do toho, 24. septembra 1983, bě na ewangelskim cyrkwinskim zjězdźe NDR we Wittenbergu mječ na radlicu kował. Tehdy bě Schorlemmer prědar w Lutherowym měsće a sobuorganizator akcije. Hesło „Mječe na radlicy“, wot mócnarjow NDR zacpěte, bě wodźacy motiw křesćansce wobwliwowaneho měroweho hibanja NDR. Schorlemmer narodźi so 16. meje 1944 we Wittenbergu. W NDR njesmědźeše maturować, studowaše pak přiwšěm teologiju. Ze swojim měrniwym spjećowanjom a protestom bě stajnje we wizěrje statneje wěstoty NDR.
Hudźbny móst mjez Čěskej a Łužicu
Ekumeniski dźakny koncert
Budyšin (CRM/SN). We wobłuku Dnja wotewrjeneho pomnika je ewangelska wosada swj. Pětra w Budyšinje předwčerawšim na wurjadny dźakny koncert přeprosyła. Před měsacami dźě bu jasne, zo žada sej hawarija na Eulowych byrglach, dotwarjenych w lěće 1910, dokładnu restawraciju tak mjenowaneho pišćeloweho hrajneho blida (kompleks manualow, pedalow a registrowych ručicow – přispomnjenje redakcije). Pišćeletwarski mišter Dirk Eule, jednaćel zawoda Hermann Eule, rozłoži zajimcam z pomocu projicěrowanych wobrazow wobjim fachowych naprawow, kotrež su trjeba, wažny dźěl „wulkeho a komplikowaneho instrumenta dospołnje wutwarić, wšón proch někotrych lětdźesatkow wotstronić, reparować, trěbne techniske změny přewjesć a skónčnje projekt z dobrym swědomjom zaso přepodać“. Farar Christian Tiede pak njedźakowaše so jenož na tradicije bohatej Budyskej firmje, kiž słuša k najwjetšim swojeho razu w Němskej, ale tež wosebje pomnikoškitej kaž tež dalšim sponsoram, kiž wobšěrnu restawraciju financielnje zmóžnichu.
Serbska kultura lětsa w fokusu
Pjaty raz „Witajće druhdźe“
We wobłuku nowinarskeje rozmołwy k zazběhej aktualneje hrajneje doby Němsko-Serbskeho ludoweho dźiwadła (SN rozprawjachu) je tež socio-dźiwadłowy Thespis-centrum swój program předstajił. Wulki wjeršk steji takrjec hižo před durjemi.
Kabaretist Martin Fromme je dźensa, pjatk, z hosćom na jewišću ...
„Wahrheit-Krabat“: Ničo jasne njeje
Kajki je staw přepytowanja afery kołowokoło internetneje strony „Wahrheit-Krabat“ z lěta 2022, kotraž so přećiwo tehdom hišće amtěrowacemu wjesnjanosće Tomašej Čornakej měrješe?
Njebjelčicy/Zhorjelc (SN/mb). „Mamy winowatosć, naležnosć wuslědźić“, praji rěčnik Zhorjelskeho statneho rěčnistwa Christopher Gerhardi na naprašowanje našeho wječornika. Wšako njejedna so tu wo priwatnu wosobu, ale něhdyšeho mějićela zjawneho zastojnstwa. So wě, zo so woni ze wšěmi ewentualnymi slědami w interneće zaběraja. Jeli je trjeba, tež we wukraju a zwonka Europy. Tomaš Čornak sam bě detektiwej nadawk za rešerše dał (Serbske Nowiny su rozprawjeli), kotrehož je statne rěčnistwo tež słyšało. „Wón pak njemóžeše nam rozsudny pokiw sposrědkować“, tak Gerhardi. Při přepytowanjach we wukraju su na zwólniwosć tamnišich zarjadow pokazani, kotraž njeje awtomatisce zaručena.
